🔥🔥 #وجهان_مختلفان 🔥🔥
( #الفصل_الثالث)
بقلم ===> Witta 🤓
#الجزء_564
اليوم الثاني هذا لي كاتجي فيه لكلينيك من بعد ما خطبها علي من دارهم.... فهاد اليومين دوات معاه هضرة عادية غير فالميساجات و ماطولوش فالحوار..... واخا هضر معاها عادي ولكن هي تشطنات عليه حيت مشافتوش، خصوصا انها كاتجي هاد الايام غير باش تشوفو بحكم انها خاصها تجلس فالدار حتى توصل لخطبة....
جالسة كاتشرب قهوة فالكلينيك و معاها سكينة لي ماقدراتش تخليها بوحدها فالدار و جابتها معاها من بعد ماتشاورات مع علي...
دعاء (تنهدات) : ماعرفتش مالو علي مجاااش هاد اليومين "بخوف" عنداك يكون مريض
سكينة : ياك كاتهضري معاه
دعاء : هضرة قليلة وغير ميساجات مااسمعتش صوتو
سكينة (عوجات فمها) : جاني عجب مخطووبين و مكايعيطش لييك
دعاء : هو هكاك داااير هضرتو قليلة بزاف
سكينة : امم ايوا عيطي ليه شوفي مالو
دعاء (جبدات تليفونها) : داكشي لي لقيتيني باغة ندير
دوزات ليه الخط كاتسنى الرد حتى وصلها صوتو الخشن
علي : الو
دعاء : الو علي صافا؟؟
علي : صافا الحمد لله ونتي؟؟
دعاء : الحمد لله "بتوتر" صووونيت ليك بغيت نسووولك
علي : وي سولي
دعاء : شفتك ماجيتيش هاد اليومين لكلينيك ، ياك لاباس؟؟"بنبرة قلقة" واش مريض؟؟
علي (بتاسم) : لا مامريضش الحمد لله غير عندي شي خدمة مع الدراري داكشي علاش
دعاء (بارتياح) : اه اييوا الحمد لله
علي : كنت غادي نعيط ليك نيت باش توجدي راسك غدا نمشيو نشريو الخاتم
دعاء (بفرحة) : واخا ان شاء الله
ديما كاتجيب ليه الضحكة بعفويتها فالكلام، كاتبين فرحتها و لهفتها حيت غاتزوج بيه بلا ماتحس الشيء لي كااايعجب علي بزاف.... كايحس براسو مهم عندها بزاف و حبها ليه باين من عينيها قبل ماااتهضر....
علي ( نحنح) : ان شاء الله غادي نهضر مع باباك نقولها ليه ضروري ناخدو منو الإذن
دعاء(وعات على راسها) : وي ضروري ضروري
عجبها الجيست ديالو و بغات تاكل راسها على فمها لي فارشها ديييما....قطعات معاه وهي ترجع عند سكينة، مجات فين تجلس حتى وقف عليهم صهيب
صهيب : السلام عليكم
دعاء :وعليكم السلام "شافت فسكينة" هدا طبيب هنا فالكلينيك نفس الدومين ديالنا... صهيب هادي سكينة صاحبتي
