...
- شجاع
ظل ساكت بعد كل هالكلام الي سمعه ..
بس ما دام سكوته أول ما نزلت دمعته
لكنه غطى عيونه بشماغه وبكل دمعه يمسحها تنزل ثنتين غيرها..
تنهد سحيم ونزل عن خيله قبل ما يمد يده ويسحب شجاع لحضنه.
كان يقدر يسمع صياحه المكتوم وعارف ان شجاع يحاول انه ما يصيح اساساً شجاع ما عمره صاح قدام احد.
بدأ يهمس له وهو يطبطب على ظهره: هون على نفسك وانا ابوك
استمر شجاع بصياحه على كتف سحيم الي كان بكل مره يضيق عليه الحضن.
هو ما ينكر شعوره بالراحة مع سحيم لكن قلبه تقطع ومو مرتاح.
وش هالناس؟
وش هالدنيا؟
كان هالسؤالين يحوسون في عقله
كيف توصل لهالدرجة من البشاعة؟ ووش اسوأ!
انك تكون ولد عبد شارينه الناس عشان يخدمهم ويتصرف على كيفهم؟
ولا انك تكون ولد زاني طاح فالحرام.؟
ولا انك .. تعيش في ارض طول عمرك وتكتشف بعدها ان هالارض مهيب ارضك وهالناس مب اهلك.
زاد صياحه في كل مرة يستوعب فيها لـ شي يجره ورا شي ثاني..
قرب رجب ومسح على راس شجاع وتكلم بعدها مقاطع افكار شجاع: خلونا نمشي
راح رجب لـ خيله ووقتها بعد سحيم عن شجاع قبل ما يمسك راسه ويبوسه وهو يهمس له: ما عليه الصبر وانا ابوك وان كانك تبي تشوفهم انا ادلهم
بلع شجاع ريقه وناظر في عيون سحيم قبل ما يسأله بنبرة مكسوره: يعرفوني؟
رد سحيم بضيق: يوم ماتت أمك الله يرحمها في أرض عطاس وهم ما يدرون عنها شي، ولا حبيت اقول ان لهم ولد
استغرب شجاع وسأله: ليه؟
نزل سحيم راسه يفكر بالجواب لكنه بعدها اشر لجهة خلت قلب شجاع تتسارع نبضاته
وهو يقول له: خوالك من الجنوب وعندك عم بالشرق لكن ما عندي علم عن حياتهم .. على خبري بهم
شجاع: وكيف اتعرف كل ذا يا سحيم؟
رد سحيم: يوم ذكرت اسم مُسَلم عند مبارك .. عرفه
تضايق رجب اكثر ورجع يسأل: يعني انا من قرايب مبارك؟
هز سحيم راسه بنفي وقال: لا على العكس خوالك كانوا اعداء لـ مبارك وقرايبه (قرايب مبارك) ولا يقدرون يقربون منهم ولا من ارضهم .. عشان كذا قلت لك اني بدلك عليهم
