🔥🔥 #وجهان_مختلفان 🔥🔥
( #الفصل_الثالث)
بقلم ===> Witta 🤓
#الجزء_559
ناضت كاااتفتف و عينيها مزال حمرين بالدموع وهو تابعها حتى دخلو لصالون لاخر.... جلسات فوق السداري حادرة راسها كاتلعب بصباعها و علي جلس قدامها.... طلعها و هبطها بلا هواه عجباتو بالقميص لي لابسة و شعرها الاسود القوي لي طالقة فوق كتافها.... ماشي اول مرة يشوفها بالبلدي ولكن اول مرة يشوف فيها بنظرة مختلفة...... وعى على راسو بلي طول فيها الشووفة وهو ينطق بهدوء
علي : دعاء صافا؟؟؟
دعاء :احم الحمد لله
علي (شابك صباعو و نطق بجدية) : شوفي فيا " هزات فيه عيوونها وهو يعقد حجبانو" كنتي كاااتبكي ؟؟
دعاء (بارتباك) : ها احم لا غير حكيت عيني
علي : دعاء علاش كنتي كاتبكي؟؟؟
دعاء (هزات كتافها) : غير تأثرت و صافي
علي (مابغاش يحكر) : داكوغ.... بغيت نهضرو بوحدنا باش نتافقو على الخطوبة و العرس ايمتى غانديروهم ان شاء الله
قلبها كااايرفرف فهاد اللحظة ، كامتيقاش ان علي كايهضر معاها فهاد المواضيع...هي وياه دابا جالسين الراس فالراس كااايهضرو على زوااجهم.... كاتحس بهادشي لي كاايوقع بحال الحلم و مابغاتش تفيق منو... ماتنكرش انها ديجا حلمات بهاد النهار و هاد اللقطة و الخطوبة و العرس... گاع هادشي كانت كاتجلس مع راسها و كاتسرح بمخيلتها حتى كاااتفيقها شي حاجة.... ولكن دابا هادشي حقيقي و حتى راحد مغادي يفيقها حيت علي لي جالس قدامها بشحمو و لحمو....
ماعرفاتش اشنو تقول، خافت تنطق و تصدق قايلة ليه كون جات عليا نجمعو كلشي فدقة وهاد السيمانة نعقدووو....
دعاء ( حادرة راسها حيت الى شافت فيه غاتلف ليها الهضرة) : لي يناسبك نديروه
علي : رأيك كاايهمني حيت ممكن نعطي انا شي اقتراح ماايناسبكش
دعاء (نطقات فخاطرها) : نتا كلك على بعضك مناسبني كيفاش غادي تقول شي حاجة ماتناسبنيش الزين
علي (شافها صقلات تاني) : دعاء
دعاء : احم ماعرفتش انا ماعندي حتى اقتراح
علي : واخا ماشي موشكيل.... انا كانقول نديرو الخطوبة السيمانة الجاية ان شاء الله و لعرس بعد شهر
دعاء (نهزات فيه راسها و نطقات بالزربة) : صاااافي مزيانة
علي (جاتو الضحكة) : بلاتي نكمل
دعاء (عاد وعات على راسها و مرگاااات) : اه اه كمل كمل
علي : من ورا الخطوبة ان شاء الله مغاديش تشوفيني
