"محمد"
وقعت وماف زول سمى علي جيت على وشي وانا ما حاسب حساب ولا داري بنفسي، مما لا شك فيه انها وقعة حلوة، بفكر فيها في اي وقت ومهما كانت حالتي حتى لمن طلعت من البيت عشان زعلان منها ما قدرت اطلعها من بالي، والطريقة الكانت منتظراني بيها وكيف بتتكلم وتعبانه عشان تراضيني بالجد وقتها كنت حاسس اني اسعد انسان في الكون، بقيت بعاملها معاملة القريب الممتنع وما بقدر انوم لو ما كانت جمبي، صحيت وهي لسه نايمه كنت برد على ايميل بخص الشغل وغالبا ممكن اقدم استقالتي، لانو ما بقدر امشي واخليها وراي ولا اسوقها معاي، يبقى الحل الوحيد اخلي الشغل هناك وأسس شغلي هنا من اول وجديد، يمكن تكون صعبة وتاخد وقت لغايه ما الشغل يستقر لكن انا عايز احاول عشاني وعشانها، اتكلمت مع الحاج في الموضوع وقال ما عندو مشكلة ولو احتجت لاي شيء هو مستعد يقدم لي كل المساعدات الممكنة، لكن برضو كان لازم ارجع الإمارات عشان اخلص شغلي وعقد البيت المأجرو، حسيت بيها بدت تصحى لانو بقت تتململ في السرير،
= يا صباح النور.
- صباح الخير.
= لسه عندك حمه؟ وختيت يدي في جبينها وكان عادي.
- لالا انا كويسة.
= الحمدلله.
- شربت الشاي؟
= لا كنت منتظرك تصحي ونشرب سوا.
- طيب بصلي واسوي.
= صلي وتعالي الشاي جاهز.
كنت عايز امشي المدرسة عشان اقدم ليها من هناك ويجيها رقم الجلوس وتمتحن في الخرطوم، اخدت لي دُش سريع وطلعت قلت ليها بمشي المدرسة وما بتأخر ولو عايزة حاجه تتصل علي،
هالة: خير ان شاء الله ماشي المدرسة عندك شنو ما تقول لي عايز تشتغل استاذ؟
محمد: ممكن لي قدام لكن عليو اقدم لي منن معاهم عشان رقم جلوسها يطلع.
هالة: وهي لسه عايزة تقرا يعني ما كفاية عرست مالا ومال القراية خليها في مسؤولية بيتها وراجلها، كمان تعمل ليها كل يوم طلعات ودخلات.
محمد: اي عايزة تقرا وبتقرا كمان ومسؤولية البيت شايلنها سوا، انت قريتي واخواتي قرو ومرتي بتقرا ويبقى عندها شهادة نعلقها في بيتنا زي شهاداتكم المعلقة دي وبنفخر بيها قدام اي ضيف بجينا.
ياسمين: كلامك صااح والله يا محمد، وانت يا منة اقري غير قرايتي وشهادتك ماف حاجه بتنفعك، رجال شنو الرجال اذى وما قصدي شيء يا محمد لكن دي الحقيقة.
هالة: انا ما قلت كده عشان ما دايرها تقرا لكن خفت عليها المسؤوليات تكتر وما تقدر على البيت والقراية.
ياسمين: بتقدر، انت زاتك زمان قدرتي ربيتينا كلنا وقريتي قرايتك واشتغلتي شغلك.
اسيل: والله يا محمد ما بدعمك في القرار ده لانو منى لسه صغيرة يادوبك تقدر تشتغل شغل البيت لو ما غلبها تاني تقوم ليها مدرسة فوق راسها.
