#الاخوة🪐
الحلقه الحادي عشر✨
حياه//
روحت للحوش اول ما خشيت للحوش جاني اشعار رساله علي الماسنجر فتحتها نصدمت من الكلام والرساله كانت من ناصر دزلي صورتي انا وصهيب وكاتب
"صار تركبي معه في السيارة وتتدهوري معه توا نوريك انا من يا حياه وانا حلفتلك ان يا ناخذك يا نقتلك وانتي شكلك ماتبيش تركحي روحك ياحلوه "
حطيت النقال في جيبي وخشيت للدار بدون ما نحكي مع حد مش عارفه شن ندير ولا شن نقول ولا لمن نحكي قعدت سارحه لعند نقالي رن بحتت لقيته هو ناصر رديت عليه
ناصر: الو يا حلوه
حياه: ناصر شن تبي مني
ناصر: نبيك انتي انا
حياه: يا ناصر انا معش نبيك انت سببتلي عرم مشاكل
ناصر: كلمه وانا قلتها لك وكلمتي ما تقعدش اثنين
حياه: افهمني يا بنادم افهم
ناصر: تبي تسمعي كلام وتمشي عليه ولا نمشي لباتك وندزله صورتك وانتي راكبه مع استاذ صهيب
حياه: لا لا الا بابا يلي تبيها نعطيها لك
ناصر: ايوا يا سمحه تسمعي كلامي
حياه: لشنو نبي توصل بس
ناصر: نبي ناخذك
حياه: كيف؟
ناصر: بندزلك هلي وكيف الشاطره توافقي المره هذي
حياه: بالغصب هي
ناصر: اها بالغصب حبيبي بتوافقي المره الاولى رفضتي مشيتها لك بالجو المره هذي ترفضيني يصيرلك حاجات مش حلوات يا حلوه
حياه: اوففف
ناصر: اتفقنا
حياه: تمام "وصكرت في وجه" يااااربي انا في شنو خششت روحي انا نبي صهيب ياربي ليش ادير فيا هكي
قعدت نخبط ونخبط ونخبط لعند جت امي فتحت الباب
امها: كنك يا بنت
حياه: ماافيي شييي مااحد يخش عليا
امها: ربي يهديك يا بنتي
حياه بعياط: اطلعي وصكري الباااب
امها: ربي يهديك "طلعت وصكرت الباب"
طحت على الارض وقعدت تبكي
اما عند عيت عمهم علاء
خشت انتصار تشوف في ريان لقتها رابطه خيط علي رقبتها وتحاول تشنق في روحها امها نصدمت وطاحت من طولها قعدت تعيط ما قدرتش حتى انها تفكهت وتساعدها
سمعها علاء خش يجري ونصدم فكلها الخيط وقاعد يعيط لولده يلي عايش في عالم اخر بكل
علاء: يااامحمدد يااااامحمد
محمد جاء يجري: كنها كنها
علاء: شيلها للمستشفى تعال
محمد خش شال ريان وطلع يجري بيها للسياره
علاء: خليك انتي في الحوش توا نمشي نلحق عليه
انتصار: خوذني معاك كيف نبي نتحمل انا
علاء: مافيها شي حتقعد خير من قبل ادعيلها بس
انتصار:طمني عليها الله يربحك
علاء: ان شاء الله
عدو بيها للمستشفى وخششوها للعنايه علي طول وامها في الحوش قريب تموت قعدو علي الحاله هذي لين طلع الدكتور
علاء: شنو يا دكتور طمني عليها
الدكتور: الحمدلله على سلامتها باهي يلي لحقتوها
علاء: الحمدلله يارب مافيش خطر عليها
الدكتور: هي كويسه توا غير ضروري تخش لدكتور نفسي البنت نفسيتها متدمره بكل
علاء: ان شاء الله بارك الله فيك يا دكتور
الدكتور: فيك بارك الله اي شي موجود في المكتب
علاء: شكرا يادكتور
الدكتور: هذا شغلي انا "وعدا"
