#الأخوة 🪐
الحلقة الرابعه✨
"الأخ ركن الروح، وزاوية الذاكرة، ومفصل الذكرى، الأخ عمود في روحك♥️"
ايات//
ثاني يوم نضت لقيت روحي راقده علي الصالون بدون ما نحس علي روحي صبيت بحتت في الساعه لقيتها ساعه 8
مشيت للمربوعه لقيت سفيان راقد هو ومصعب وعمي علاء رديت عليهم الباب وركبت لداري مسكت تلفوني
قعدت نقلب في الفيس لين طلعلي منشور ان الشهادة اليوم على طول بدو فيا اعصاب المعده
سمعت صوت حد يتحرك برا طلعت بحتت لقيته صهيب
انا: صباح الخير
صهيب: صباح النور، كيف حالك اليوم
انا: تمام عندك محاضره،؟
صهيب: للاسف ماعنديش نيه نمشي بكل
انا: تحمل خلاص شن مزال
صهيب: ييييي مزال واجد ، حني رقدت في دار مصعب؟
انا: نعرفش انا والله حتى البنات سيبتهن لقيتهن مكملات وحدهن
صهيب: عادي عادي المهم انك كويسه
انا: الحمدلله، تفطر معايا
صهيب بحت في ساعة يده: باهي مزال نص ساعه توا نلحق
ونزلنا لقيت عمتي انتصار اطيب في الشاهي
انا وصهيب: صباح الخير
انتصار: صباح النور ، شنو احسن يا اية
انا: الحمدلله كويسه
انتصار: باهي الحمدلله، اليوم الشهادة قالوا
صهيب بحت فيا: صح ؟
انا: اها شفتها متوتره بكل
صهيب: عليش ان شاء الله؟ مش حليتي
انا: حليت بس نبي نسبه انا
انتصار: باذن الله حتحصلي النسبه يلي تبيها
انا: يارب يارب ياعميمه.
صهيب شرب الكبايه في فم واحد: توصوا علي شي
انتصار: سلامتك ردبالك من الطريق
صهيب طبش باس راسي: ماتفكريش حتى لو نسبتك ضعيف حتخشي للتخصص يلي تبيه
انا: ان شاءالله
صهيب: هي مع السلامه "ولف يبي يطلع من الباب مع خشت نورس"
نورس: صباح الخير يومك سعيد
صهيب ابتسم: يومك اسعد "وطلع"
نورس:صباح الخيير
انا وانتصار: صباح النور
نورس: امته مروحين ياماما
انا: صبح كنك تلزي فيهم
نورس: بنروح معاهم حتى انا
انا: عليش
نورس: خلاص جامعتي قريبه بنمشي مش نطلع ونشري حاجاتي
انتصار: علي اساس اليوم بعد الغداء بس كان طلعت شهادة "وبحتت فيا" عمك مش حيروح الا بعزومه
انا: تستاهلوا كل الخير، ويانوسه خليك نمشي نطلع انا وانتي لمحلات هنا نشرو مع بعضنا
نورس قعمزت: خليها على الجو ،شنو مستعده للشهادة
انا: لالا متوتره بكل من الصبح
انتصار: اهدي اهدي
وقعدنا نهدرزو ونضحكو
صهيب//
مش عارف ليش كل ما نشوف نورس ولا تخطر علي بالي نبتسم لا اراديا وكاني شفت نورهان وانا خايف من الشعور هذا بكل وكل ما نحس بيه نتعوذ من الشيطان ونصبي نصلي
والحمدلله من يوم حكتلي ايات وانا فطنت لروحي ولبعد يلي صاير بيني وبين ربي مقصر في حق نفسي واجد من بعد ما رديت نصلي ونقرا في قران هديت وحسيت بالسلام الداخلي
وصلت للجامعة لقيت سند مقعمز شيرتله بدي علي الساعة يعني متاخر علي المحاضرة ومشيت للقاعة لقيت القاعة فاضيه ومافيهش حد
خشيت قعمزت في المدرج ونراجي في الاستاذ ومسك نقالي مع خشت حياه وسميه
سميه: انا قدام القاعه "وطلعت"
حياه: تمام، صباح الخير يا صهيب
صهيب رفعت راسي بحتت فيها: صباح النور
حياه: الحمدلله على سلامة خوك
صهيب: الله يسلمك
حياه: هذا حسابي انا يلي امس دزيتلك بيه
صهيب: اين؟
حياه: علي الفيس
صهيب: حياه جميله؟
حياه: بالضبط
صهيب: وكيف حصلتي ايميلي
حياه: مش صعب عليا
صهيب: مدام مش صعب عليك دزيلي المحاضرات الاولات كلهن
حياه: توا ندزهن لك بس كم تدفع
صهيب: فيها دفع الحكايه
حياه: تبيها بالبلاش مايصير شي
صهيب: كم تبي
حياه: فطور علي حسابك
صهيب: فطور بس؟
حياه: عادي كان انت كريم انا نستاهل
صهيب صبا: شكله مش جاي الاستاذ تعالي نطلعو للكافيتريا منها تشرحيلي ومنها نفطرو "وطلع قدامها"
حياه حضنت الشيت: واخيرااااا بدا يميل "مع خشت سميه"
سميه: شن صار
حياه: يبي يفطرني "ورفعت خشمها"
سميه: يافرحتك
حياه: حسني نبي نطير
سميه: ضحكتيني امشي باهي بسرعه
حياه: وانتي
سميه: حنقعد في القاعة هنا علي ما كملتي
حياه دزتلها بوسه في الهواء: تم ياحبي "وطلعت تجري للكافيتريا"
