جنون تخطي الحدود

7- الـمـزرعـه

كانت ديانا قاعده في الجنينه وسانده على شجره على الأرض وبتشرب نسكافيه بكل روقان حست بعدي بيحط رأسه على رجليها وشد ايدها وحطها على شعره وهي ابتسمت وبدأت تلعب في شعره بكل طفوله
'' صحيت امتا انت سهرت امبارح في الشغل ''
عدي/ من ربع ساعه فين طيف
ديانا: عند جدها وجدتها
عدي رفع عيونه ليها وقال: انا بعشق ابص لعيون طيف علشان شبه عيونك يا نجمتي
ديانا: لا متبصش لعيون طيف بص لعيوني انا
عدي بضحك: انتي بتغيري من بنتك يا ديانا
ديانا: ومغيرش ليه ده انت بتغير عليا من ابويا وجدي انت تملكك بقى شديد وحاول تقلل ده ماشي
عدي: مقدرش غصب عني لما اشوف حد غيري بيحضنك بحس بنار في قلبي مش بستحمل حد يقرب منك
ديانا: وانا واحده مش بتحب حد يتحكم فيها
عدي كشر وديانا ميلت برأسها وسندتها على راسه وقالت بحب
'' بس بشكل غريب انا بحب غيرتك وبعشقك شخصيا ''
عدي ابتسم ليها ولسه هيبوسها بعدت رأسها بسرعه وقالت
'' صحيح شغف اتصلت عليا تقولي اني جد وجده مالك عزمينا احنا والباقي يومين عندهم في المزرعه ومالك اتصل بيك بس تليفونك كان مغلق ''
عدي ابتسم بمكر: حضري الشنط وانا هجيب طيف واجي
ديانا بعدم راحه لابتسامته: ماشي
           ~~~~~~~~~~~~~~~~
عند رسيل كانت بتصرخ بأعلى صوتها بسبب ابنها
'' فارس يا ابن الجذمه انت فين يلاه ''
رسيل فتحت اوضه فارس لقيت فهد نايم علي بطنه وهو عاري الصدر بس اللي خلاها تفتح بوقها من الذهول أنه فارس نايم جنبه وهو قالع تيشرته ونايم على بطنه
'' وده ايه ده أن شاء الله فهد ونسخته المصغره .... كملت بغيظ انتوا الجوز اصحوا هنتاخر ورانا طريق سفر طويل ''
راحتي وهزت فهد: يا فهد قوم كفايه نوم أدى فضلت سهران انت وابنك على البلايستيشن وفي الاخر سايبين الصاله مزبله حتي التليفزيون سيبتوا شغال انت يا عم انت
فارس بنوم: يا بابا طفى المنبه ده بقى
رسيل قلعت شبشبها بعصبيه: منبه يا ابن الـ....
فهد شدها فوقعت في النص ما بينهم وفهد شدها لحضنه اوي وفارس حضنها من الناحيه التانيه
رسيل: وده ايه ده كمان هنتاخر يا كسول انت وهو قوموا
فهد: اششش نامي يا رسيل
رسيل: وانا مش عايزه انام هنتاخر يا جدعان سيبوني انتوا مكلبشين فيا كده ليه وكمان قالعين من فوق هتاخدوا برد وانا اللي هتنيل اسهر عليكم
فارس: مش انتي طب يا ماما خلاص بقى دي وظيفتك
رسيل بغضب: وحياتك امك ده ابوك مش راضي يخليني ارجع اشتغل ولا حتى اسافر
فهد: بس يا رسيل بلاش نفتح موضوع الشغل من تاني
رسيل اتعدلت: يا فهد انا خلاص بقيت كويسه ليه مرجعش اشتغل من تاني
فارس: معاها حق مترجع الشغل من تاني رغم اني مش عارف انتوا بتتكلموا عن ايه
فهد: علشان انا خايف يحصلك حاجه مش هسامح نفسي لو خسرتك
فارس: معاه حق رغم اني مش فاهم الجمله بس معاه حق
رسيل: طب بلاش ده ارجع للطب من تاني
فارس: اسمع منها الطب مش خطر
فهد سكت شويه هو خايف عليها ليحصلها حاجه فقال
'' هتضطري تسافري برا وهتنشغلي عني انا وفارس''
فارس: لا بجد اقنعني اسمعي منه
رسيل وفهد بصوا لفارس وقال بغباء: فيه يا جدعان بتبصولي كده ليه هو فيه حاجه فوق شعري
رسيل اخدت الشبشب بتاعها: وحيات امك عاملي فيها مذيع الماتش
فارس نط وطلع يجري لبرا وهو بيصرخ: اهدي يا منار مش كده يا اختي الحقني يا عم ياللي اسمك ابويا
           ~~~~~~~~~~~~~~~~
في إيطاليا صحيت نغم وهي حاطه ايدها على رأسها بوجع
'' اااااااه يا دماغي هو فيه قطر عدي على دماغي ولا ايه''
رحيم: لا ده فيه كلام كتير لازم يتقال وأولهم انتي بتشربي من امتا
نغم: اشرب أيه الخمر حرام اصلا
رحيم رفع حاجبه: وطالما عارفه انه حرام شاربه ازازه كامله لوحدك ليه يا بنت الصياد
نغم: ازازه ايه وخمره ايه وربنا ما شربت حاجه امبارح غير مياه بتلسع
رحيم: انتي عارفه المياه اللي بتلسع دي أقوى نوع خمور موجود وانتي حضرتك شربتي واتصطلتي وفضلتي تصرخ زي المجانين وفي الاخر فتحتي دماغ واحد
نغم بغباء: وهي من امتا الخمره زي المياه مش كانت صفراء وفي ازايز خضراء كده دي اللي في شارع الهرم
رحيم بذهول: ده كل اللي خدتي بالك منه وسط المحاضره اللي انا قولتها دي
نغم: اصل انا مش مقتنعه بباقي الكلام بصراحه
رحيم أبتسمت بمكر: اممم مكنتش اعرف انك نفسك تتباسي يا نغم
نغم شهقت بقوه ده معناه إنه كان بيتكلم بجد لأنها طول عمرها بتقول ان شكلها هتموت قبل ما حدث يبوسها شدت اللحاف وضمته لصدرها بطريقه مضحكه لما سمعت كلامه التاني
'' طب كنتي قولي انا في الخدمه دايما ''
نغم وشها احمر: اطلع برا يا متحرش يا مغتصب
رحيم بضحك: مغتصب أيه هو انا قربت منك اصلا وبعدين قومي هنسافر مصر
نغم: لا متقولش هتطلقني
رحيم: لا بس مالك عازمني عند مزرعه جده قومي البسي
نغم ابتسمت ابتسامه عريضه: مزرعه يعني شجر وفواكه وخيل وطبيعة اخيرا الواحد هيشم هواء نضيف
رحيم مشي وهو بيضحك عليها :اااه يا مجنونه
           ~~~~~~~~~~~~~~~~
وصل الكل للمزرعه وكان في استقبالهم رجل كبير في السن يبدو عليه الوقار والطيبه وبجانبها سيده تبدو عليها البشاشة جري عليهم مازن ورعد
'' جدو ''
علاء ضحك وحضنهم وباقي الأطفال جريوا عليه
'' يا لهوي انا اول مره اشوف عيال كتير كانوا عيالكم انتوا بتستحملوا جناته ازاي''
ريان: كده يا جدو علاء ده احنا حتى بنقول انت اللي فيهم
الجده: طول عمرك بكاش يا ريان
شغف: فريال حبيبه قلبي وحشاني
الجده: انا لحد دلوقتي مش فاهمه ايه سر حبك لاسم فريال مع انك عرفتي أني اسمي ليلى مش فريال
مالك حط ايده على كتف شغف: معلش يا جدتي اصل عندها ذكريات مع الاسم
علاء' ايه ده فيه شخص جديد أضّاف
ملك: اصل عقبالك كده رحيم اتجوز ودي مراته نغم
ليلى: وعقباله ليه اومال انا روحت فين
البنات باسي: شكلك هتتركني على الرف يا ليلو
سليم: لآ بقولكم ايه شغل الشعلله ده أبدوا متأخر احنا لسه حتى مقعدناش
علاء: طب اطلعوا ارتاحوا من الطريق
نغم: ااااه والله الطريق متعب اوي انا مش حاسه بضهري انتوا ساكنين في آخر الدنيا كده ليه
ليلي بضحك: شكلها شبهكم يا بنات وعسل اوي
نغم: والله انتي اللي عسل
طلع الكل يرتاح من الطريق نروح بقى عند عصابتنا الصغيره كانوا واقفين عند الاصطبل وبيبصوا يمين وشمال كأنهم حراميه
طيف: الكلاب دول اتاخروا كده ليه
غرام: اكيد اتقفشوا
اسيا: لا اهم جم
وصل فارس وغيث وعمار
أنس: ايه يا عم انت وهو اتاخرتوا كده ليه قولنا إنكم اتمسكتوا
عمار: اسكت يا عم لوله كانت هتشوفنا بس الحمد لله فلتنا
ريان: المهم جبتوا الحاجه ولا روحتوا وجيتوا على الفاضي
فارس: لا عيب ده احنا معانا ابو الغيوث احسن حرامي فيكي يا مصر
غيث بغرور مضحك' مش عارف مين غيري كنتو هتعملوا أيه
اسيا: يا عم اتنيل المهم امتا هنفذ
لين: خليها بعد الغداء يكونوا اتغدوا وشربوا الشاي بلاش نخضهم وهما تعبانين دلوقتي
أحمد: لا با بت حنينيه
لين: حد يسكت الواد ده كل ما بيتكلم بيعصبني
رعد: اسكت يا عم الحج خلي المصيبه تعدي على خير
أحمد' والله احنا هنتشلوح بسببكم
طيف: بقولك ايه يا ابو حميد لو خايف أطلع برا
أحمد: اطلع برا فين احنا برا اصلا
طيف: تصدق ايه الغباء ده
           ~~~~~~~~~~~~~~~~
عند جين وسليم
خرجت جين من الحمام ووقفت قدام المرايا تنشف شعرها وعيونها على سليم اللي كان فارد جسمه على السرير وسرحان
'' مالك يا سليم انت كويس''
سليم بصلها: ها ااه كويس
جين قعدت جنبه: مش على صقر مالك
سليم ابتسم ليها: انا كل يوم بسأل نفسي ايه الحلو اللي عملته في حياتي علشان ربنا يرزقني بيكي
جين: انا هي من رُزقت بك لتخرجني من ظلام حياتي المهم جبت الهدايا انت والقوم التانين
سليم: ايوه بس انا مش فاهم انتي ليه رافضه تقوليلي اللبس شكله ايه
جين: لا عيب متقولش كده لصقر الاقتصاد اصبر بس هو كله بكره وهتعرف
سليم: ربنا يستر لاني مش بطمن لتصاميمك
جين ابتسمت ابتسامه عريضه ودخلت نفسها في حضنه
'' لا متخافش''
سليم: انتي هتنامي ولا ايه؟؟!!
جين غمضت عيونها: ايوه تعبت شويه من الطريق ابقى ادينا مخدر لما نرجع علشان مش عايزه اجرب الشعور ده تاني
           ~~~~~~~~~~~~~~~~
بعد ساعه كان البنات فى المطبخ بيحطوا الأكل على السفره والشباب برا ملك قبل ما تدخل لقيت حد شدها وما كان الا مروان فقال ببلاهه
'' ايه يا ابو العيال ماسكني كده ليه''
مروان خط صوابعه على شفايفها: ايه ده
ملك: ايه وربنا ما اعرف
مروان: يا سلام اومال ايه اللون ده
ملك كأنها تذكرت شئ: اوبا تصدق نسيت دي لوله كانت ادتني الروج ده وقالت اجربه وانا نسيت اشيله
مروان رفع حاجبه: لوله اللي بقى عندها 75 سنه جابتلك روج
ملك: ايه ده انت مش مصدقني
مروان ببرود: لا
ملك: احم احم طب وسع كده منظرها مش لطيف على فكره واحنا كده
مروان قرب منها بمكر :وفيها ايه هؤلاء انتي مش مراتي والكل عارف ولا ايه
ملك بتوتر: مروان عيب عندنا بيت يلمنا
اتفزع الاتنين على صوت بيقول: انا مش فاهمه امك بتتكسف بعد 5 سنين جواز ازاي طيب
عمار ضربها على قفاها: يا جذمه كان خلاص هيبوس كمل كمل يا بابا عادي ولا اكننا هنا
ملك بصت له بغيظ: عاجبك كده ولادك بقيوا منحرفين زيك
مروان: وانا مالي انا
لين: يا عم الحج بوسها وخلص اعتبرنا هواء
ملك: وحيات امك طب تعالوا
مروان ضحك وشد ملك وباسها بسرعه ومشى وهو لسه بيضحك على ملامح ملك المصدومه
عمار ولين سقفوا: الله سكتها في ثانيتين بس وربنا مروان ده معلم واحنا منه نتعلم
ملك خلعت الكوتشي بتاعها وطلعت تجرى وراهم
          .....................................
بعد الغداء راح الكل الاصطبل وقال علاء: برضو يا بنات مش هتركبوا خيل
البنات: لأ طبعا
نغم: لا ليه هو انتوا بتخافوا من الخيل ولا ايه
شغف بصلها بعيون ضيقه: به اوعي تكوني بتحبيه تركبي خيل
نغم بغباء: اه عادي
مالك: شوفتوا مش جبانه زيكم اهي
شمس: لا احنا مش جبناء
سيف: بجد طب يلا نتسابق
شمس بخوف: لا يعم الحج يا روح ما بعدك روح مش هركب
ديانا: ايه ده صح نسيت طيف كانت عايزاني
طيف من وراها: نعم يا ماما
ديانا بغيظ: أيه اللي جابك دلوقتي يا بت الجذمه مش تستنى شويه
بعد دقيقه
عشق بصراخ ومراد بيحاول يشدها
'' لا لا يا مراد حرام عليك تعمل فيا كده ''
أحمد: فيه ايه يا ماما ده انتي بس هتركبي حصان هو هيركبك سمكه قرش
شغف: مش عايزه هو بالعافيه يا مالك
مالك بغيظ: يعني انتي هتفضلي خايفه من الحصنه كتير
رعد: اول مره اشوفك جبانه يا ماما
آسيا: يا جدعان في أيه دي مجرد حصنه ايه الخوف في كده
رسيل: اخرسي يا بت سيف انتي مش نقصاكي
آسيا: انا غلطانه يلا يا عصابه
الأطفال: يلا يا اسطا
نغم كانت راكبه علي الحصان وهي بتضحك: يا جدعان وربنا ما بتعض
شمس: لأ برضو سيبني يا سيف هو بالعافيه
ليلى: بضحك يا بنات كفايه خوف طيب جربوا 10 دقايق بس ووعد لو خوفتوا الشباب هينزلوكم
البنات بشك: بجد
الشباب: اااه والله
نغم: الحمد لله اقنعوهم يلا يا عم الحج نعمل سباق
رحيم: مين ده
نغم: انت ولا تكونش زيهم وخايف انت كمان
رحيم بصلها بتحدى وركب الحصان: هتخسري يا نغم
نغم بتحدى هى كمان: هنشوف
بعد شويه كانت شمس راكبه الحصان قدام سيف وهو ماسكها كويس علشان متوقعش
شمس: يا عم هدى شويه هنتنطر من فوق الحصان
سيف: أعتبريها عربيه وبتسوقي بسرعه
شمس: بس ده حصان كائن حي مش عربيه
سيف زود سرعه الحصان اكتر وشمس صرخت
"نزلني نزلني بالله عليك نزلني"
سيف بحركه سريعه منه لف شمس بقى وشها لوشه وهي دفنت رأسها في صدره وهو قال بحنان
'' بصيلي يا مليكه ومتخافيش ''
شمس: لا لا لا هدي السرعه الأول
سيف وقف الحصان خالص وقال: خلاص أهو فتحي عيونك بقى
شمس خرجت من حضنه وفتحت عيونها وبصت حواليها وشافت الطبيعه من حواليها قد اي جميلة وكان فيه شجر وبحيره صغيره فقالت
'' أين المكان ده يآ سيف هو احنا خرجنا برا المزرعة ولا ايه''
سيف نزل ونزلها: ايوه كنت عايز المره اللي فاتت اجيبك هنا بس انتي رفضتي تركبي حصان والمكان بعيد كنا هنمشي كتير
شمس ابتسمت وغمضت عيونها باستمتاع بالهواء وسيف فك شعرها فنزل والهواء ابتدا يحرك فيه وسيف بيتأملها وعيونه بتلمع بعشق ليها
شمس بمرح: طب اتأمل المنظر بتتأملني انا ليه
سيف ابتسم: زرقة عيونك تنافس زرقه السماء وبياض بشرتك ينافس الثلج وشعرك الأحمر أفضل من مشاهده الغروب الذي يتحول إلى شفقٍ احمر وصوتك أجمل من صوت تلك العصافير باختصار انتي أفضل شئ اتامله بهذا الكون ارنوبي
شمس بضحك: ايوه قولي ارنوبي إنا بحب الاسم ده
سيف: يعني بعد ده كله مسكتي في الكلمه الاخيره
شمس: طب انت عايزني ارد على غزلك اقولك ايه استنى استنى اقول احم احم عيونك يا حبيبي أفضل من السماء الغائمه اصل انا في الآخر بحب المطر
سيف هز رأسه بقله حيله وقال: انتي ناجحه في كل حاجه الا الرومانسيه فاشله فيها يا شمس
شمس: الله وانا مالي دي الكاتبه مش انا وبعدين ما انا سيبالك خانه الرومانسيه اهو قول فيها اللي انت عايزه
سيف ضحك عليها شمس هي شمس ومستحيل تتغير
           ~~~~~~~~~~~~~~~~
أما عند ثنائي التحدي دول
كانت نغم بتحاول تسبق رحيم بس مش عارفة فصرخت مره واحده وقالت
'' اللحقني يا رحيم ''
رحيم وقف بسرعه وبص وراه بس نغم عدت من جنبه بسرعة شديده وقالت بضحك
'' تعيش وتاخد غيرها يا ابو النمور ''
رحيم: ألله يخربيت جنانك
نغم فازت طبعا بالغش وقالت وهي بتحرك كتافها يمين وشمال وهي بتغني
'' فوزت انا فوزت ايوه انا فوزت هاااي''
رحيم: فايزه بالغش يا نغم
نغم بغرور: اسمى فوزت برضو
رحيم: طب يا ستي عايزه ايه
نغم: اممم مش عارفه خلاص هسالك سؤال وتجاوب بصدق ماشي
رحيم: ماشي.
نغم: حبيت قبل كده؟؟؟!
رحيم سكت شويه: ايوه
نغم حست بضيق وقالت: ولو حبتيها متجوزتهاش ليه
رحيم: ملناش نصيب في بعض
نغم: وهى فين دلوقتي وهل يعني كانت بتحبك
رحيم: هى فين فاتجوزت اما بقى حبيتني ولا لا فهي حببتني زي اخوها
نغم: هي مين دي
رحيم قلق لتتضايق من شمس لو عرفت انها هي فقالت
'' متشغليش دماغك بالموضوع ده انا اتضح ليا اني كنت بحبها زى اختي ها بقى عندك اسأله تانيه''
نغم حست إنه بيخبي عليها: لا
رحيم: يلا نرجع قبل الغروب
نغم هزت دماغها ورجعوا الاصطبل تاني والكل رجع بس سمعوا صوت صراخ الأطفال فجريوا بسرعه بخوف ليكون حصلهم حاجه وصلوا بسرعه وكان اولهم سليم وفهد وأول ما وصلوا اتزحلقوا وجين ورسيل ملحقوش يوقفوا ووقعوا فوقيهم وعشق كانت هتقع بس مراد مسكها بسرعه بس يا عيني عدي خبط فيه فوقعوا كلهم وسيف شد شمس قبل ما تقع وشالها وهي صرخت
'' اوعي توقعني يا سيف ''
أما مالك وشغف قعدوا يضحكوا عليهم بس للأسف
ديانا بصراخ: حاسبي
شغف وقعت ومالك وقع فوقيها
شغف بصراخ: يا لهوااااي ضهري يا مالك يا ابن ام مالك
فضلوا كده دقايق طويله كل من يقوموا يقعوا تاني ورحيم ونغم واقفين على بعد منهم ورحيم خايف يقرب منهم يقع بسبب الزيت الكتير اللي على الارض اما نغم فهي من كتر الضحك وقعت على الأرض ظهر الأطفال وكانت آسيا ماسكه كاميرا
لين بصوت عالي: يلا يا جدعان كله يقول تشيز للكاميرا
نغم شاورت عليهم: ولادكم العفاريت هما السبب
قبل ما حد يقوم كانوا شهقوا بفزع بسبب أحمد اللي كانت ماسك خرطوم المياه وشغلوا عليهم
شمس بصراخ: يا احمد يا ابن الجذمه هقوم اقتلك انت وامك
أحمد بصوت عالي: ده جزاتي يعني علشان بخلي الزيت يختفي من الأرض علشان تعرفوا تقوموا
رحيم بضحك: والله الواد ده يعرف يفكر وينفذ انا بقالي ربع ساعة واقف افكر أجيب الخرطوم ولا لأ
نغم: طب كنت قولتلي كنت جبتوا انا اعاااااااا
صرخت نغم بسبب المياه اللي غرقتها هي ورحيم من نفس الخرطوم بس كان اللي ماسكه ريان وغرام
غرام: أصله اشمعنا هما يعني يتعمل فيهم المقلب وانتوا لأ
عشق: اديلهم يآ غرام انتي كده بنتي
سيف بص للعيال وقال: مين الجذمه صاحب الفكره دي وعارفه لو انتي يا آسيا هربطك في الشجره للصبح
آسيا بسرعه: وربنا ما أنا ده أنس
سليم خلع جذمته اللي كلها بقيت مياه وطلع يجري وراء أنس
'' يومك اسود يا انس الكلب وربنا لانفخك''
أنس طلع يجري بكل قوته وهو بيصرخ ووراه سليم
'' يا لهواااااااي الحقوني يا كلاب''
مازن: أجرى يا انس الجري نص الجدعنه
أنس وهو بيلطم: طب والنص التاني
رعد: النص التاني بقى اشهد ان لا اله الا الله وان محمد رسول الله
مالك: ده انتوا مطبخينها كلكم بقى
فهد خلع حزامه: نهارك ملون بألوان ربنا الغامضه هتتضربوا كلكم النهارده
الأطفال كلهم طلعو يجروا وهما بيصرخوا بجمله واحده بس
'' جـــدو عــــلاء يــــا لــيــلــي الــحـقــونــا يــا نــاس''
           ~~~~~~~~~~~~~~~~
بعد وصله الضرب اللي عرفوا الشباب يدوهم للأطفال بعد معاناه بسبب سرعه الأطفال هههههه طالعين للعصابه الكبيره بقى
نغم كانت غيرت هدومها في المطبخ ومسكت كوبايه مياه واخدت برشام بس سمعت شهقه قويه وكانت من الأطفال وقبل ما تتكلم كان فارس ولين طلعوا يجروا للكل وهما بيصرخوا
'' ممنوعات ممنوعات نغم بتشرب ممنوعات ''
نغم طلعت تجرب وراهم: يا ولاد الجذمه استنوا هتفضحوني يا كلاب
ريان بصراخ: يا رحيم الحق مراتك بتشرب مخدرات
كان الشباب والبنات قاعدين قدام النار بعد ما غيروا هدومهم وإذ فجأه يسمعوا صوت صراخ لين وفارس ونغم كانت بتجري وراهم
'' نغم بتشرب مخدرات''
عمار: وادي الدليل شريط البرشام
الكلام بصلها بصدمه: مخدرات
           ~~~~~~~~~~~~~~~~

Sabreen 💙