"منة"
حلفت ما بتكلم مع محمد لحدي ما رجعنا البيت وكل ما يتكلم معاي بعمل نفسي طرحة وما برد عليو، دخلت استحميت صليت العشاء ورقدت اتغتيت بالبطانية لي وشي، لمن جه ناداني عملت نفسي نايمه زحى الغتى مني وقال لي انت مالك من قبيل صارة وشك؟ زعلتك في حاجه؟ ابيت اتكلم، قال لي لو ما وريتني يا منه بعرف من وين انا ما حاوي عشان اعرف براي، قلت ليو امشي للما عرفتا مرتك ولا بت خالتك دي واتكلم معا انت فاضي تتكلم معاي، الليل كلو قاعد تتكلم معا زي البراية ما سكت امشي ليا تنونسك داير بي كلامي شنو، قعد يضحك وقال لي قصدك اسيل؟ انا عندي مرا وحده وهي انت ما عندي غيرك، اما عن اسيل هي بت خالتي واتربينا سوا عشان كده قريبة مني لكن ماف حاجه اكتر من كده، قلت ليو ناان هي لو بت خالتك بتتلصق فيك كده لشنو؟ لو ما قلت ادب منها وبتقول انت بستي ولا فستي، ضحك تاني وقال لي هي شايفاني صديقها المفضل ولو قصدك على اللصيق هي من زمان ما بتعرف تتكلم مع زول لو ما مسكت يدو ولا قعدت جمبو طبيعتها كده، قلت ليو انتو الاتنين كذابين ماف مرا وراجل ببقو اصحاب قال لي نحن ما اصحاب؟ قلت ليو انا مرتك ما صحبتك، قال لي مرتي وصحبتي ما اختلفنا لكن انت زعلانه لي قلت ليو ما زعلانه ولا شتين البزعلني شنو كمان، قال لي ده ما زعل عادي دي غيرة عديل قلت ليو الغيرة دي شنو؟ قال لي ما اضايقتي لمن اسيل كانت بتتكلم معاي؟ قلت ليو واضايق لي خلي تتكلم معاك لي بكرة وانت اتكلم معا للسنه الجاية انا مالي ومالكم ولا غردي بيكم زح مني زاتو عايزة اتخمد وانوم فترانه، قعد يضحك وقرصني في جضمي وقال لي حبيت منظرك وانت غيرانه، زحيت يدو مني واتقلبت على الحيطة ونمت.
"محمد"
عزيمة اسيل لي اكيد ما من فراغ ولو انا بعرف امي كويس بتكون هي الحرشتها، لانو لو بالجد فاقداني وطولت مني كان من زمان اتصلت ما الا هسي اتذكرتني، مهما كانو ناوين يعملو طلع من مصلحتي ملامح منه وهي غيرانه كانت احلى ما يكون، مضايقة وزعلانه وهي في ذات نفسها ما عارفه السبب، ممكن يكون جهلها بالحب وما اظن زاتو حبت قبل اليوم ولا عارفه هو شنو، لكن انا متأكد انت ما بتغير على زول لو ما عندك مشاعر تجاهو ومهمتي اخليها تعرف مشاعرها وتعترف بيها.
"منة"
لي اغير عليو وهي منو اسيل دي زاتا لمن اغير منا عان ليا عاملة زي المفراكه لحماية في جسما ماف زي العود واحد، شعري اطول من شعرا وانا احلى منا بي روجا الشين ده، رقدت كتير لكن ما قدرت انوم ومحمد كان نايم من زمان، نزلت براحه ومشيت دفيت لي كباية لبن وشربتا، محمد كان نايم على بطنو بنوم عريان من غير فنيلا عاجباو عضلاتو الكبار دي زي المصارعين، قعدت في السرير وبرضو ما قدرت انوم،
= امشي استحمي بي موية باردة بتنعسي.
- معليش انا صحيتك.
= صاحي من قبيل وحاسي بيك بتتقبلي في السرير.
