"منة"
لمن فتحت عيويناتي ولقيتو ماف في الاوضة رقصت الرقبة، بركه المشى وخلاني اصلا ما بدور يضايقني ادردقت في السرير كان كبير قدر عنقريب حبوبة السرة وقت كانت عروس، وناعم ما زي مراتب يمه التقول فيها حصحص نمت فيو كلو براي، بالصباح دغش بعد صليت طلعت من الاوضة لقيتو راقد في الكرسي، ملصت نعالي وحمت حفيانه عشان ما يصحى، كنت زهجانه وعايزة احضر التلفزيون هسي بتكون شغالة ماشا والدب لكن لو فتحتو صوتو بكون عالي بصحيو، مشيت مطبخ الناس الغنيانين حق المسلسلات داك كل ما اشوف اقول حلوم لو شافتو بتسكن هنا وما بتفوت اهلا تاني، عملت لي شاي وقعدت في الارض شربت ودخلت البسكويت جوا الكباية يمه ماف عشان تشاكلني واكلت بالمعلقة، بعد ده كلو وهو كان لسه نايم زي الجته ولا اتحرك، مشيت وقفت جمب راسو وقلت ليو محمد محمد اضرب لي ناس يمه عايزة اتكلم معام، فتح عين وحده وشال التلفون قال لي ياداب الساعة سبعة وعشرة الوقت بدري، قلت ليو نحن بالوكت ده بنكون صحينا زمااان حتو يمه حلبت البقرات وبتبيع في اللبن اضرب ليم، ضرب اداني التلفون ورجع ينوم كسلان خلاس زي احمد ود جدي فتاح جمو نوم دخلت المطبخ ورد علي ابوي حامد،
- يابا...
حامد: كيفنك يابتي انت كويسة؟
- ما كويسة يا ابوي لي ما بتضربو لي عشان عرست بقيت ما بتكم يعني ولا نسيتوني؟
= العفو والله يابتي نان انت بنسوك بالغالية لكن امك قالت ما نزعجكم.
- يابا تعال سوقني.
= لي راجلك عمل ليك حاجه؟
- لالا.
= دقاك؟
- لالا هو مسكين ما قاعد يشاكلني زاتو.
= طيب جايه لي؟
- اشتقت ليكم لي يمه وبيتنا وحلتنا.
= انت هسي بقيتي مرا وعلى عصمة راجل اقعدي في بيتك ومع راجلك واسمعي الكلام عشان ما يقولو ابوك ما عرف يربيك.
- حاضر.
= اديك امك؟
- اي.
الدهب: حليلك يابتي البيت بقى لي مسيخ بعد مشيتي لا قعادي قعاد ولا رقادي رقاد.
حامد: ما تقولي كده يا مرا هي من غير شي متجرسة وقالت جايه.
الدهب: اشتقت لي بتي ما اشتاق ليها كمان ما كفاية سقتوا مني بدري.
حامد: يالدهب "ده تحذير يعني اسكتي وما تتكلمي في السيرة دي تاني"
- يمه خلاس وكت انا ما بقدر اجيكم انت تعاليني واقعدي معاي.
+ ما بقدر يابتي متين مشيتي لمن اجي لاحقاك اصبري حبه، نسابتك ما يقولو جينا بي وراك.
- ما دايرة اقعد هنا انا بلدم ما حلوة زي بلدنا ولا عندم حواشات ولا ترعة.
