- معن
صب له مُلهم القهوة وعينه باقي عليه.
واول ما حط له الفنجال على الطاولة قال: ذقها، منت لاقي احد يسوي مثلها لأنها مخصصة لك
كان معن بياخذ الفنجال لو ما سبقه رماح وكبه فالرمل قدام مُهلم ..
عقد معن حواجبه وهو يناظر في تصرفات حبيبه الي باين عليه ان جوه متنكد طول الوقت الي فيه مُلهم
أما مُلهم ضيق عينه وقال: ضيعت النعمة
رد رماح بنفاذ أعصاب: هات العلم بتعطينا مكان نرقد فيه ولا نروح لغيرك؟
ما رد مُلهم عليه ورجع يصب لـ معن ومد له الفنجال هالمرة عشان ما يكبه رماح
فالمقابل اخذ معن الفنجال وهو حاس ان فيه نظرات تحرقه
وبعد ما شرب شوي كلم مُلهم الي ما بعد عينه عنه: عندك خيمة لنا؟
ابتسم مُلهم وجاوب: خيمة؟ عندنا غرفة، حاب تشوفها؟
رد معن: ايه بس قبلها لو عندكم طبيب هنا
استغربوا الاثنين وقبل ما يتكلم رماح، تكلم مُلهم: ليه وش الي يوجعك؟
جاوب معن: احس اني تعبان شوي
وقف رماح وكلم مُلهم: وين غرفتك ذي
رد عليه مُلهم: هي له مب لك عشان تسأل عنها
مد رماح يده لـ معن عشان يساعده يقوم،
بعدها ناظر مُلهم بنظرة بارده وهو يقول له: دلني على غرفتك لا أدلك على قبرك
تكلم معن وهو يمسك يد رماح ويقوم: ما فيني شي قوي بس احتاج اخذ دوا وما رقدت زين
كان هالكلام لـ رماح عشان يتطمن ووقتها تكلم مُلهم: ما تشوف شر، الحين بخلي احدٍ يدلك على الغرفة وبنادي لك الطبيب يجيك
ابتسم معن وتكلم لـ مُلهم: مشكور مُلهم
ولعل نطقه لأسمه سبب بشعلة نارين
لا شعورياً سحبه رماح له ووقتها ابتسم مُلهم واشر لواحد يجيه بسرعة
واول ما وصل الشخص قال: خذهم للغرفة
هز الثاني راسه وقال لـ رماح ومعن: تعالوا معي
لحقوه الاثنين بعد ما ترك رماح يد معن، وكان باين عليه طول الطريق للغرفة انه ضايقه من كثر تنهيداته
