بسمِ من خَلق الشمس والقمر
المهدي حاضر 🤍
--------------------
يوم ثاني گاعدة عصرية بالحديقة اقرا كتاب هدالي إياه اخوي محمد عن طريق علاوي، حوّله الفلوس ووصاه يشتري الكتاب لأن هو مسافر بالهند
اجتي يمّي بيبي وماما فرشن حصيرة بالگاع مثل ما رادت بيبي وگعدن ياكلن كعك وچاي وأني گاعدة على المرجوحة تناوشتلي كعك وچاي وتربعت وگعدت أكل، سألتني بيبي: هاي شنو يمّة الجاي تقرينه؟
- بيبي هذا كتاب دزاه حمودي إلية هديّة نجاحي.
- صدگ عمّة وليدچ شصار وياه بالهند؟
- والله يا عمّة مرته مثل ما هيَ هالمرض ميقبل يتركها وهناك باقين بالهند.
- الله يعينها هالبنية النوب فدوة شگد حلوة وصغيرونة وينها وين المرض؟
- إي والله يا عمّة درّة وما شفنا منها إلا كُل خير بس ما حظينا بيها هواي يا حسرة!!
تذكرت أوّل أيامها شلون چانت هادئة حيل وما إلها صوت ومن نگعد سوا نرجع مثل الجهال الصغار بسوالفنا ولعبنا...
- آرينا
- ها عيوني!
- سولفيلي عن مدينتچ.
- اوه مدينتي، مدينتي حلوة بالهند، چان بيتنا مفتوح للجيران، ناس تطب على ناس وهيچ يعني، بيتنا صغيروني على گدنا أني وماما بس.. چنّا بمنطقة شعبية والعَرض واحد فاهمة شلون؟ بس أبد ما بيناتنا مشاكل وواحد يحب الثاني ويتواصل وياه.
چنّا هواية نروح لمنطقة المسلمين، هاي منطقة بيها هواية جوامع مسلمين وهواية ناس محجبة وصوت الأذان لو قراءة القرآن يا الله شگد ارتاحله واحبّه هواية.
سكتت والنوب اردفت بألم وخجل: وتعرفين بعد چنّا من جماعة عبادة البقر...
غطت عيونها بكفها وهتفت: استغفر الله ما اعرف شلون چنت هيچي أبد؟ أعبد بقر!
يال السخرية النوب هايشة أني أعبد هايشة وأفضّلها على الله تبارك وتعالى، يا الله!
- الحمد لله من تعرفتي على محمد.
- كل الحمد لچ والله حمودي إجالي رحمة ونور نقذني من الكنت بيه.
- ممشتاقة لأمّچ؟ جيّة محمد إلچ وإنقاذچ من الحضيض الچنتِ بيه بعّدچ عن أمچ.
- أكو واحد ميشتاق لأمّه؟ بس شسوي؟ غضبت عليَّ شلون ما أعبد إلـٰهها، بس غضبها ميوكل خبز تريدني أبقى أعبد البقرة مالتهم لو أموت، ما انسى تهديدها بأن تتركني ومتعتبرني عايشة إذا صرت مسلمة بس ميخالف.
وهسّة أني يا خديجة ملك إسلامي يا خديجة ملك لإسلامي ديني الحنيف، كل شي يروح فدوة لدين حبيب الله صلّى الله عليه وآله.
صدگ چانت بنيّة حبابة وطيبة وحلوة، چانت صديقة وأخت ومحّد ميحبها نوبات من تزعل وتطنگر من أخوية تگوم ترطن عليه بالهندي هوَ منشوفه بس فاتح عيونه مصدوم وكلشي منفهم منها أبد، المضحك بالشغلة كرار أخوية گام يتعلم هندي ويگعد يشجعها بالهندي حتى مرّة من المرّات محمد ضرب كرار بوكس على حلگه علمود يسكت، هوَ مو قوّي خفيف بس علمود يسكت وجر آرينا ووداها للغرفة ويگلها "هنا چلب سايب يا ويلچ تختلطين بيه".
أنت تقرأ
خديجة
Teen Fictionرواية بنت ذات الخمس عَشرة سنةً، مراهقة لم تحظى بما يلائِمها كمراهقة من كلماتٍ وأقوال تنفعها في هذا السّن وقد تسبب ذلك بخطئ فادِح منها لم تنتبه لعواقبه.
