ظلمة .؟
جاي اشوف بس ظلام !!
الهوى عالي خلة جسمي يختل توازنة ،
جم مرة اجيت اوگع ، ووگعت بالفعل ورجعت وگفت من جديد وبالگوات
لا ارادي غمضت عيوني ، ضوة قوي اذة عيوني ، خليت ايدي على عيوني احاول احجب الضوة عن عيوني
هدوء...؟
ورجعت الدنيا ظلمة ، والهوى العالي اختفى ، التفتت يمنة يسرة ماكو اي شي ، بس ظلام
بلعت ريگي بصعوبة احس برجلية انشلن ، اسمع صوت الخطوات الثابتة والبطيئة يرن بأذني ، رجف گلبي ، قبضت على ايدي بخوف
انتفض جسمي بقوة ، احس بأيد باردة لامست ايدي ، ابتعدت وركضت ، الاهث ، واركض واركض واركض
، ما اعرف وين اروح بس رجلية كمت ما اكدر اتحكم بيهن ، رجلية جاي يتحركن من وحدهن
وبعدة صوت الخطوات يرن بأذني ، صرخت بخوف وذعر واني احس بشي بارد لامس وجهي
چان دم...
نزلت دموعي بخوف اتراجف واتلفت اريدلي واحد يطلعني من هذا الظلام ، نزيت مرة ثانية و رجعت جم خطوة لورا واني اسمع كلام ناس ما مفهوم يصدح بأذني
جاي اسمع اصوات ، بس ما جاي اعرف عليمن يحچون ، وبضعف مني ركعت بالگاع ، وغصباً عني بچيت ، نزلت دموعي بخوف وذعر وتعب مفاجئ صابني
ينتفض جسمي وي كل كلمة تطلع ، مشكلتي ما جاي افهم شيحجون ، جاي اسمع اصوات هواي
ذولة لا شخص ولا ثنين ولا تلاثة
ذولة اكثر من خمس اشخاص جاي يحچون
" كافي كافي كافي " صرخت بعلو صوتي احط ايدي على جوانب راسي احاول امنع الصوت من الدخول لعقلي
اختفى الصوت ، وبس صوت بچيي هو الينسمع ، فتحت عيوني بهدوء برعب ، انظر لكل الجهات ، اختفى كلشي ما عدى الظلام
ما ادري ، بس ضليت امشي ولمكان مجهول بهذا الظلام
بقيت امشي ولحظة وحده وگفت بيها ، انتفض جسمي وصحت بصوت عالي اثر صوت طلقة قوي بسببها اذني صار بيها طنين بشكل مؤذي اللي
حطيت ايدي على اذني اهز راسي احاول اوخر هذا الطنين ، بس زاد وبشكل مؤذي اكثر ، حسيت بشي بارد على اذني ، وخرت ايدي عن اذني انزل عيوني الها
ايدي عبارة عن دم....
سمعت صوت هامس ، وهوى يلامس اذني وكأنوا شخص قريب مني وجاي يهمس بأذني ، سمعتة وهو ينطق بنبرة عجزت اعرف شنو بيها ، خبث حقد وشماتة وغضب
