"منة"
محمد قعد جمبي في السرير وقال لي معليش عشان زعلتك المرة الفاتت، لكن انا ما قصدي اقول ما دايرك ولا بقدر اقول عليك كده، انت ما شاء الله عليك الف واحد يتمنى لو يطول ضفرك، لكن قصدي انت صغيرة بالنسبة لي صغيرة شديد فرق السن البيناتنا بعمل عمر زول عديل، عارف عندكم عادي الوحده تعرس واحد اكبر منها ولو ضعف عمرها مرتين او تلاته او حتى لو كان قدر ابوها لكن انا ما كنت مستوعب الفكرة ولا قادر اشوفك على انك زوجة لي، انت شاطرة في شغل البيت لكن العرس ما طبيخ ونضافة بس في متطلبات تانية وانت حاليا ما بتقدري عليها، ما عارف اذا اتكلمو معاك في الموضوع ده ولا فهموك ليو لكن بقول ليك نحن ما ح نعمل شيء، على الاقل في الوقت الحالي انا ما بقرب منك لانو انت محتاجه تكبري اكتر وتوعي للبقولو ليك ده، (اوعى وحده تسرح بي خيالها بعيد دي رواية وابجيقة السوداني ما بطلع منو الكلام ده ههه) لكن ح يفضل سر بينا لو امك سألتك او امي قولي ليهم نحن تمام وما تردي تاني، قلت ليو هم دايرننا نعمل شنو؟ قال لي ما تشغلي بالك بالأفكار دي، اها انت امتحاناتك متين؟
- الامتحانات قربت.
= وما جبتي كتبك لي ولا خلاص حفرتي لمن حفظتي المقررات
- يابا ما قال لي انت بتخليني اقرا.
= لازم تقري وتتعلمي.
- بتخليني امشي الجامعة؟
= اي ولو عايزة تحضري ماجستير ودكتوراة برضو.
- ديل شنو ديل؟
= لمن تصلي لمرحلتهم بتعرفي.
انا ما عارفه اول محمد كان بقول شنو وحاجات العرس التاني دي شنو وانا كيف صغيرة عليها، وانا لمن جيت ماشه يمه ما قالت لي حاجه بس اتريح بعد استحمى وخلاص، فرحت لمن قال بخليني اقرا هسي لو عرست واحد من البلد كان الا اشوف القراية دي في أحلامي الوردية ولا البرتغالية، فتح لي التلفزيون وقال طالع السوق وما بتأخر حذرني ما افتح الباب لي زول لمن يجي.
"محمد"
كنت محتاج اتكلم معاها رغم انها ما فهمت قصدي لكن على الاقل وضحت ليها وجهة نظري، شدة ما هي طلفة ما استوعبت بقول ليها في شنو، اخترت اقفل الموضوع على كده وما عارف لي بعدين ممكن اتصرف كيف، المهم كنت عايزها تقرا لانها ام اولادي وهي المسؤول الاول عن مستقبلهم، ممكن تكون السبب الرئيسي عشان يطلعوا افراد ناجحين ولا العكس ويكونو فاشلين، اكيد ما بحملها المسؤولية كاملة لانو في اطفال بإرادتهم بختارو الفشل، لكن ممكن تكون هي مؤثر عليهم يدفعهم للصلاح ولا الفشل، دخلت مكتبة في نهاية الشارع وجبت ليها كتب تامن بالمريحات عشان تقرا وتمتحن نفسها، واخترت اقلام ملونة ودفتر لو احتاجت تكتب برا وبالمرة جبت ليها قرطاسية كاملة عشان تمشي بيها الامتحان، وقبل ما ارجع ليها مشيت بيتنا عشان اتكلم مع امي ما كنت بفوت ليها الحصل ولا غلطها في حق منن،
