"منة"
التلفون وقع من يدي وبقيت اكورك وانا ما واعية محمد صحى مخلوع وقال لي مالك بسم الله الحصل شنو؟ بقيت بقول حلوم... حلوم... المستشفى... ماتت
"محمد"
صحيت بي منن بتكورك وما كنت فاهم هي بتقول في شنو؟ صحبتها حلوم الجاها شنو شلت التلفون رجعت في رقمها رد لي حسام وقال هو في المستشفى وحلوم ماتت، اتشهدت واستغفرت إنا لله وإنا إليه راجعون، بتكلم مع منن لكن ما بترد ولا واعية بالدنيا، لبستها عابيتها وصحيت ياسمين عشان تمشي معانا لانو ما كانت قادرة تمشي براها، لمن وصلت المستشفى لقيت حسام قاعد في الارض وخاتي يدينو في راسو، رفعتو من الواطى وقلت ليو البركة فيكم ربنا يصبرك ان شاء الله، هو زاتو ما كان بتكلم دخلت للدكتور استفسر منو الحصل شنو وسبب الوفاة، قال انو كان عندها نزيف دام لاكتر من 27 ساعة احتمال لو جات ابدر كان يقدرو يلحقوها لكن الله يرحمها، كملت إجراءات الخروج واجرت الاسعاف عشان وديها البلد لي اهلها، الله يعينهم على مصيبتهم ويصبر قلبهم.
"منة"
حلوم ماتت... حلوم الهسي قبل يومين نحن كنا بناكل سوا وبنضحك، طلعوا من المستشفى وهي جثمان مكفنه بالابيض، ما قدرت ابكي دموعي حلفو ما ينزلو محمد كان بقول لي ابكي البكى بخفف الوجع، وانا ما نزلت مني ولا دمعة لغاية ما وصلنا البلد، وكان صوت البكى يجيب الرايح جنس ناس وجنس خلق رجلك ما بتعرف تختى وين، ياسمين كانت ماسكاني ودخلتني جوا والبشوفوني كلو بعزيني، وانا ما قادرة ابكي وما قادرة اعمل اي شي حسيت دموعي انتهت، يمه قعدت تبكي فيني وقالت لي احي يابتي صحبتك وحبيبتك وروح قلبك، معليش يابتي نسو شنو ده ياهو حال الدنيا الليلة انت في وبكرة ماف، وبرضو ما بكيت كنت بعاين ليا وساكته، عمت حلوم جات تكورك من برا وقالت ده كلو منكم انا ما قلت ليكم البت صغيرة ما قدر العرس، لكن انتو قلتو الا تعرسو ليا اسي عجبكم اها كتلا وجه، البت صغيرة ما بتستحمل وانتو الكتلتوا، انا ما عافية ليكم كلكم كتلتو لي بتي وذنبا في رقبتكم ما عافية ليكم، مسكتني وقالت لي احيي يابتي صحبتك ودعت، في نفس اللحظة جابو لينا خبر بت خالتا لي حلوم عرست السنه الفاتت وفي عمرنا كده قالو ماتت في الولادة والطفل برضو مات بعد نص ساعة، البيت ده من صوت البكى تحسو بترجى رج، يادابك ما دموعي نزلت وقعدت ابكي، قلبي كان بتقطع وما قادرة اصدق حلوم خلاص ماتت، صحبتي الما عندي غيرا اتربت معاي واكلنا وشربنا سوا، احييي من وجعتك يا حلوم احييي من قطعت قلبي عليك يا صحبتي واختي، مشيتي وين وخليتيتي في الدنيا دي احيي يا حلوم فراقك حااار زي النار، بعد الرجال جو من الدفن سمعنا صوت حسام برا بكورك انا الكتلتا انا السبب ماتت بسببي، حالتو كانت تبكي الحجر بالجلالة الرجال مسكو.
تلاتة يوم مرو ولسه لمن تشوف الناس تقول البكى كان الليلة الصباح، شدة ما موتتا دي وجعتنا الغريب والقريب جه عزا فيا، وكانت حاصلة جوطة وجات شرطة من الخرطوم واتكلمو مع الناس الكبار وطلعو قرار تاني ماف بت اقل من 18سنه يعقدو ليا والا بسجنو الابو والعريس والناس الحضرت العقد، اغلبم ما اخدو القرار جد الا شافو الشرطة رفعت راجل مشى يعقد على وحده عمرا سطاشر سنه.
