"منة"
بالصباح دغش بعد سويت لينا الشاي محمد قال لي ناس امو ضربو ليو وقالو نجي نفطر معام، قلت ليو طيب وشلت هم لمن جونا في بيتنا ابو اكلنا وقعدو يقلبو في عيونم زي اللوبة لمن ما تنجض في الملاح، انا هسي امشي افطر في بيتم؟ كنت بفكر البس شنو وبعد شربت الشاي طلعت تياب الشنطة جتت ما خليت ولا واحد عشان اختار منم، حلوم قالت لي ووصتني قبل اسافر لمن تمشي ليم اول مرة البسي توبك الكحلي ده حلو واعملي مكياج اوعك تمشي وانت مغسلة وشك بالموية وعاملة فازلين، سجمك بشيلو حالك وبقولو انت مبشتنه ومخلقنة، اتريحي واعملي مكياجك اربطي توبك في نصك وامشي ليم مرا مرا، بعد اتذكرت كلاما الخوف راح كلو كويت التوب كان مكرفس زي اللايكا بقرة حبوبة السرة جنا تدخل اي شي في خشما الكبير ده، قلت لي محمد عايز تلبس شنو عشان اكوي ليك معاي، قال لي بتعرفي تكوي جلابية قلت ليو بالحيل بعرف انا الكنت بكوي جلاليب يابا البمشي بيا الجمعة وبحضر بيا العقد، قال لي ما شاء الله عليك وعيني باردة اظن ماف حاجه ما بتعرفي تسويها، قلت ليو نااان لازم اعرف لاني مرا شاطرة قال لي انت اشطر من شاطرة والله، بعد كويت دخلت استحميت ودعكت جسمي مرتين اتمليت صابون، طلعت ريحتي صابون لوكس صابون لوكس، سرحت شعري عملتو كعكة وطلعت لي خصلتين بالجمبة، حاجات المكياج كانت كتيرة ماليات شنطة كاملة ونصا ما عرفت اعمل بيا شنو، في مية قلم وبدرتين وظلال وفاونديشن بي اسمو الصعب ده سنه حتى قدرت انطقو ويع زاتو ما بحبو ببقي الوش زي الخريطة كل حته لونا براو، خططت حاجبي بالقلم الاسود زي حبوبة كحلت عيوني وعملت لي رموشي ماسكرا خلوم علمتني اقولا وختيت بدرة وروج، وقربت انسى الريحة في اخر لحظة اتذكرتا اتمليت بيا مت فوق لي تحت، ولبست دهبي عشان اكشكش بيو قدامم، لكن لمن جيت اثبت التوب ما عرفت ليو اخت الدبوس في راسي يقع من كتفي، اصلح حق كتفي دبوس راسي يطعني زهجت منو لمن قربت ابكي، هسي حلوم لو هنا كلن زمان ثبتتو لي يا حليلك يا حلوم، ياريتو لو توب هزاز ما كان عذبني كده بجدع لفحتو وخلاس، محمد جه وقال لي لسه عليك؟ قلت ليو التوب ابى يثبت لي من قبيل بلبس فيو، قال لي اثبتو ليك؟ هزيت براسي وهو جه ركب لي الدبابيس لمن ثبت وقال لي كده خلاص؟ هزيت براسي تاني، كان لابس جلابيتو مع المركوب ولافي عمتو اتذكرت اول مرة لمن شفتو قلت هو شين، لكن الحقيقة هو ما شين والله يمكن المرة ديك عشان كنت ما بعرفو ولا بدورو شفتو شين، لكن هسي والله بقى حلاتو احلى من رجال حلتنا جتت عليم، لمن يرجعني واعمل الكرامة بتبوبر ليم بي راجلي السمح الاسمح من رجالم، مشينا وانا كنت خايفة قبل ما ننزل من العربية قال لي ما تتوتري ولا ترهقي نفسك ماف زول هنا ممكن يضايقك هزيت راسي ونزلنا، كانت يارا الفتحت لينا الباب سلمت على اخوها بالحضن وانا في يدي بس ومشت ولا كلفت نفسا تقيف معاي، دخلنا جوا وكان بيتكم كبير اكبر من بيتنا نحن وناس حلوم سوا بشبه حق مسلسل نور ومهند، ما شاء الله عندم عفش كتير ومكيف كبير اكبر من شباك ناس حلوم، قعدنا في صالة كده كبيرة فيها اربعة سراير وكراسي جلوس لونا دهبي وكانت حلوة والله وباردة لو ما طلعت برا ما بتعرف الشمس لسه في السما، تاني جات خالتو هالة وعشان نسيبتي يمه قالت لي الا اقول ليها عمتي، وهي زاتا حضنت ولدا وانا برضو سلمت علي وباستني في خدي وقالت لي كيفك يا بتي ان شاء الله كويسة وما ناقصك شيء قلت ليا الحمدلله كويسة انت كيف يا عمتي قالت لي الحمدلله يابتي ياهو شايلين همكم،
