[ JUST SAY THAT U'RE IN LOVE ]
صوت الماء مطلوق فالحمام قادرة تسمع وقعو الخفيف مع الأرض وتسمع صوتو الرجولي كايدندن تحت الماء ... بحتو الغليضة كاداعب وذنيها المزينين بحلقات كبيرة مرصعة بماسات صغار .... خدات نفس عميق من وسط صدرها وزفراتو بضيق ... واش صافي تزوجات ؟ هادي ليلتها ؟ تيما .. تيتي .. فاتي .. فاطمزهرا ... هادو كلهم ألقاب كايدلعوها بيهم حيت هي الصغيرة ... هي لي كانو كايقولو ليها غاتكملي قرايتك وتولي طبيبة ... هاهي دابا مخشية وسط كفن أبيض وغاترمي راسها وسط قبر الزوجية .. مع راجل غريب عليها .. مكاتعرفووش .. قبلات بيه غير حيت والديها قبلو بيه ...
تيما : ( وقفات جارة كسوتها أمام المراية الطويلة لي كاتعكس قامتها القصيرة ونطقات بهمس كاتخاطب راسها ) ... ششششش .. صاافي ... صافي أتيما ماوقع والو .... غير .... ( دلات شفايفها بحزن وعيون مدمعة ) غير ... غاتعيشي مع راجل نتي ماختاريتيهش ... ماوقع واالو ... غير غاتلوحي راسك فقبر محلول ....
مديت يدي لسنسلة دالكسوة وجريتها ببطء حتى طاحت كلها للأرض وطاح معاها كلشي فياا ... هزيت عيني للمراية كانشوف فراسي ... فجسمي لي مكانش مثالي بحال البنات لي متبعاهم فسوشل ميديا ... أنا عندي خطوط طويلة جنب فخاضي وكرشي خارجة شوية ... صدري صغير وعنقي فيه توحيمة على شكل فريزة ... عيني كحلين ومافيهم حتى شي لون مميز .. كانشوف راسي ناقصة ولكن ... ممكن يكون هو كامل ويكملني !!! ويلا كان ناقص حتى هو !! شكون غايكملنا بجوج !! ويلا كان طايش حتى هو !! شكون غايرد لينا العقل ؟؟
مافيقها من سهوتها غير صوت تيليفونو لي زنزن فوق المجر ... قربات ليه ناسية تماما راسها واش عريانة ... ودوبياس لي لابساا كانو فاضحين كتر ما كايغطيو ... صغرات عينيها السوداء فشاشة كاتقرا الميساج لي وصلو بلا مادخل ليه ... كان ميساج من صاحبو :
( فين أخاي موسى مبروك عليك مادرتي واخا زربتي ههههه .. داباا شنوو مابقيتيش غاتقصر معانا .. تا قلناا جبناا درياات قنبولات أصاحبي ونتا ضربها بتزويجة ؟؟ ... مهم راك تماا مرة مرة وطل نديرو شي جليسة بعقلها )
ميساج كان غايعصب أي وحدة بلاصتي ولكن أنا شكرت مولاه فخاطري ... خلاني نعرف نوع الرجال لي مزوجة بيه أنا ... راجل كاتغلبو شهوتو ومكايآمنش ببنت وحدة فحياتو ... هه مغايآمنش بيا فحياتو ... سمعت صوت الماء تسد فالحمام وعرفتو غايخرج بحال قلبي تماما لي بغا يخرج من بلاصتو فهاد اللحظة ... عاد رديت البال لراسي .... أنا عريانة !!! مكاينة تا حاجة حدايا قادرة تغطيني من غير كسوتي المليوحة فالأرض ... ولكن غاتخد مني وقت باش نلبسها ... ضرت ليمن وليسر وتلاحيت بسرعة فوق السرير مغطية راسي كامل بحالا هاربة منو ليه .... هاربة من قداموو لتحت فراشو ... مخبية فبلاصة ساهل يلقاني فيها .. حيت هي البلاصة الوحيدة لي مكايتخاباوش فيها الناس ليلة عرسهم ... ليلة دخلتهم !!!
خرج شاب من الحمام لاوي فوطة بيضاء على نصو كاتعكس تماما لون بشرتو السمراء ... قطرات الماء كاتسابق بسرعة على صدرو باش طيح فالفوطة وتختافي ... كتافو عراض بحال أي واحد مهلي فراسو بلونطريما والسبور ... وعينيه كانو عسليين مغطيينهم رموش كثيفة مبللة فالماء ... هز فوطة ثانية من فوق الكرسي كايمسح بيها وجهو ... قلب عليها ولمحها مخشية وسط السرير ومخبية تحت الكوفرلي ... بتاسم بجنب فمو وتوجه للفون قرا الميساج وجاوب فوكال ...
موسى : ( حنحن بصوتو الرجولي ونطق مبتاسم ) هههه الله أصحايبي ضاارووري شي عشية ونديرو شي جليسة مرحباا ...
حط الفون عند بالو جاوب بلا مايلمح ... جواب مبهم مامعروفش أشنو المقصود منو .. عكسها هي لي حلات عينيها على آخرهم ... كانت كاتسناه ينفي ويقول ليه أنا راجل مزوج ماشي ديال هادشي !!! سدات عينيها مزيرة عليهم .. ومزيرة على طرف الكوفرلي ملي حسات بيه جلس حداها وكايدوي بهمس مستفز فوق راسها ....
موسى : ( يد مكالي بيها فوق السرير ويد حطها فوق خصرها ) ... فاطيمزهرا ... نعستي !! ههه هادي الليلة ماشي ديال النعاس .... (كايحاول يحيد عليها الغطا ببطء )
تيما : ( بلعات ريقها بصعوبة ونطقات بصوت شبه مسموع ) .. م ماتحيدش الغطاا عافاك راني م ماالابسة واالو .....
موسى : ( هز حجبانو باستغراب ونطق بنفس الإبتسامة ) هههه وراه فالأصل ماخصك تكوني لابسة والو !!!
أنت تقرأ
NOTA _ نـوطـا
Romanceقصة كيف العادة قصيرة ديال تخشاو فبلاصتكم وتقراوها ... ديال تخليو الميساجات معلقين ... حيت ملي غاتساليوها غاتبغيو شي حد تهضرو معاه ... غاتبغيو تسمعوو شي مزيكااا قبل ماتنعسوو ... غاتوحشووو صوت ديزي ... غاتخدمو نووطااا ... وغاتسمعوو نووطاا بعدما تعيشو...
