الحياة بكل مجاريها

البارت العاشر

سالم:- وصاحبك دا اشتغل معاك
ابتسم له عادل وهو يقول بخبث:- عيب عليك ميقدرش يرفض
سالم:- برافو عليك يا ولد
************************************
في الجانب الاخر في منزل مصطفي
مصطفى:- الفرح كان حلو
سيف:- اه جميل، ربنا يخليهم لبعض ويكملهم على خير
ابتسم مصطفى لابنه:- عقبالك
اكتف سيف بابتسامه هادئه
مصطفى:- طيب انا نازل، يبقى صحي اخوك اللي بقيت بشوفه بالصدفه دا
سيف:- حاضر
ملك:- يلا عاوزين حاجه
سيف:- رايحه فين
ملك:- رايحه الدرس
سيف:- هتبدأي امتى امتحانات
ملك:- بعد يومين، يلهووووي
سيف:- على عمرك، يلا امشي
خرجت ملك وجدت مازن وهو ينزل الدرج أمامها نظرت له بحنق ونزلت
مازن:- ملك، ريحه فين كدا على الصبح
ملك:- وانت مالك
مازن:- انا مالي
ملك:- ايوه انت مالك
مازن:- في ايه يبت، مضايقه من ايه
ملك:- هضايق من ايه يعني، ولا حاجه
مازن:- انتي شكلك المذاكره مأثره معاكي
ملك:- حاجه متخصكش
نظر لها مازن بحده ثم تحدث بصوت عالي نسبيا:- بقولك ايه، اظبطي بدل ما اظبطك. وبعدين ايه القرف اللي لابساه دا
ملك:- قرررف، انا بلبس قرف
مازن:- هي دي طرحه ونص رجلك باين
ملك:- انت بتتلكك شكلك وانا متأخره على الدرس اصلا
مازن:- مع السلامه
رمقته بنظرات ضيق ثم تركته وغادرت المكان
************************************
في الجانب الاخر في منزل مصطفى
سيف بنبره غضب وهو يرفع صوته عاليا:- محمد قوم، اكيد مصلتش
امال:- انزل انت وانا هصحيه
سيف:- ماشي خاليه ينزل يصلي الجمعه
امال:- حاضر
استدار ليغادر المكان ولكن اوقفه صوت من خلفه:- سيف
وجهه نظره لمصدر الصوت اومأ راسه لاكمال حديثها
سلمي بتوتر:- كريم هيجي انهارده ياخدني ونخرج شويه، ممكن تقول لعمو مصطفى
تكلم سيف وهو يقول بسخريه:- لا مش ممكن اقول لعمو مصطفى
سلمي:- ليه بقى
سيف:- بقولك ايه، انا اولا معرفش هما بيعمله ايه حاليا وقربه يخلصه المشكله دي ولا لسه
قاطعت حديثه وهي تقول:- وثانيا
سيف:- وثانيا بقى رجلك اخدت على برا، خفي شويه
تركها دون أن يسمع منها اي رد
انسابت دموعها تلقائيا ولم تعلم ماذا تفعل في هذه الحياه

"في الجانب الاخر في فيلا عزت"
عزت:- رايح فين على الصبح كدا
كريم:- خارج مع اصحابي، انت اللي رايح فين
عزت:- رايح للمحامي، بيقولي فيه جديد
كريم:- بجد، طب ما تيجي اوصلك في سكتي
عزت:- لا مصطفى زمانه جاي، روح انت
كريم:- طب يبقى طمني
عزت:- ان شاء الله
**********************************
بعد فتره وقد وصل عزت لمكتب المحامي سار في هدوء وقلق على ابنته الوحيده
عزت:- السلام عليكم
المحامي:- وعليكم السلام اتفضل يا بشمهندس
عزت:- خير قلقتني
المحامي:- خير ان شاء الله، انا على حسب علمي لحد الان انه سالم وابنه كمال شغلهم بطال
عزت:- بطال ازاي يعني
المحامي:- يعني لو انكشفه هيروحه في ستين داهيه
عزت:- اللي اعرفه انه شركتهم دي للمواد الغذائية
المحامي:- فعلا للمواد الغذائية، بس اللي جوا العلب مش مواد غذائية
نظر له عزت بعدم فهم:- تقصد ايه، وضح شويه
المحامي:- اللي اقصده يا بشمهندس انه هما تجار مخدرات
نظر له عزت بصدمه وعدم تصديق:- ازاي الكلام دا، اومال ازاي الشغل ماشي كدا ومحدش لاحظ
المحامي:- ما هما اكيد شغلهم كله مش هيطلع معبي مخدرات، جزء منه بس
عزت:- والحل دلوقتي
المحامي:- المعلومه دي في صالحنا، حاليا انا هقدم اعتراض على طلب الطاعه دا أمام محكمه الاسره وان شاء الله يتقبل، حاليا عاوزين نجيب معلومات عن الشغل بتاعهم اكتر ودلايل
عزت:- انا هكلم ناس تراقبهم ويجبولي اخبارهم، وانت كمان كمل اللي بتعمله
المحامي:- ان شاء الله ولو فيه اي جديد هخبرك
عزت:- تمام، استأذن انا بقى
***********************************
في احد الأماكن الهادئه في القاهره
محمد بحده:- انهارده الجمعه عاوز اعرف شغل ايه انهارده
عادل:- اصبر علي رزقك يبني
محمد:- رنيت عليا اتحججت ليهم باي حاجه علشان اخرج ومعرفش صدقه ولا لا
عادل:- يعم فكك، ركز معايا بقى، احنا دلوقتي هنروح للحج الكبير علشان يعرفنا الشغل مجرد ما البضاعة تتسلم هيكون شغلنا خلص وتقدر تروح
محمد:- وهتتسلم في اد ايه مثلا
عادل:- ساعتين مثلا
محمد:- طيب يلا
____________________________________
الرابعه عصرا في فيلا عزت
كريم:- اه يا ولاد ***** بقوا تعملوا دا كله وكمان من غير اي حس ولا خبر
عزت:- لما المحامي حكالي انا انصدمت زيك كدا
كريم:- انا اهه اعرفهم انهم وسخين بس معرفش انهم وسخين بالشكل دا، متوصلش لكدا
تحدث عزت والحزن على ملامحه:- غلط غلطة عمري لما سلمتهم بنتي بايديا دول، ياريت كانوا اتقطعه قبل ما ادهلم
جلس كريم بجواره ثم تحدث بهدوء:- متقولش كدا يا عمو، كل شيء مكتوب والله، واحنا علينا بالدعاء، والدعاء يغير القدر
هدئ عزت قليلا ثم تحدث:- فعلا
كريم:- هااا ناوي تعمل ايه معاهم
عزت:- عاوز اراقبهم
كريم:- بس على حسب كلامك انه كل شغلهم في الشركه
عزت:- ايوه شغلهم بيطلع من الشركه فعلا
"سكت كريم لدقايق"
عزت:- بتفكر في ايه
تحدث كريم وهو شارد:- كنت بفكر بدل يعني ما نتعب نفسنا ونراقبهم رايحين جايين ومفيش اي جديد، احنا نحط وسطيهم عين تراقب المكان
حاول عزت ان يفهم ما يقصده كريم:- قصدك يعني انه احنا نشغل معاهم واحد تبعنا
كريم:- بالظبط يا عمو، وبكدا كل الأخبار هتجلنا اول بأول
عزت:- لا يا كريم انت عاوز تلعب معاهم، وأنا كل اللي عاوزه بنتي تطلق ونعيش في سلام
كريم:- عمو عزت، ركز معايا، كمال حاليا طالب سلمي لبيت الطاعه يعني مجرد شهر منعرفش ايه اللي هيحصل بعديها دا اولا، إنما ثانيا بقى هما عندهم استعداد يعمله اي حاجه علشان ياخده سلمي، ما انت عارف كمال الكلب وعمايله
عزت:- يعني ايه
كريم:- يعني الناس دي مينفعش معاها غير المعامله بالمثل المعامله الشمال اللي زيهم فاحنا هنضطر نبقى شمال زيهم علشان نعرف نعيش في سلام زي ما بتقول
عزت:- وتفتكر دا هيمشي مظبوط ولا هنودي نفسنا في داهيه وخلاص
كريم:- هيمشي مظبوط ان شاء الله، بس انت ادي الاوكاي وسبلي الطلعه دي
عزت:- طلاما سلمي هتكون بخير ماشي
كريم:- كويس اوي، خلينا بقى نفكر مين اللي قلبه جامد ويقدر يكمل اللعبه دي معانا
_____________________________________
في الجانب الاخر في محل البقاله كان يجلس بهدوء تام ويركز في الدفتر ولكن قاطعه صوت شخص ما
منيره بدلع:- السلام عليكم
نظر لمصدر الصوت ثم تحدث بهدوء:- وعليكم السلام، محتاجه ايه
منيره:- عامل ايه
سيف:- بخير، مقولتيش محتاجه ايه
ابتسمت له منيره وهي تقول:- بصراحه قولت اجي اطمن عليك
سيف:- محدش قالك اني تعبان علشان تطمني عليا، اتفضلي امشي بقى
منيره:- انت ليه مضايق كدا ما تهدي
تحدث سيف بحده وضيق:- ما انا مش لاقي سبب مقنع انه يخليكي تيجي هنا
منيره:- يعني علشان بطمن عليك مش مقنع
سيف:- لا مش مقنع بصراحه
قاطع حديثهم دخول سليم وهو يتحدث:- سيف، اخب...
ثم وجهه النظر لمنيره:- اهلا انسه منيره
منيره:- اهلا يا سليم عامل ايه
سليم بضيق:- تمام
بعد ثواني تحدث سليم مره اخرى:- اديها حاجتها يا سيف، محتاج اتكلم معاك شويه
منيره:- لا اخد، عن اذنك، ابقى اجيلك تاني يا سيف
نظر لها سليم بحنق ثم وجهه نظره لسيف:- هي جايه ليه
سيف:- مش عارف
سليم:- ازاي مش عارف
سيف بصوت عالي:- يعني مش عارف، جت معرفش قالت شويه كلام عبيط ومشت
سليم:- خلاص اهدي، انا كنت جاي اقعد معاك شويه
***********************************
في منزل مصطفى وتحديدا "المطبخ"
ملك:- ماما
امال:- نعم
تحدثت ملك بتساؤل:- اومال سلمي فين
امال:- هتلاقيها في الاوضه هتكون فين يعني
ملك:- لا مش موجوده، أنا دخلت اخد دش وطلعت ملقتهاش
امال:- هتلاقيها نزلت تشتري حاجه
ملك:- بس سلمي متعرفش حاجه هنا
امال بقلق:- انتي هتقلقيني ليه يبت
ملك:- ما هي مش موجوده فعلا، هنعمل ايه
امال:- رني على اخوكي اكيد هتكون عنده
تناولت ملك الهاتف وانتظرت ثواني حتى سمعت صوت سيف
ملك:- الو
سيف:- ايوه يا ملك
ملك:- هي سلمي عندك
سيف باستغراب:- لا مش عندي، هي مش موجوده في البيت
قلقت ملك اكتر وتحدثت بتوتر:- لا مش موجوده، هتكون فين يعني
تذكر سيف حديثهم في الصباح فقال بضيق:- هتلاقيها نزلت مع كريم
ملك:- كريم!! اشمعني يعني
سيف:- هي قالتلي الصبح، سلام
لم ينتظر رد ملك وأغلق الخط
سيف بحده:- نزلتي بردوا ومسمعتيش الكلام، ماشي

بعد أقل من ساعه يدخل مصطفى المنزل بارهاق وتعب
ملك بابتسامه:- حمدلله على السلامه
مصطفى:- الله يسلمك يا حبيبتي، اومال سلمي فين
ملك:- سلمي خرجت مع كريم
مصطفى باستغراب:- كريم، كريم لسه شايفه وانا طالع من بيت عزت باشا
خرجت امال من المطبخ على حديثهم:- يعني هتكون راحت فين
مصطفى:- شوفيها عند اخوكي بسرعه
تحدثت ملك بتوتر:- سيف قالي مش موجوده
انصدم مصطفى من هذا الحديث:- يعني ايه، رني عليه خاليه يجي حالا
ملك:- حاضر

"في الجانب الاخر"
في شارع الحاره تنظر حولها بخوف وقلق ولكن تركت خلفها كل شي وغادرت بدأت في السير مره اخرى ولكن دون جدوى تسمع أصوات بداخلها تجعلها تقدم رجل وتأخر رجل
- انتي ازاي ماشيه لوحدك كدا
- لا وكمان مكان متعرفهوش
- لا دا مكانك ولا بيئتك
- مش خايفه على نفسك ولا ايه
- مش وخده بالك من نظرات اللي حوالكي
- وكأنهم عاوزين ينقضه على فريستهم
ولكن وقفت فجأه وهي تضع كفيها على اذنها والدموع تنساب على وجهها بغزاره:- بس، بس، كفايا، كفايا بقى، كفااااايااااا
ولكن فجأه احست بيد تربط على كتفيها انتفضت مسرعا وهي تنظر بخوف
:- ايه اللي موقفك في نص الشارع كدا يا عسل
زاد بكائها:- ممكن ملكش دعوه
:- ماليش دعوه ازاي بس، شكلك محتاجه مساعده، وأنا خدامك
تحدث سلمي بضيق:- بقولك مالكش دعوه سبني كدا
اقترب الشخص منها اكثر وامسك بذراعيها:- ولو مسبتكيش
قالت سلمي من بين شهاقتها:- حرام عليك، سبني ارجوك
ضغط اكتر على ذراعيها وبدأت تبكي خوف ووجع
______________________________________
سيف وهو يغادر المحل مسرعا:- طيب يا ملك جاي اهو، سلام
ولكن اوقفه هذا المشهد الذي صدمه ووقف لثواني يستوعب ماذا يحدث أمامه ولكن لم يطال هذا الصمت كثيرا واسرع سيف في اتجاههم وانقض على هذا الوغد الذي تجرأ ولمس شئ لم يخصه ابدا
انصدمت سلمي عندما رات سيف وهو يمسك بيد هذا الرجل وبدأ في لكمه ورا أخرى
سلمي بدموع:- بس يا سيف، هيموت، بسسسس
تركه عندما رأي الجميع قد تجمع فوجهه نظره لسلمى التي تقف والدموع تنهمر على وجهها امسك بيديها بقوه وسار بها إلى المنزل
سلمي:- ايدي يا سيف، ايدي
لم يسمع لها من شده غضبه بل زاد من مسكته بقوه..

يتبع البارت الحادي عشر

يا ترى مين اللي هيشتغل مع كمال..!!!
سيف هيعمل ايه مع سلمى..!!!

ياريت اللي بيقرأ يقول رأيه🥺♥️