الحلقة الثانية ✨
يمكن نهاية قصتنا ماتكونش النهاية تكون البداية لقصة جديدة مع انسان احسن 😔♥️
ايات//
نضت ثاني يوم الفجر وكان جمعه اول جمعه وانا حره بدون امتحانات وضغط وسترس عالي طلعت للصاله لقيت سفيان راقد على الشيتات متاعه بحكم ان امتحانات قريبه
انا: سيفو سيفو
سفيان: شن في كنك
انا: نوض صلي الفجر وخش ارقد تريح في السرير نومتك غلط
سفيان: تمام "وصبى من مكانه"
خشيت للمطبخ يلي كنت ناسيه وين يفتح اصلا 😂
جاء في خاطري كريب نفطرو بيه بديت فيه ودرت كريب وطيبت الشاهي وجهزت الصفره
ومشيت قعدت نقرا في قران لحد ما وصلت الساعه لل8 خشيت لدار مصعب نوعي فيه
انا: مصعب مصعب نوض هي
مصعب: واعي
انا: هي نوض اطلع نراجي فيك برا
مشيت لدار سفيان وصهيب لقيت سفيان راقد لكن صهيب واعي يتامل في الساس
انا: صهيب واعي
صهيب: نعم
انا: عيونك حمر مارقدتش ؟
صهيب: النوم طاير شن في
انا جيت قعمزت جنبه: حبيبي صهيب انت تعرف ليش صاير فيك هذا كله
صهيب: اسكتي واللهي ماني متحمل يا اية
انا: لا خليني نقولك ياصهيب ضروري تواجه مشاكلك
صهيب انت الوحيد يلي في خوتي البعيد عن ربه ، من بعد ما توفت نورهان وانا معش شفتك لا صليت ولا مسكت قران ولا سبحه لو انت فقدت حبيبتك نحن فقدنا امنا وباتنا في ليله وحده نتذاكر ان قدامي نعيط وماقدرتش ننقضهم
صهيب: مش عارف مش عارف حاير عقلي في مكان وقلبي في مكان وجسمي ف مكان ثاني بكل مافيش حد حاس بيا
انا"مسكت يده": من قالك ان ماحد حاس بيك بالعكس واللهي عارفه ان صعب بس انت ليش مسيب حبل ربك ،
ربي قال
(الَّذِينَ إِذَا أَصَابَتْهُمْ مُصِيبَةٌ قَالُوا إِنَّا لِلَّهِ وَإِنَّا إِلَيْهِ رَاجِعُونَ)
خلاص تخطى وعيش حياتك ياخويا لو مش علشانك انت علشاني انا ومصعب وسفيان نحن في حاجة لك يا صهيب
صهيب حضني وقعد ونزلوا دموعه.
انا: الله يرحمها وهي في مكان احسن من يلي نحن فيه ب 100 مره "مسحت دموعي وبحتت في سفيان" تعرف وجعني نبدري كيف طايح ع شيتات
صهيب وهو يمسح علي وجهه: يستاهل يقعدلي السمستر كله وهو يتمعشقلي ويتدهور هو ورِتاج وفي الاخير يقعد هكي
انا: نوض نوض خلينا نفطرو مش نمشيلها الهبله هذاك
صهيب: تصدقي خاطري في حني مرايفلها
انا: حتى انا ببكل ليا قريب شهر من لما جتنا هنا معش شفتها
صهيب: لا انا مشيت اسبوع غادي
انا: انت فاضي انا كنت نقرا ، صح شن صار في الجامعة
صهيب: نزلت مواد واهو مشيت امس ، الحمدلله مواد خفيفات
انا: باهي ربي يوفقك ، هي صبي
صهيب: وسفيان
انا: خليه راقد توا نعقبله
طلعنا لقيت مصعب مقعمز في الصاله
مصعب: خشيتي بتنوضي صهيب نحسابك رقدتي معاهم
صهيب: صباح الخير قول
انا: يتحنط ع الصبح نمشي نسخن الشاهي على ما صليت يا صهيب
صهيب: هي حاضر "وخش للحمام"
في حوش عمهم//
علي صفره الفطور مقعمزين كلهم
ريان: يابابا وراسك فراصه هذي ليا مش ناخذ شهاده معتمده في التمريض
علاء: وشن بتمشي غادي بتمدي وجهك عند عيت عمك كم ؟
ريان: باهي يمشي معايا محمد وناجرو
محمد: فاضي انا قالولك
ريان: باهي عطوني حل مافيش الا يااما نقعد عند عيت عمي او تمشي معايا انت وناجرو
حني: والفكره الثالثه تهمدي عضامك في حوشكم
نورس مسكه ضحكتها: صح مش ضروري
ريان فنصت فيها: انا نبي المعهد فيه استاذ كويس يشكرو فيه وشهادة معتمده
انتصار: ياعلاء كلمهم عيال خوك لو يستقبلوها شيلها وفكني من الزن متاعها
علاء: مش هايقولولي لا هما ، لكن كيف بنت تمشي والحوش فيه ثلاث شباب
محمد: من جدك ياباتي بتمشي كلمتها عليك
ريان: اسكت انت مش شورك ، وراس بابا باهي
علاء: نكلمهم الاول
محمد عزق الكشيك وطلع
حنى: نعيش ونشوف نسمع
