الحياة بكل مجاريها

البارت الخامس

خرجت سلمي وهي تدور:- ايه رايك
لم ترى اي ريأكشن على وجهه:- ساكت ليه
سيف(بتهكم):- هي دي عبايه
سلمي:- مش عجباك ولا ايه
سيف:- يبنتي دي عامله زي الروب مفتوحه من فوق لتحت ولا تنفع عبايه ببصله
سلمي:- بصله!!!!!!
نظر لها بنفاذ صبر:- يلا يلا اهي مغطيه دراعتك
نزلوا الاثنين ونزل خلفهم مازن
نظر سيف خلفه بابتسامه:- صباح الخير يا مازن
مازن(بابتسامه):- صباح النور
سيف:- يعني محدش بيشوفك
مازن:- ما انت عارف بقى الجامعه وسنينها
سيف:- ربنا يقويك
*********************************
تركه واتجه الي المحل وبدأ في الفتح
مدحت بابتسامه عريضه وهو ينظر لسلمى:- يا صباح الجمال والحلاوة والعباية السوده
نظرت سلمي له باستغراب وهي ترى مدى بجاحته وعفويته
نظر سيف خلفه بنفاذ صبر:- يا مدحت احنا لسه بنقول يا فتاح يا عليم متخلنيش اعملها معاك الله يسترها عليك
مدحت:- اعملكوا شاي دا انا بعمل شاي حلو اوي اوي
سيف:- لا شكرا مش بتشربه
مدحت وهو مستمر في النظر لها:- هي مين دي اللي مش بتشربه
حاول سيف يمتلك اعصابه بسبب كلام هذا الوغد ثم قال بصوت عالي نسبيا:- يا معلم حسنين خد مدحت عندك علشان مرتكبش جريمه على الصبح
المعلم حسنين:- تعالي يا كلب هنا شوف شغلك

اسرع مدحت للداخل
دخلوا المحل ومستمره سلمي في الضحك
نظر لها سيف بضيق:- عجبك ولا ايه
سلمي(باستغراب):- هو مين
سيف:- مدحت
نظرت لسيف بضيق:- طب قول كلام يتعقل مثلا يعجبني مازن اللي كان نازل دا إنما مدحت اخص عليك
نظر لها بضيق وهو يقول بحده:- وانتي لحقتي اعجبتي بمازن
سلمي وهي تجلس على احد الكراسي:- يعم بدي مثال انت ليه قفوش كدا
سيف:- ولا قفوش ولا حاجه...تعالي افطري
سلمي:- لا شكرا
سيف:- يبنتي ما انتي مفطرتيش
سلمي:- ايدي وسخه
سيف:- ما انتي لسه نازله ملحقتش تتوسخ يعني
سلمي:- لا هو كدا
نهض سيف وهو ينظر لها:- طب تعالي
سلمي:- على فين
سيف:- فيه حنفيه برا تعالي بس
خرجت برفقته واستمرت في غسل يديها
نظر لها بملل:-مش كفايا بقى والله نضفت
سلمي:- الاحتياط واجب بردوا
ثم دخلوا الاثنين المحل
نظرت له دقايق قاطع شرودها وهو يقول بابتسامه:- انا حلو اوي كدا
انتبهت سلمي لنفسها ثم قالت بحرج:- انا اصلا مكنتش بصالك
سيف:- هصدقك حاضر
:- عاوز بخمسه جنيه فلفل وخمسه كمون
نهض سيف من مكانه:- حاضر
اعطي الطلبات ورجع مكانه مره اخري
سيف:- تشربي شاي
نظرت له بابتسامه ثم قالت بهزار:- هتجيبه من عند مدحت
ضحك لها وظهرت غمزته:- اهه من عند مدحت
سلمي:-ماشي بس بيعمله حلو ولا بيعك
سيف:- لا متقلقيش حلو
ثم رفع صوته:- مدحت مدحت
*جاء مدحت من القهوه مسرعا*
مدحت:- ايوه يا باشا
سيف:- هات اتنين شاي والسكر برا واتوصي بقى
مدحت وهو ينظر لسلمى:- عيوني
ثم تركهم وغادر سرحت سلمي لبعض دقايق ثم قالت بتلقائيه:- سيف...هو دا شغلك بس
سيف وهو ينظر لدفتر الحسابات:- ايوه
سلمي:- ويا ترى معيشك حلو
ترك سيف الدفتر ثم نظر لها باستغراب:- الحمدلله...بس اشمعني
سلمي:- يعني باباك اكيد بياخد مرتب اكتر من المرتب اللي انت بتعمله هنا في المحل
تنهد سيف بهدوء ثم قال:- ابويا حابب شغله وانا حابب شغلي ومعيشني الحمدلله احسن من غيري والرزق من عند الله حتى لو اشتغلت ايه رزقي هاخده هاخده وانا راضي والحمدلله
نظرت له بتعجب وابتسامه ظهرت على شفتيها
مدحت:- احلى شاي لاحلى اتنين
نظرت له بضيق ثم قالت بهمس:- منك لله قطعت لحظه حلوه كنت بفكر فيها
نظر لها سيف بعد ما غادر مدحت وقال بهدوء:- كام معلقه
سلمي:- مظبوط
وضع سيف الكوبايه أمامها بابتسامه:- اتفضلي
سلمي:- بقولك يا سيف
سيف(بنفاذ صبر):- اممم
نظرت له سلمي بفضول:- هو مين مازن دا
نظر لها باستغراب:- اشمعني
سلمي:- عادي بسأل اديني بضيع وقت لغايه ما امشي
سيف:- مازن يستي جيران من زمان اوي ومن ساعه ما نقلوا كانوا ديما عندنا هو ومامته هو معندهوش اخوات اصلا بس من ساعه ما دخل الجامعه وهو انشغل فيها ومبقوش يجوا عندنا زي الاول
نظرت له سلمي بفضول اكتر ثم قالت:- هو مرتبط
نظر لها سيف بدهشه:- مرتبط ايه بقولك في الجامعه لسه...وبعدين اكيد هو أصغر منك متفكريش فيه كتير
تحدثت سلمي بضيق:- خالي في علمك انا مش بسأل علشان كدا انا لقيتك بتكلمه وهو بيكلمك فقولت ممكن يقربلك ولا حاجه
سيف:- خلاص يستي متتعصبيش انا كنت بهزر
شردت سلمي مع نفسها:- اومال ازاي ملك بتحبه وبتقول بيحبني...يمكن مرتبطين من ورا أهلهم...هسأل ملك هي هتقولي
نظرت سلمي مجددا:- بقولك يا سيف
ترك سيف الدفتر:- يبنتي فيه بضاعه بحسبها نازله رغي مبطلتيش من ساعه ما قعدتي
تحدثت سلمي بضيق:- خلاص كمل شغلك
اتنهد سيف بهدوء ثم قال بنفاذ صبر:- نعم يا سلمى...عاوزه تسالي تقولي ايه
نظرت سلمي في الأرض ثم قالت بضيق:- لا خلاص كمل اللي بتعمله
سيف:- ماشي
بدا سيف في فتح الدفتر من جديد ولكن تفاجأه برد سلمي
نظرت له بضيق وهي تقول بحده:- انت ما صدقت يعني تقول ماشي...المفروض تقول لا قولي يا سلمى انا سامعك يا سلمى مش ورايا غيرك يا سلمى
نظر لها بدهشه ثم قال:- مالك عندك جفاف عاطفي ولا ايه
ثم قال بمزاح:- فوقي يبنتي انا مش خطيبك
لاحظت سلمي لما قالته ونظرت له بحرج ثم قالت بصوت منخفض:- ايه اللي انا قولته دا منك لله يا سلمى منك لله يارب الأرض تنشق وتبلعني
ثم قاطع شرودها صوت امال وهي تدخل المحل
امال:- يلا يا حبيبتي
نهضت سلمي مسرعا:- حبيبتى يا طنط جيتي في وقتك والله
ثم امسكتها وخرجه من المحل
امال:- طب اصبري اقول لسيف حاجه
سلمي وهي تسرع في مشيها:- مش مهم مش مهم
ابتسم سيف علي تلك الشخصيه الغريبه:- عبيطه والله
**********************************
في فيلا عزت بعد ما وصل المنزل ودخل خلفه مصطفى
عزت:- فيه حاجه ولا ايه يا مصطفى
مصطفى:- أصل الانسه سلمي عاوزه تشوفك وكانت بتعيط امبارح علشان تشوفك
عزت(بحزن):- يا حبيبتي يا بنتي...حصلها حاجه ولا ايه
مصطفى:- لا محدش كلمها بس هي محتاجه تتكلم معاك
قاطع حديثهم دخول كمال
نظر لهم كمال باستغراب:- حمايا
نظروا لتلك الصوت بصدمه
عزت(بقلق):- في ايه
كمال:- عاوز اشوف مراتي
اتنهد عزت براحه بعدما علم انه لم يسمع شيء من الحديث
عزت:- مراتك مش هنا
كمال(بحده):- يعني ايه مش هنا
عزت:- يعني مش هنا زي ما بقولك كدا
تركه كمال وتوجه لغرفه سلمي ثم تحدث بصوت عالي:- سلميييي سلميييي
اسرع خلفه عزت بضيق:- بقولك مش موجوده
نظر له كمال بضيق ثم قال:- راحت فين
عزت:- سافرت يومين مع أصحابها
كمال:- سافرت فين
عزت:- وايه دخلك بالموضوع يلا شوف رايح فين
كمال(بحده):- بقولك سافرت فين انطق
عزت(بصوت عالي ممزوج بحده) :- صوتك ميعلاش عليا يا كمال ولو على سافرت فين فهي سافرت شرم
كمال(باستغراب):- ازاي
عزت:- هو ايه اللي ازاي
كمال:- انا منعها اصلا من السفر من المطار مش هتعرف تعدي وكان هيجيلي خبر بكدا
عزت(بقلق):- هو مفيش غير طياره ما فيه حاجه اسمها عربيه
كمال:- ومش بترد على موبايلها ليه حضرتها
عزت:- هخليها ترد عليك اتفضل امشي بقى
كمال:- صدقني لو مردتش هيبقى ليا تصرف تاني خالص
عزت:- ماشي
نظر له كمال بضيق ثم خرج
مصطفى:- هتقابل ازاي سلمي يا باشا
عزت:- مش هقابلها انت شايف كمال بينط كل يوم ازاي
مصطفى:- طب اقولها ايه
عزت:- انا هرن عليها وخليها ترد على كمال علشان يهدي شويه
مصطفى:- تمام عن اذنك
جلس عزت مكانه بتعب ممزوج بحزن شديد على ابنته الوحيده:- يااااه وحشتيني اوي يا سلمى...البيت مالهوش حس من غيرك
قاطع شروده دخول شاب في بداية العشرينات
كريم:- عمو عزت
نظر له عزت بسعاده ودهشه ثم اتجه اليه واخذه بين ذراعيه:- وحشتني اوي يبني فينك دا كله
كريم(باستغراب):- ماله صوتك
عزت:- مفيش حاجه يبني
كريم:- ازاي يعني اكيد فيه حاجه...هي سلمى مش بتيجي هنا هي وكمال ولا ايه
نظر له عزت بحزن ثم جلس مره اخرى
كريم:- في ايه يا عمو
بدا عزت شرح ما حدث في غياب كريم
كريم(بصدمه):- دا كله حصل من غير ما اعرف
عزت:- سلمي كانت بتكلمك ومكنتش بتقولك علشان تركز في دراستك يبني
كريم(بحده):- وانت ازاي ساكت دا كله ازاي سايبها تعيش عيشه مش عشتها
عزت:- انا كل يوم بتواصل مع المحامي وهو حاليا بيدور وراهم علشان يمسك اي حاجه عليهم
كريم:- كمال وعيلته مش ساهلين علشان يسيبه حاجه وراهم الناس دي قبل ما يعملوا اي حاجه بيكونوا مسحين اي حاجه ليها أثر
عزت:- انت هتقلقني ليه لسه معداش غير يومين ان شاء الله خير
نظر له كريم بهدوء:- طب انا عايز اروح اشوف سلمي
عزت:- لا طبعا ممكن كمال يراقبنا علشان شكله هيبدأ يشك فينا
كريم:- عمو عزت كمال ميعرفش اني نازل مصر اصلا يعني اكيد انا مش في دماغه
عزت:- انت مش هتعرف توصل هناك
كريم:- لا هعرف قولي بس المكان وانا هروح
عزت:- طيب اصبر لبكره ومصطفى هيروح معاك...اطلع ريح انت بقى من السفر
كريم:- ماشي عن اذنك
**********************************
في الجانب الاخر في الجامعه
محمد:- لسه بدري يبنتي
جني:- كفايا كدا هو لو عادل جه كنت هعرف اتكلم معاك اصلا
محمد:- كويس انه مجاش حمد ربنا
جني:- طب تعالي اوصلك
محمد:- لا امشي انتي ما انتي عارفه طريقي طويل
جني:- هو حد يلاقي توصيله ببلاش ويقول لا
محمد:- ايوه انا...مع السلامه بقى علشان مخدش مخالفه من اخويا
جني:- معرفش اخوك دا بيعتبرك في سنه كام انت مش صغير علشان يتحكم فيك كدا
محمد:- اخويا مش بيتحكم فيا اخويا خايف عليا ويلا امشي بقى
جني(بخبث):- طب ما انت عارف اهو بتعمل في نفسك كدا ليه بقى
نظر لها محمد بحده:- انا ماشي يا جني مع السلامه

*في الجانب الاخر في غرفه ملك*
ملك:- يبنتي مفيش حاجه
سلمي:- كذابه
نظرت لها ملك ثم قالت:- بصي هقولك علشان اعتبرتك اختي بس اوعي تقولي لسيف ماشي
سلمي:- وانا مالي اصلا ماليش كلام معاه
ملك:- بصي انا ومازن متربين سوا وكل قعدتنا مع بعض ديما وكنا أصحاب جدا جدا يعني وفي يوم كنت ماشيه في الشارع وحده وقفتني قالتلي بنت مين انتي مخطوبه
سلمي ضحكت ثم قالت:- عريس
ملك:- بالظبط المهم انا روحت البيت كان مازن عندنا المهم دخلت فرحانه مش عارفه ايه العبط اللي كنت فيه دا اول مره احس نفسي اني كبيره بقى وكدا الكل فضل يهزر معايا بس مازن حسيته قلب وشه قولت اكيد حاجه حصلت معاه المهم جه الفرصه اننا لوحدينا واستغلتها
Flash back
ملك:- مالك يا مازن
نظر لها مازن بضيق:- مفيش
ملك:- لا والله ازاي يعني..ماااااالك
مازن:- عاوزه تتخطبي يا ملك
ملك:- اكيد لا احنا كنا بنهزر يابني
مازن:- اومال ايه الانشكاح اللي كان على وشك دا
ملك:- عادي يعني.. ثم نظرت له ملك بخبث:- اوعي تكون بتحبني انا عارفه اني جمالي لا يقاوم بس مسمحلكش تحبني
مازن:- وفيها ايه يعني لما احبك
نظرت له ملك بصدمه:- انا كنت بهزر اكيد احنا اخوات يا ميزو
مازن:- بس انا مش بعتبرك اختي يا ملوكه
ملك:- يعني ايه
مازن(بلمبالاه):- يعني بحبك
نظرت له ملك بصدمه:- اسكت سيف لو سمعك هيقتلنا
مازن(بحده):- انا معملتش حاجه عيب انا بقولك انا بحبك
ملك:- يعني ايه بردوا
نظر لها مازن بضيق:- انتي عبيطه يبت بحبك يا ملك وان شاء الله اول ما اقدر اتقدملك هتقدم بدون اي تفكير
back
ملك:- بس يستي دا كله الحكايه بس قررنا نبعد ونقلل كلام علشان حرام وكدا مش بنتكلم غير لو اتجمعنا غير كدا مش بنتكلم وهو حاليا أولى معهد باقيله سنه ويخلص
سلمي:- معهد ايه
ملك:- معهد فني صحي
سلمي:- طيب مش بتتكلمه فون ساعات
ملك(بتريقه):- معنديش فون اصلا علشان اتكلم فيه
سلمي:- ليه كدا
ملك:- سيف قالي هجبلك لما تنجحي في تالته اعدادي وخلاص الامتحانات باقلها اسبوعين وتبدأ هانت
سلمي(بتوهان):- يارب يطلع بيحبك فعلا وميطفحكيش فراشات
ملك(باستغراب):- بتقولي ايه
سلمي:- هاا..ولا حاجه يلا نتعشى بقى انا جوعت
ملك:- وانا كمان يلا
خرجوا كان سيف يجلس مع مصطفى
دخلت ملك المطبخ ثم اتجهت سلمي اتجاه سيف ومصطفى
سلمي:- عمو كلمت بابا
مصطفى:- قالي هيكلمك موبايل
سلمي(بضيق):- بس انا عاوزه اشوفه
مصطفى:- يبنتي انتي متعرفيش ايه اللي حصل انهارده
ثم بدا يحكي لها ما حدث
سلمي(بصدمه):- يعني المطلوب مني اكلمه
قاطع رد مصطفى صوت رنين هاتف سلمي نظرت له سلمي برعب:- دا بيرن
مصطفى:- طب ادخلي ردي جوا
نهضت سلمي وتوجهت للغرفه
نظر لها سيف بغموض ثم نهض هو الاخر
***********************************
في غرفه ملك
سلمي:- الو
كمال:- اخيرا رديتي
سلمي(بضيق):- عاوز ايه يا كمال
كمال:- هكون عاوز ايه يعني عاوز اطمن على مراتي الغاليه
سلمي:- كمال طلاما بتكرهني كدا طلقنيي بقى كفايا لحد كدا
تكلم كمال ببرود:- بس انا بحبك يا مراتي
سلمي(بدموع):- بس انا بكرهك بكرهك اوي كمان
وتركت الفون من يديها
لاحظت بخيال خلفها نظرت له ثم تحدثت وهي تضع يديها لتزيل أثر الدموع
سلمي:- ايوه يا سيف

يتبع البارت السادس....
يا ترى ايه رد فعل سيف..!!
يا ترى كمال هيوصل لسلمى ولا لا..!!

اللي بيقرأ يقول رأيه في كومنت♥️