نور الاوسم

النور الاول .

مگابُل رسايلكُم و أغَني
گُواغِد بَس گُواغِد يوجعَني .

....................................
#نور_الاوسم

الكاتبه:تمارا الطائي🤍.

علقو بين الفقرات+ لتنسون التصويت حلواتي🙈❤️
....................................................

امشي بالبيت واحجي ويه نفسي وماحس بكلشي حواليه شنو وشوكت صار كل هذا مجنت متوقعه او مفكرة بيوم من الايام راح يصير كل هذا وتنكلب حياتي جنت اسمع اصواتهم وتركيزي مو يمهم احس كأنما اني بغير عالم...

عقل مشوش
قلب مكسور
روح محطمه

اوجاع تحيط بكل جزء من جسمي احس نفسي غائبه عن الوعي فقط امشي جسد بلا روح وصلت لغرفتي الي صارت ملجئي الوحيد حطيت راسي على المخدة ودموعي تجري على خدي وهاجت عليه اوجاع الذكريات.....

فلاش باك....

تأفأفت بملل واني اشوف نسوان عمامي مثل كل مرة يتعاركن على مود شغل البيت على اتفه الاسباب كل وحدة تذب شغله على الثانيه ويردن يذبن الشغل كله براس وحدة حتى هنه يقظنها طلعه وسوالف والقال والقيل يموتن على النميمه والسوالف مع العلم الشغل جان مقسم على كل وحدة شغله بس محد راضي على احد ولازم هذا السيناريو ينعاد يوميه تركتهم بعد ماخلصت الشغل الي عليه ورحت على غرفتي شفت نمارق كاعدة تقرا كعدت يمها سألتها

سرور: نمارق شنو باجر عندج امتحان؟

جاوبتني وهي حاطه راسها بالكتاب

نمارق: لا ماعندي امتحان بس حفظيات اريد اخلصها

اومأت براسي وبعدها حجينه شويه على المدرسات وسألتني شلون تدريس المدرسات وهكذا...

بوسط كلامي خطر على بالي سؤال وضحكت على عقلي وتفكيري نمارق انتبهت عليه اشرتلي براسها شكو كتلها واني اضحك ع تفكيري

سرور:اكلج الله يعلم زوجي المستقبلي وين هسه هو وشنو جاي يسووي اكيد مشتاقلي

جاوبتني وهي تخزر بيه

نمارق:اسكتي عيب هيج تفكرين لا يسمعج احد

اختفت ضحكتي وسكتت عنها ونمت بفراشي ودرت وجهي

هاي اني واختي هيج علاقتنه ماجنه صديقات مثل باقي الاخوات ولا وحدة تكعد تحجي سرها للثانيه ولا فلانه سوت هيج او فلانه حجت هيج كلامنا بس على الدراسه

حتى اذا جنت ضايجه من شغله مااحجي لاحد والسبب نخاف من اهلنا لانهم معقدين الى درجه ابسط شي من نريد نشتري ملابس ممنوع نطلع امي هي تجيبنه الملابس اقصى طلعه نطلعها هي بالعيد نروح لبيت خالي وهاهيه

بس تعودنه على حياتنه وعلى هذا الشي وصار بالنسبه النه شي عادي لا نطلع ولا نسوي شي

كعدت الصبح واليوم جمعه يعني تجمع العائله مع العلم كلنه عايشين بيت واحد احنه وعمامي لان جدي ميقبل احد يطلع من البيت وكلها كاعدة على اعصابها

لان حياتنه ساعه حبايب وساعه وحدة تحجي على الثانيه وساعه عراك

بس بهذا اليوم العائله كلها تجتمع لان ابويه وعمامي ماعدهم شغل طلعت من الغرفه ونمارق جانت قبلي كاعدة وبعدها غسلت واتريكت واتوجهت اكمل شغلي

لان احنه مقسمين الشغل بينه حتى اني واختي نشتغل تجنبا للحجي والمشاكل التصير.

ومشى اليوم لحد العصر جبنه العصير والكيك لان متعودين نسوي هيج والعائله كلها مجتمعه واحنه نسمعهم يسولفون على اهل قبل وشلون جانت حياتهم ومن جانو صغار وشكد اتئذو لان بوقتها جان اكو حصار والناس حصرة عليها الاكل

مشى الوقت لحد الليل كلمن راح لغرفته ...

ثاني يوم من كعدت الصبح شفت نمارق كاعده تتحضر حتى تروح للمدرسة قبل متطلع باوعت عليه بنضرات ماعرفت افسرها اني بهذا اليوم مرحت للمدرسه

بس تمنيت لو رايحه تمنيت لو مانعتها متروج مجان صار كل هذا الي مجنت متوقعتة بيوم من الايام راح يصير هيج.

ضليت طول اليوم كلبي ناغزني وعندي احساس قوي راح يصير شي

كأنما كلبي يعلم وفعلا صار شي مجنت متخيلا بيوم راح يصير هيج

الساعه ١١ الصبح تقريبا.....

جنت واكفه وجاي اساعد امي بالخبز حتى نخلص من وقت دخل ابويه يصيح وعمامي كلهم يصيحون اصواتهم جانت كلش عاليه ومحد من عدنة يعرف على شنو الصياح وشنو الموضوع وجان اشوفهم لازمين اختي و يجرون بيها كأنما حيوان ويجرون بي وكان وجهها عبارة عن دم

دخلوها بنص الحوش ويكتلون بيها بدم بارد شبعوها كتل

ظليت صافنه وخايفه وكلها جانت خايفه تحجي جنت مااعرف شنو اسوي شنو السبب وليش يكتلوها بهاي الطريقه امي ضلت تبجي و تتوسل بيهم حتى يحجون شنو صاير اخر شي حجه عمي كلمات خلتنه كلنه مصدومين وماممكن يخطر على بالنه كال

لكيتها ويه واحد...

يتبع.....

وللحكايه بقيه...

............................
بقلمي:تمارا الطائي 🤍.
...........................................

حلواتي البارت الاول قصير ك بدايه للقصه شنو رئيكم بالبارت ؟وايضا انطوني رئيكم بالسرد ؟ ولتنسون التصويت والتعليق بين الفقرات خلي اشوف تفاعلكم الحلو عمري ❤️.

حسابي ع الانستا تابعوني حتى تعرفون كلشي انزله بخصوص القصه او اي سؤال حابين تسئلوني 🤍.

@tamara_altai.15