قطقوطة

34- هاتولي ياسمين

هرج ومرج عم البيت، وتخالط أصوات حسام وأمي يعم المكان، ما بين ذهول وعدم تصديق، وعدم فهم أو استيعاب!ولكن ما لم أتمكن من فهمه لم كانت أمي تبكي بهستيريا وهي تقول:

- "أنا مش عارفة أفهم أي حاجة، ازاي حسابها يتفتح؟! ومين اللي بيبعت؟ طيب فهمني يا حسام، يمكن علشان أنا مش بافهم في التكنولوجيا يا ابني؟ هو كده أختك جرى لها ايه؟"

ربت حسام على كتفها واحتضنها وهو يقول:- "يا ماما أنت بتعيطي ليه دلوقتي؟ الموضوع غريب فعلا، بس ماتعيطيش كده"- "أنا طول عمري أعرف أن الرسايل بتتبعت لما حد بيتخطف، يبقى أختك اتخطفت يا حسام"

تشاركت أنا وحسام في سقوط فكينا وانفراج فاهينا غير مصدقين، وانفرد هو بقدرته على الرد عليها بذهول:- "أنت بتقولي ايه يا ماما؟ رسايل وخطف ايه؟ أنا باقول لك حساب (الماسنجر) بتاع هند مفتوح اللي هي بتبعت منه رسايل، مش جالنا رسايل!! وبعدين هو احنا شفنا ايه المكتوب في الرسايل علشان تقولي ان ليها أي علاقة بخطف؟! من فضلك اهدي شوية يا ماما علشان نقدر نفكر ونفهم ايه اللي بيحصل"

- "طيب ما نشوف الرسايل، هو أنت مش بتشوفها ليه يا حسام، حرام عليك"

ضرب حسام كفا بكف، ثم عاد لغرفته وأحضر (اللابتوب) وهو يقول:- "هاشوفها يا ماما، اديني بس فرصة علشان أشوف آخر حاجة مبعوتة من الحساب ايه"

جلس على المقعد المجاور لها، وأخذ يطالع الشاشة بتركيز شديد، حينما اتسعت حدقتاه، وبدا على وجهه الذهول، مما أثار أمي، وجعلها تفقد صوابها، وهي تقول:

- "عرفت ايه يا حسام؟ أختك مالها؟ قول لي بسرعة"

قال ببطء وكأنه يحاول أن يستوعب ما يقوله:

- "آخر رسالة مبعوتة من حساب هند لياسمين صاحبتها بتقول لها أن الموبايل فصل شحن، وبتسألها الراجل قال ايه؟"- "راجل؟؟! راجل مين؟"

هز حسام رأسه وهو يقول:

- "مش عارف يا ماما مش قايلة، بس موبايل ايه اللي فصل شحن؟ هو الموبايل مش مع ياسمين علشان حد يفتحه؟"- "يبقى ياسمين أخدت الموبايل وادتهولها، ياسمين تعرف مكان أختك يا حسام! كل ده وسايبانا هانموت من القلق، بس لما أشوفها هاوريها! أطلبهالي بسرعة"أ

خذ حسام هاتف أمي، وضرب مفاتيحه، ثم وضعه على أذنه قبل أن يقول:

- "التليفون مقفول!"- "طيب استنى شوية كده واطلبها تاني، ياسمين هي اللي هتجاوبنا على كل الاسئلة دي"

شرد حسام قليلا، ثم قال بحيرة:

- "بس أنا لسه مش فاهم، لما هند بتبعت لياسمين رسايل من أي حتة، هو حسابها اتفتح ازاي على جهازي؟ أنا هاتجنن؟"

قالت أمي بضيق:

- "بص بقى أنا لا فاهمة حسابات ولا رسايل ولا حاجة، كل اللي عايزاه دلوقتي نوصل للست ياسمين دي علشان تفهمنا اللي بيحصل ده كله"