العيب في بَنِي آدم | مُحاولة سيطرة |

" تحرك الشهوة " ١٢

هل تُقبل التوبة بعد الآثام .. فأنا صاحب الوسوسة حصنتُ نفسي لكي لا تطولِك ، كمُحارب نزل إلىٰ النزالِ بسيفهِ بعد ما كان صاحب الساحةِ كي تكوني منالُه ، النفس لأمارةٍ ولكني سأحبس أنفاسي كي لا يمسّك السوء ولكني مُرحب لكي أنالُه.. إن النفس لضيعفةٍ وشهاوتها تهجُم .. وأنا في ضُعفِ النفسِ وما بيدي سوا المُقاومة لكي أنولِك

بعد أن أخذها وذهبوا بعيدًا عنهم ظلّوا يتجولوا في أماكن كثيرة وكل ما تُشير عليه "سلمى" يأتي لها في الحال

- عوف هو أنتَ عُمرك ما حبيت قبل كده

اخرج صوت مِن فمهِ يدل علىٰ الرفضِ فأكملت وهى تسأله بدهشةٍ :

- إزاي ده أنتَ مُز يابني هى البنات أتعمت ولا إيه

فنظر لها وسألها بخُبث :

= أنتِ بتعكسيني ولا إيه

فتحرجت "سلمى" وردت عليه وهى تُتهته :

- لا أع ... أعاكس إيه بس

= خلاص خلاص متتوتريش كده أنا بهزر معاكي

وأكمل كلامه بعد أن جلسوا علىٰ الرمالِ :

= بُصي يا ستي مِن وأنا صغير وأنا مش شايف حد في حياتي غير أُمي زي ما تقولي كده أبويا مكنش له دور في حياتي غير إنه يصرف وبس فأُمي هى إللي واخدة كل الأدوار في حياتي أب بقى وأُم وأخت وصاحب هى إللي علمتني

كُل حاجة وكُنت معرفش أمشي مِن غيرها ... دروس تيجي وتودي ، خناقة في مدرسة تروح تتصرف و تفُضها ، دعم وضهر على طول موجودة يعني ببساطة كده أنا خصصت حياتي كُلها فيها هى لغاية ما بدأت أكبر ودخلت ثانوي أتعرفت على شوية عيال منهم لله لعبوا في دماغي وشدوني في سكتهم بكلام أنتَ راجل وكبرت مينفعش أُمك تفضل تجيبك وتوديك

دماغي أتشتت وهم عرفوا يلعبوها صح وفعلًا مرة على مرة مبقتش أحب خنقة أُمي ليّا ووقفت أُدمها بس بالراحة يعني فهمتها إن أنا كبرت ومبقتش عيل عشان تجيبني وتوديني وفعلًا سمعت كلامي وأدتني حُريتي

ڤسألتهُ "سلمى" وهى تنظُر له بإهتمام :

- هاا وبعدين

أكمل كلامه وهو يتنهد :

= أنا أستغليت الحرية دي غلط أو زي ما تقولي مشيت مع التيار بقيت مع العيال البايظة دي وكنت شايفهم صُحابي في مرة على مرة بدأت أخد على الجو يعني أخد فلوس الدورس وأكُت منها والدراسة أهملتها بعد ما كُنت مِن الأوائل وبقيت مع العيال دي على طول وفي خروجة مِن بتوعنا لغيت بت وأتكلمنا أو بمعنى أصح مشينا مع بعض وهم كانوا بيبخوا سمهم في وداني إني أمسك إيديها وأحضنها لغاية ما حصل وحضنتها

ويومها روحت لقيت أُمي قاعدة ومضايقة وأول ما دخلت سألتها مالك قالتلي إن المُدرسين بيشتكوا مني ومستوايا نزل ودرجاتي بتاعة امتحانات الشهر كُلها زفت وكمان أم البت دي طلعت جارتنا والبت حكت إللي عملته وراحوا اشتكوا لأُمي