بِسمِ الله القادِر على كلِ شيء
صاحب الزمان حاضِر
-----------------
بعد يوم نايمة بفراشي الصبح ومتنعمة بالنومة ما أحس إلا صوت كرار فوگ راسي وهوَ يشيل اللحاف من عليَّ والمخدة من جوّة راسي، صحت وأني أضم راسي بالمندر
- كرار، عوفني نايمة!
جرني من رجليَّ
- ترى اروح للمكتبة وحدي.
طفرت بسرعة
- مكتبتيش؟
ابتسم بخباثة
- مو تريدين تروحين تشترين كتب؟
گمت واني امسح بعيوني
- هاي هيَّ هسّة دقايق وتلگاني جاهزة.
طلعت قبله بسرعة للحمام... بدقايق كملت تبديلي وأمي ما شفتها چان صوتهم بالمطبخ ديتريگون كلهم
طبيت للمطبخ
- صباح الخير.
الكل جاوبوني، أمي گلّت لكرار بتحذير وهي تباوعله: دربالك مو أي شي تخليها تشتري معايزنا تتخبل علينا بعد!
ردتها بيبي وهي كلش منزعجة: أنتِ متگليلي شبيچ ويّا البنيّة خليها تقرا كل شي شرايدة منها چا شلون تتثقف؟
- عمّة على بختچ چا ششايفتني أني همجيّة وأمنعها تقرا مو ذاك محمد يقرا منعناه شي؟ بس ما اريدها تصير مثل ذولي ال...!
- دسكتي سكتي..
سكتتها بيبي باوعت لأمي وحاچيتها: ترى حمودي عنده هواية كتب دينية ونفسهن الكتب الوصتني عليهن البنيّة لگيتهن عند محمد.
- لعد إلمن رايحة؟
سأل علي وهو ينزّل گلاص الچاي للسفرة وعينه عليه
جاوبته: رايحة اشتري كتاب او رواية التهي بيه مو والله طگت روحي من الگعدة.
چان نقاش مُر بالنسبة إلي تمنيت نخلّص بسرعة ونطلع الحمد لله والشكر ابوية گلّ لكرار هوَ ياخذني لأن علي يومه بسنة، لازم يكمّل مظهره الخارجي واناقته يلّا يطلع يعني احنا والظهر بس كرار عكسه سريع وصحيح يهتم بمظهره بس مو بملحة مثل علاوي.
طلعنا تقريباً بثمانية سوية احنا وعلي ويانا رايح هوَ لشغله، گعدوا يسولفون بقصّة واحد من معارفنا طلع متزوج بالسر وزوجته متدري وعنده ٣ ولد صغار بالعمر وبس اهله يعرفون وهسّة انتشر خبره..
حچه علي منفعل وهو مخنزر: وعلي لو الزمه أكسره تكسر ميصير هيچ يسوّي عنده مرة وجهال شنو مقصرة مرته وياه؟ وحتى لو مقصرة چان لازم يحترم العِشرة ولخاطر الجهال!
عوج حلگه كرار
- أهي علينا يا خيي أنت شعليك؟ أنت شدخلك؟ سوالف بيوت، احتمال مرته مقصرة وياه ومتنطيه حقوقه كاملةً أحتمال مبهذلة أحتمال متحترمه واحتمال واحتمال...
- كُل الدتذكرهن چنّك مشايفها للمرة، نسيت نسيت من چنّا نروحلهم شلون تستقبلنا بلطافة شلون طيبة وكريمة ونظيفة؟
أنت تقرأ
خديجة
Подростковая литератураرواية بنت ذات الخمس عَشرة سنةً، مراهقة لم تحظى بما يلائِمها كمراهقة من كلماتٍ وأقوال تنفعها في هذا السّن وقد تسبب ذلك بخطئ فادِح منها لم تنتبه لعواقبه.
