#Mr_and_Mrs_අතිපණ්ඩිත_55
"උඹලට මහන්සි නැද්ද යකෝ?"
හොටෙල් එකට ගිහින් අපි කට්ටිය බුක් කරලා තිබ්බ රූම්ස් වල කාඩ් , කී අරගන්න ගමන් හිටියේ. එතන රිසෙප්ෂන් එක ගාව අපේ සෙට් එක කයිය ගගහා ඉන්නවා. යෙනුන් ඔක්කොමලව වට කරගෙන සෑහෙන ලොකු බොරු කන්දක් කියනවද කොහෙද.
රූම් වල කීස් අරගෙනත් කට්ටියට යන්න හිතක් නැති නිසාද කොහෙද නිරාන් අයියා ඇහුවෙ.
"පොඩ්ඩක් හිටපන්කො බන් අයියෙ කතාවෙ හොඳම හරිය යන්නේ."
"නයා හොඳටම උඩ යන හරිය වෙන්ඩ ඇති..."
යෙනුන්ගෙ කට ඇද වෙලා ගියා. නුකීරා එතන සෝපා එකේ අයිනක ඉඳගෙන. ඊට එහාපැත්තෙ අනීෂා සෝපා එකේ ඇන්දට හේත්තු වෙලා නිරාන් අයියා එක්ක කුටු කුටු ගගා කතාව. ඒ දෙන්නනම් දැන් අර කීවත් වගේ වැඩේ හරි වගේ. මම කෙනාර් එක්ක රිසෙප්ෂනිස්ට් ගාව හිටියෙ. කෙනාර් එතන කතාකරලා ඉවර වෙනකල් මාත් ඉතින් නැට්ට වගේ හිටගෙන හිටියා.
මොකද රිසෙප්ෂනිස්ට් කෙල්ල මගෙ පණ්ඩිතයා දිහා බලපු විදිය ඇල්ලුවෙ නෑ මට. මුකුළු දදා හිනාවෙවී කතාව. මාත් එක්ක හිනා වුණේවත් නෑ.
"මොකද මුරටද ආවෙ?"
ඒ වැඩේ කරගෙන ආපහු හැරෙන ගමන් කෙනාර් ඇහුවෙ කට කොණකින් හිනාවක් දාලා.
"ඔව්. අර සක්කරවට්ටම හිතුවොත් ඔයා සින්ගල් කියලා."
මම කටත් ඇදකරලා කියද්දි කෙනාර්ට හිනාවක් ගියා.
"මම ආවෙ නැත්තම් මෙයත් මුකුළු දදා ඉඳියි... දත් ටිකම එළියෙ දාන් ස.....ර් කියලා විරිත්තුවෙ ඇයි. මාත් එක්ක නිකමට හිනාවුණේ නෑ."
මම කෙනාර්ගේ අතේ එල්ලුණේ කෙනාර් යටිතොල හපන් හිනාව කන්ට්රෝල් කරගනිද්දි.
"ඔය ගාණට ඉරිසියාව තිබ්බම ඇති."
කෙනාර් මගෙ අතේ ඇඟිලි එයාගේ අතේ ඇඟිලි වලට පටලන් මගෙ අත උඩට අරන් පිටිඅත්ලට චූටි කිස් එකක් දෙන ගමන් කීවෙ. මට නිකන් ආඩම්බර හිනාවක් යන්න ඇති. අර රිසෙප්ෂනිස්ට් ගර්ල් අපිට පිටුපාලා හිටියත් මේක දකින්න ඇති කියලා මම හිතෙන් සතුටු වුණා.