وعندما التقت عيني بـ بؤبؤ عينها شعرتُ بأن الزمن توقف وكأن انغرست في قلبِي زهرة عالنة عن اندفاع حَبي لها ، فما بال قلبِي اصبح اسيرٌ لعيناها
«زينب»
ــــــــــــــــــــــــــــــــــ
_جنات
:- يُمة حبيبي بس اكعد انطي مجال وفهمني شنو گلك الدكتور
:- ما گال شي مُهم
:- چا الضحكة شگت حلگك يلا احچي فرحني وياك
حسين: گال ما بيك شي وامورك تمام بس مُعرض للاصابة بالسكري وانطاني حمية غذائية عود امشي عليها
نوال: يُمة يبعد عيوني حسوناتي الف الحمد لله انطيني الورقة وينها
حسين: ذبيتها بالزبالة
جنات: ياااا ولك ليييش
حسين: چا اجذب على روحي ما راح التزم بيها زين من اقلل سُكريات ودهون
نوال: ولچ گومي يُمة جنات جيبيلي التوثية اكسرها على راسه وراس الساعة الخلفته بيها
حسين: افا يهون عليچ وانا وحيدچ؟
نوال: عمة بعيني اذا يهون علي يبعد روحي حسوناتي
جنات: ماما اغااار
نوال: يُمة تعاي يبعد روحي انتِ العافية واهلها مو هذا الاثول شالع گلبي
جنات: ايي ماما اييي حسوني مو خوش حسوني
حسين: ها هسة صرت ما اعجب
نوال: اسكت اسكت ادورلك سالفة حتى تتمزعل
جنات: ماما مشطيلي
حسين: چا ما تمشطين وحدچ شني مكسرة
نوال: معليك گوم يلا مو وراك دوام گوم نام
حسين: چا كافي لعبت روحي يا دوام يا شغل يا دياحة
نوال: ولك حسين گوم
_گام راح لفراشه وكعد يگلب بتلفونه ، كعدت كدامها وحطيت المشط بيدها ولازمة ستوتة لونها اسود وعيني عليه ما ادري ليش من اشوفه انقهر واذكر عمو فاضل بيه..
نوال: ويه صافنة حبيبتي؟
جنات: ماكو شي ماما هيچ
حسين: اي ما گتيلنا تونستي من شفتي ام مريم
جنات: اي
حسين: وشلون آسر يقبل صاحبه يرجعچ؟
نوال: يُمة حسين كافي من دخلت البنية لـهسة مستلمها بس تحقيق
حسين: چا غير نفتهم السالفة قابل نبقى رجلينا بالشمس
جنات: عادي صاحبه يثق بيه اكثر من اخوه وهو ولد مؤدب وما رجعت وياه وحدي اخته ويانا چانت
أنت تقرأ
الغيلان 010
General Fictionفي كل حائط سر مختلف _بيت عائلة مخيط بخيوط من الحزن وخيوط من الفرح _لكل شخص فيهم حكاية مختلفة مع الحياة القصة باللهجة العراقية.
