.............
بنلتقي وبعلمك ان الشوق ماهو حكي
...............
يوم الاحد الساعه 7:30 صباح
في احد بيوت الحي الراقي ، طلع من غرفته وبيده جواله ويتكلم مع سكرتيره :- قلت لك أجل الاجتماع اليوم بنروح لسدن
سمع رده وقفل منه ونزل الدرج بخطوات هاديه لحد ما قرب من الطاوله اللي فيها اطباق كثيره واكياس وبعض المشروبات الصحيه
التفت على اخته اللي قربت وهي تنزل القهوه والشاي و لابسه عبايتها تناظره بابتسامه :- بتروح معنا صح! المره اللي فاتت زعل منك
ابتسم وقرب منها وهو يبوس راسها :- اكيد بروح ولدي مشتاق له الا وين عيالي؟
ضحك لما سمع صراخ ولده عمر وهو ينزل من الدرج بسرعه ويضم ابوه وهو ما يوصل لفخذه حتى :- بابا شوفها تبي تسحب خدودي
ابتسم ومد يده لولده اللي بسرعه رفع يدينه وشاله وباس خدوده وعضها :- اي محد يلمس خدودك غيري صح يا بابا؟
ابتسم عمر وحمرت خدوده باحراج وتمسك فيه دافن وجهه برقبته لما سمع صوت اخته وهي تناديه ومعصبه :- عموره ليش تاخذ عطري هاه؟
ناظره ابوه ينتظر جوابه التفت براسه يطالع اخته وابتسم بلطف :- عشان تصير ريحتي حلوه مثل ريمي
ابتسمت ريم و ناظرت ابوها وقربت من عمتها وضمته :- امي شوفيه كل ما شاف عموره نسى بنته ريم
ضحكت عمتها خلود وباست خدها ومسكت يدها يمشون لبرا بعد ما بدوا الخدم ياخذون الاغراض ويحطونها بالسياره :- حبيبتي كل الرجال كذا خليك منهم
التفت ريم تناظر ابوها اللي يلحقهم وهو يدغدغ بطن عمر وميت ضحك على تعابيره :- الله يخليه لنا
ابتسمت خلود وناظرتها فجاه :- لحظه ناقصنا احد وين اخوك؟
توترت ريم لما شافت ابوها فجاه وقف ولف يناظرها ، ابتسمت تفكر بعذر بس تنهدت لما ابوها قرب منها وهو يمسك اذنها ويسحبها :- اعترفي وينه وين نايم السربوت؟
مسكت يد ابوها وهي تهديه :- بابا هو سهر عند عمي محمد ونام عنده لما تأخر الوقت
همهم ابوها وتركها ومشى للسياره ونزل عمر بالكرسي الخاص فيه وناظر خلود اللي ركبت بعد ريم وجلست جنبها وسكرت الباب :- اذا دريت انه رجع لسربته محد بيفكه من يدي
ريم ناظرت عمتها بتوتر وخلود تأشر لها تهدا وابتسمت لما التفت عليها اخوها يناظر بتركيز
