.
رجوع للماضي
كانوا الاطفال يركضون وهم ينادون بعض بحماس
: وصل العم سليمان وصل العم سليمان.
ووقت تجمعهم وركضهم مع بعض كان يناظرهم شجاع قبل ما يلتفت لـ رماح الي كان يجمع حجار، وبعدها تكلم: بتروح؟
رفع رماح راسه وسأل: انت بتروح؟
تكتف شجاع وناظر رجوله وهو يشوت الحجار و يقول: اكره القصص
هز رماح راسه وكمل يجمع حجار بهدوء.
نزل شجاع ذراعينه وسأل بأنزعاج: الحين ليه تجمع هالحجار؟
رماح: عمي طلب مني، يبي ثلاثين.
قلب شجاع عينه: انت صاير مع سحيم دايم
ابتسم رماح من طاري سحيم ووقف بعد ما جمع الحجار بثوبه: تعال معي، اليوم درس الارقام.
شجاع بتملل: رجعنا للعلم
رماح: هالعلم زين
شجاع: ابي امسك سلاح
عقد رماح حواجبه وتكلم: سلاح؟ عمرك ٦.
ناظره شجاع وقال: وان كنت ٦؟
رماح: السلاح ثقيل، منتب قاويه.
شجاع: بقواه، منب رخو مثلك.
ما رد رماح لأن ما له خلق يتهاوش مع شجاع، فالمقابل انتبه للولد الصغير الي يقرب منهم بشويش.
ابتسم ونادى: سيف!
تحمس سيف لما ناداه رماح وبدأ يركض لجهتهم لكن شجاع صرخ عليه: لا تركض يا سيف
وقف سيف بمكانه، خايف من نبرة شجاع
فتكلم رماح: خله
رد شجاع وهو منزعج: تعرف ان عنده ضعف في قلبه.
رماح: وتصارخ عليه؟ ذا حل؟
تأفأف شجاع: يله يا ابو الحلول، خله يراكض بهالصحراء لين يموت لان قلبه ما يتحمل.
ترك رماح الحجار وراح لـ سيف الي باقي واقف في مكانه.
انتبه ان على وجه سيف بعض من التراب فـ بدأ يمسحه وهو يتكلم: علامه وجهك مجصص بالتربان.
رد سيف وهو يغمض عيونه عشان ما يدخل التراب فيها: طحت
رماح: بسم الله عليك، تعورت؟
