يانجمٍ وهج في حلّة سهيل

« ٢١ »

-
ألتفتت على غرور اللي كانت تجبر نفسها تتأقلم وتستجيب للأنثى القابعة قدامها اللي بتكون بعد ثواني حماه لها ، رفعت نجلاء ذراعها تمسح عرق جبينها وسرعان ما نزلت عيونها على رسالة عوض اللي كتب فيها : أرسل الصور لبنت أمير ؟
أبتسمت بفرحة هي ولو ما قدرت تجمع نجم ببنتها بتحرص تخرب على وهج ونجم ، أرسلت موافقتها له وقفلت جوالها ، وقفت تتوجه للباب وأبتسمت من شافته جالس بزاوية الكنب ومغمض عيونه بتعب ، نزلت عيونها للدبلة اللي بيده وأبتسمت تنطق : خربت علي حياتي وأنا مستعدة أجازف بكل ما بقى لي لأجل أخرب عيشتك !
رجعت للخلف من تقدم شايع بالكتاب وطرق الباب ينطق : غرور تعالي وقعي وأنا عمك
أبتسمت حور تساعدها توقف ووقفت بصعوبة ، تقدمت للباب وسحبت القلم من يد عمها ، أستوقفتها الذكرى لليالي الحلّة لمن كانت بأعلى البيوت تنتظر قدوم نجم لملكتهم وألتفتت على السطح المقابل ولقت مروان هناك ولمحت إبتسامة عريضة على ثغره طمأنتها بشكل كبير ، أبتسمت توقع وتستودع ربها باقي خفايا مستقبلها ، أبتسم شايع يقبّل جبينها وينطق : مبروك يا بنت أخوي
أبتسمت بخفه تنطق : الله يبارك فيك
تقدم خالها باسل وأبتسمت من أحتضنّها بين يدينه ، حاوطته بهدوء وضحكت بخفه من نطق : شفتي وش الرغبة ووين النصيب ؟ زين ما رحتي بعيد وخذيتي ولد خالك
غرور : شايفه شايفه
ميّلت نظرها تشوفه يشيل مفاتيح موتره وجوال العمل ويدخلها بجيبه ، تقدم يوقف قدام المرايه ويضبّط شماغه ألتفت على عمه ينطق : الله يبارك لهم ويجمع ما بينهم على خير ومروان شرواي وأحسن مني
أبتسم مروان ينطق : حاشا وكلا من يساويك يا نجم سهيل ؟
أبتسم بخفه يسلم عليه سلام الرجال وينطق : ودعناكم الله مالي بالعشاء ومشغول
ألتفت باسل عليه ينطق : قد حلفت يا نجم
زفر يصدّ عنه وينطق : حضروه أجل
تقدم مروان يسلم على أمه وعلى عروسته ، ومشى باسل يجلس على الصحن وجلس نجم بجانبه ، ألتفت على ولد أخوه ينطق : ايه متى تخلص ؟
نجم : ما كملت أسبوعين حتى
باسل : أوف أجل مطول ؟
هزّ رأسه بالإيجاب ينطق : ما وراي شيء
باسل : اي والله صادق الله يعينك ويسدد رميك يا ولدي
نجم : اللهم آمين
أبتسم باسل ينطق بسخرية : وش حقيقة الموضوع ترا جيتك بعد كلامي مع أبوي كيف طرى عليك مروان ؟
مدّ يده للأكل يسمّي بالله ويأكل ، أنهى لقمته ونطق بحدة وعيونه على عمه : من أول ملاحظ وشايف رغبة مروان في بنت جابر و الأكيد إنك تدري بحقيقة الخطبة بيننا
هزّ باسل رأسه بالإيجاب وكمل نجم ينطق : أنا ما بغيتها والله يشهد على كلامي ماهو عيبٍ فيها لكن القلب ما هو صوبها وعلمت سهيل عن مروان وكلمكم وجيتم وإن دل كان دليل جازم على كلامي وإن مروان خاطره فيها
باسل : اي بالله خاطره فيها عسى الله يبني بيتهم
همس نجم بـ « آمين » ورفع عيونه على عمه اللي نطق بسخرية : أجل القلب صوب ديار آل ساير ؟
بلل شفايفه ينطق بسخرية : الله الله
ضحك باسل ينطق : الله يوفقك يا ولدي وييسر لك جميع أمورك
نجم : ومن يقول
جلس شايع ينطق : ومن يسمع
رفع نجم عيونه على شايع وزفر ينفض يده من الأكل ويوقف ، رفع باسل عينه على نجم ينطق : ماشي يا أبو رماح ؟
هزّ رأسه بالإيجاب ينطق : أخرتني يا أبو مروان
أبتسم باسل ينطق : ودعناك الله
رفع كفه ينطق بعلّو صوته : جعله عرس الدهر يا مروان وأبشر بالمعونه واللي يطيب خاطرك والله يبي بيتك يا أخوك
أبتسم مروان يتقدم له ويسلم عليه ، همس بإذن نجم ينطق بحدة : يويلك تكلف على نفسك والعرس بعد عرسك ان شاءالله
خبط نجم كتفه ينطق : عجل ولا تربط عمرك فيني أنا مطول وأقولها وأنت تسمع
مروان : وأنا ماني مستعجل على شيء يا ولد عمي
نجم : أجل نتقابل بالحلّة ودعناكم الله وسلمونا على الجماعة وإطلبوا منهم الحل والسماح
زفر باسل ينطق بحدة : وش ذا الكلام يا أبوك الله يطول بعمرك !
أبتسم يصدّ عنهم ويخرج من المكان ، قفل الباب وراه وبدأ يراقب المكان بأنظاره وسرعان ما ضحك بسخرية ينطق : والله لعبت فيهم يا النجم لعب !
تقدم لموتره يفتحه ويركب ، قفل الباب وشغل الموتر يحرك من الموقع متوجه للمعسكر ..
« قصر مترك ، منتصف الليل »
ألتفتت على دخول عزيز للقصر وضحكت بسخرية تنطق : وش عندك جاي متأخر ؟
عزيز : تعشيت مع أهلي وجيت
وهج : وش قررتوا ؟
ميّل رأسه بعدم فهم ونطق : في إيش بالضبط ؟
رفعت وهج نفسها من الكنب تنطق : وين بتسكن ؟
ضحك عزيز بسخرية ينطق : ايه برجع لبيت أبوي
زفرت بضيق تنطق : عزيز أجلس معي !
أبتسم لها ينطق : ودي بس أنتي بعد كم شهر بتروحين لبيت نجم
وهج : طيب نعقد إتفاقية ما تروح إلا إذا رحت أنا
تقدم عزيز يجلس بجانبها وينطق : من عيوني الحين أكلم أبوي ما ينتظروني
أبتسمت بفرحة تثبت رأسها على صدره وزفرت بضيق تنطق : أنت الوحيد اللي ما ودي تتغير علي وما أضمن بيت أبوك وأهله يغيرونك علي
أبتسم يقبّل رأسها وينطق : لاحظت سكونك اليوم ونظراتك وش مزعلك من منكد عليك ألعن جده ؟
حاوطت بطنه بذراعيها تنطق : ما فيني شيء
عزيز : ما بضغط عليك لكن إذا بغيتي تتكلمين أنا موجود دايم يا وهج الدنيا
غمضت عيونها وسرعان ما تمردت دموعها عليها ، عضّت شفايفها تمنع دموعها تنهمر ، شّد عليها من حسّ بدفء أنفاسها ومن شعر فيها تبكي ، مسح على رأسها ينطق بضيق : الله يأخذه اللي بكاك !
دفنت وجهها ببطنه وزفر ينحني عليها يحتضّنها من كل إتجاه ، زفر يقبّل شعرها يستنشق عبيره ، أبعد ينطق : من قولي لا تخفينه عني علميني من هو عشان أحرق دنياه اللي بكى محاجرك
رفعت رأسها تمسح دموعها وزفرت تنطق : رأسي صدع بروح أنام
شّد على ذراعه ينطق بحدة : نجم ؟
رفعت عيونها الحُمر أثر البكاء بصدمة له تنطق : جاك خبر منه ؟
أرخى يده يترك ذراعها من ردها اللي أكد له إنه ما هو نجم اللي مضيق صدرها ، هزّ رأسه بالنفي ينطق بأستغراب : شلون يجيني خبر عنه ؟
تنحنحت تنطق بهدوء نبرتها : مدري يمكن سمعت جدي يتكلم ؟
أبتسم عزيز ينطق : ما سمعت وأوعدك إن سمعت بجيك طوالي
أبتسمت بخفه ومدّ ذراعه يحاوط وجنتيها وينطق : يكفي تضحكين يا وهج الدنيا
ضحكت بخفه وضحك ينطق : هذا هو !
تقدمت تحضّن رقبته ونزل ذراعيه يمسح على ظهرها ، زفرت ضيق صدرها تنطق : حمدلله إنك موجود
عزيز : ودايم موجود يا ريحة أمي أنتي
قبّل كتفها وأبتسمت تبعد وتقبّل وجنته ، أبتسم لها ووقفت تنطق : بطلع أنام وأنت ريح شوي
هزّ رأسه بالإيجاب ووقف معها ، توجهت للدرج تطلع لغرفتها ومشى عزيز يعاكس إتجاهها ويتوجه لغرفته ..
« غرفة وهج »
دخلت وقفلت الباب وراها ، تقدمت تجلس على كرسيها قدام التسريحة ، فتحت الجوال وضحكت بخفه من شافت رسالة ليلى اللي كتبت فيها : أصلًا نجم أطلق من نيار وش فيهم ذول !
ضغطت رقمها وأبتسمت من نطقت بغضّب : ساعة عشان تتصلين ؟!
رفعت وهج شعرها خلف إذنها ونطقت : كنت أبغى أجلس مع نفسي شوي
شهقت ليلى بصدمة تنطق : يا وسخه بكيتي !؟
أبتسمت وهج بخفه : شويه بس
زفرت ليلى بضيق تنطق : بيندمون على كل شيء سووه لك وقولي ليلى بنت صالح ما قالت !
ضحكت بخفه تنطق : أتمنى ما أضطر أنا أذوق مرارّة الندم
ليلى : ليه يا حبيبتي زوجك منصب ورتبة وإسمه يذكر بكل مكان وأهل زوجك عسولين مثل ما قلتي ليه تندمين ؟
وهج : ما أعرف بس حاسه بضيقة الله ييسر بس
ليلى : يا عمري عليك أجيك بكره ؟
وهج : كفاية تداومين وحشتيني
ليلى : تعبت شوي بس أبشري بداوم بكره الحين نامي وبنام أنا بعد
غمضت وهج عيونها بتعب تنطق : بنام مصدعة مره
ليلى : خذي لك دواء ونامي بس أهم شيء ماكله ؟
فتحت عيونها بتعب تنطق : يعني نص ماكله
ضحكت ليلى تنطق : ما يضرك ان شاءالله
وهج : أشوفك بكره ليلو ولا تنسين بوسي نفسك لي !
ليلى : وأنتي بعد جوجو
قفلت وهج وفتحت أول دولاب وسحبت الدواء منه ، أخذت حبه منه ومسكت كأسة الماء تشربه ، وقفت تنزل الكأس وتدخل بفراشها ، قفلت النور من جانب السرير وفتحت اللابتوب حقها ، دخلت الإيميل وطاحت عينها على إيميل قبل ساعات ومحتواه صور ، زفرت بتعب من أشتدت عيونها ومن زاد صداعها وأبعدت اللابتوب تقفله ، ألتفتت على وسادتها تدفن وجهها داخلها وتنام بعمق ..
« حلّة سهيل ، العاشرة صباحًا »
رفع عينه على نجلاء اللي دخلت مع الباب ، شّد عصاته يرفعها وينطق بحدة : إطلعي مني لا تشوفك عيوني !
عضّت شفايفها وبكت بدون صوت تنطق : أبوي..
قاطعها يوقف ووقفوا كل أخوانها معه ، زفر أحمد يوقف بجانب أبوه اللي نطق بحدة : طلعوها مني !
ركض نايف لأخته يسحبها ، بكت بعلّو صوتها ترتجيه وتنطق : يا أبوي مالي إلا الله ثم أنت وحيدتك من البنات يا أبوي !
أنقبض قلبه من كلامها ونطق بثقل : خلوها
تركها نايف وشهقت تركض له ، ارتمت بحضّنه وزفر ينطق بحدة : أحرقتي نفسك يا بنتي
رفعت عيونها له ونطقت بنبرة حزينة : آسفه والله ما اتعاودها والله..
قاطعها سهيل ينطق : روحي لبيت أمك ولما حليتي المشاكل اللي سويتها وكفرتي ذنوبك ووضح مستقبل بنتك تعالي بيباني لك مشرعة
سكنت بصدمة ودفعها سهيل عنه ينطق : خذوها مني
تقدموا نايف وعبدالكريم يمسكونها ، زفرت تتركهم وتنطق بحدة وعيونها عليه : أبوي لو طلعت مالي رجعه
عضّ سهيل طرف إبهامه بضيق وزفر رماح يصرخ بوجهها : أوها أقطعي صوتك وأمشي برا !
تقدم يسحبها من ذراعها للخارج ، دفعها يبعدها عنه وينطق بحدة : تلوين ذراعه عشانك وحيدته من البنات ؟!
ضحكت بسخرية تنطق : وش لك ؟ إطلع منها
رماح : لي إنك شوهتي سمعة ولدي وشهرتي فيه وورطتيه مع أهل السيّاف وأقدر بسهولة أجرك بالمحاكم يا بنت شاهرة !
تقدم لها ورفع إصبعه بتهديد ينطق : الحين تنقلعين من الحلّة كلها ولا تشوفك عيوني ولا قسم بالله إن أدفنك ما يهمني أختي الغير شقيقة ولا وحيدة سهيل أدفنك تسمعين وقولي العقيد رماح بِكر سهيل ما قال !
زفرت بغضّب تنطق : رفعت عزومك علي يا أخوي وسويت مثل سواة ولدك ؟
ضحك بسخرية ينطق : طبخٍ طبختيه يا الرفله أكليه أنتي بنفسك خليتي نجم عدوك واللي يعاديه نجم يلاقيني أول الناس بوجهه !
صدّ يعطيها ظهره ويرجع للمجلس ، شّدت على جلابيتها ومشت لبيتها ، رفع سهيل عيونه على رماح ينطق : أوجعتها
جلس رماح بغضّب ينطق : جعلها الوجع
ضحك أحمد بسخرية تنطق : ما أنت صاحي يا رماح
ألتفت على أخوه ينطق : رفعت سكري قسم بالله
مسك باسل ذراعه ينطق : أفحصه لك ؟
أبتسم من حفّوه أخوانه ينطق : ما يحتاج
مسلط : باسل قابلت نجم ؟
هزّ باسل رأسه بالإيجاب ينطق : ظني ما ذاق شيء إلا عشانا البارح
رماح : افا أجل نحف ؟
باسل : شويه بس واضح عليه
سهيل : يرجع سالم ويبشر بالكرامة
رفع رماح نفسه يقبّل جبين أبوه وينطق : ما له داعي يا أبوي
أبتسم سهيل ينطق : وش دخلك ذا نجم سهيل ما هو حيّ الله !
أرتفعت أصواتهم ينطقون بـ « الله الله » ، ضحكت الجوهرة من دخلت للمجلس تنطق : ماشاءالله حيّ أصواتكم يا عيالي
وقف أحمد ينطق : تعالي يميمتي
تقدمت تجلس بجانب سهيل وتنزل الفطور ، أبتسم سهيل ينطق : جعل حسّك عننا ما يغيب
نطقوا عيالهم الستة بـ « آمين » ، وأبتسمت تقبّل كف سهيل اللي سحب ذراعها يقبّلها ، أبتسمت برضى تنطق : أفطروا
دخلت العنود ووقفت تنطق : أجي ؟
ضحكت الجوهرة تنطق بسخرية : أخت غيث وش الكلام ذا ؟
ضحكت بخجل من نطق سهيل : أقلطي يا سيدة الغنادير
تقدمت تجلس بين عبدالكريم ومسلط تسمّي بالله ، مدّوا جميعهم أياديهم للصحن يفطرون والسوالف والضحكات تملأ المجلس ..
« المستشفى ، مكتب البنات »
رفعت عيونها على الباب وأبتسمت براحة من دخلت ليلى مستعجلة ، ضحكت بتوتر تنطق : تأخرت صح ؟
زفرت وهج تنطق بضحكة : كنت بقتلك لو ما جيتي
أبتسمت ترفع باقة الورد من خلف ظهرها ، توسعت عيون وهج بصدمة تنطق : ليلو..
قاطعتها ليلى تنطق بسخرية : مو مني لا تشكريني
رفعت عيونها تقابل عيون ليلى ونطقت بصدمة : مين ؟
ليلى : سليم يعني مين
زفرت تجلس على مكتبها وألتفتت ليلى عليها تنطق : شفيك نكدتي ؟
هزّت رأسها بالنفي تنطق : ولا شيء مستغربة إنه ما زال مصمم
ضربت ليلى المكتب تنطق بحدة : اخ لو الجنتل موجود ويهدّ فك سليم ينرفزني !!
ضحكت بصدمة تنطق : يسويها والله
ليلى : حمستيني لا تخليني أجيبه الحين
عضّت شفايفها بهدوء تنطق : أحسن ما تسوين !
صرخت ليلى بحماس تنطق : بنتي عشقانه
غطت وهج وجهها بكفوفها تنطق : ليلو أعقلي
ضحكت ليلى تنطق : وش بتسوين بالورد ؟ ليه ما تصورينه يمكن أخته نقالة علوم ؟
وهج : حتى لو بتنقل هو ما يتصل فيها أساسًا بس بأخذها وأرميها على سليم
وقفت تسحب الباقة وضحكت ليلى تنطق : كفو والله
فتحت الباب ومشت تخرج ، تقدمت بالورد للاستقبال وركضت ليلى خلفها ، وقفت ووقف سليم بصدمة ، ألتفتوا جميع الموظفين في الاستقبال لوهج الواقفة على رؤوسهم وبيدها باقة ، زفرت بغضّب ترميها على وجهه وبدورها سقطت على الأرض تنثر أوراقها ، رفعت كفها بوجهه تنطق بحدة : شايف دبلتي ولا إيش ؟ أنا وش قلت لك آخر مره ؟!
ألتفت بصدمة على ليلى اللي رفعت أكتافها وضحكت ، عضّ شفايفه ينطق بهمس : ما أعيدها بس قصري صوتـ..
طارت عيونها بصدمة تصرخ بوجهه : إيش ؟؟
طار وجهه من أنضرب على فكه وشهقت بصدمة تلتفت على عزيز الواقف بجانبها وسرعان ما لمحت الإسعاف برا والطاقم يركضون لها ، زفر بغضّب ينطق : أقلع وجهك يا نجس !!
ألتفت عليها يسحبها من ذراعها ، صدّت ليلى بخجل من الموقف وضحكت تهمس بـ : لقيت الجنتل حقي !
ركضت خلفهم وتجمعوا الناس بين سليم والإسعاف بالخارج والسكيورتي انتشروا بينهم يحاولون جاهدين يقللون من الازدحام ، وقفت تسحب ذراعها وتنطق : عزيز وش فيه ؟؟
وقفت ليلى بينهم ونطقت : صراحة كفو عليك
ألتفت بنظرته الحادة على ليلى وسرعان ما ارتخى من لمح بنات آل جراح وشجاع معهم يهمس : أهل رجلك
ألتفتت وهج بصدمة تنطق : يارب ما شافوا شيء !
توجهت للمدخل تركض لهم ، خرج مروان من مكتب أبوه بصدمة من وصله الخبر ، تقدم لشجاع ينطق بصدمة : فيكم شيء ؟! وش صاير
زفر شجاع بغضّب ينطق : إنقلبت السيارة وهم سارحين للجامعة الصباح ودوبه وصلنا خبر
تقدمت وهج بصدمة لهم تنطق : صار لكم شيء ؟
ضحكت أسيل وسرعان ما أنفجرت تبكي ، مسح شجاع وجهه ينطق : انطمي يا أسيلوه
زفرت تلتفت على شجاع وتنطق : أخو مسعود لو سمحت من حقها تبكي اللي مرت فيه مو سهل !
شجاع : الله أكبر تدخل داخل وتبكي براحتها ما هو قدام الناس وتحت مسامع عيال الحرام !!
ألتفتت على أسيل تهمس لها : أخوك صاحي ؟
مسحت دموعها ونطقت بهمس : ايه بس غيور
ضربت وهج رأسها بصدمة تنطق : يارب الصبر من عندك
آشرت للطاقم الطبي يدخلونهم للطوارئ ، مشت تخرج وأبتسمت من تقدمت شمايل لها تسلم عليها ، أبعدت عنها تنطق : أنتي معهم ؟
شمايل : لا بسم الله علي بعيد الشر
ضحكت بصدمة تنطق : من كان في السيارة طيب ؟
شمايل : بنات الجيران ونجد وأسيل والتوأم بنات عمي عبدالكريم
وهج : كلهم بخير ؟
شمايل : ايه بس نجد تشكي من رجولها عشانها كانت قدام
ميّلت شفايفها بضيق تنطق : يا عمري وينها ؟
شمايل : جابوها بالإسعاف قبلنا
هزّت رأسها من فهمت ومشت تدخل ، تبعتها شمايل ودخلوا للمستشفى ، وقفت قدام عزيز وليلى تنطق : عزيز
ألتفت عزيز وطاحت عينه على شمايل ببرقعها وعيونها الوساع تلتفت بحذر يمين ويسار ، زفرت تضّبط برقعها وأبتسم بدون وعي من شاف غوايش الذهب بيدينها ، فزّ من ضربته وهج على صدره تنطق : وين وصلت يا ولد أختي ؟!
تنحنح عزيز ينطق : هلا والله ؟؟
ألتفتت شمايل من نطق وزفرت تصدّ وتتوجه للغرفة اللي واقف شجاع عندها ، زفرت وهج تنطق : دور لي نجد أكيد نقلوها للعمليات
رفع عزيز حاجبة بدهشة ينطق : من نجد ؟
ليلى : أخت نجم
مسح وجهه وشنبه وقال : لا حول ولا قوة إلا بالله أبشري الحين أشوفها
وهج : ثواني بجي معك
ركضت لشمايل وشجاع تنطق بربكة : نجم عنده خبر ؟
هزّ شجاع رأسه بالنفي ينطق : ما بنقوله لإنهم ما بيسمحون له يجي وبس بيجلس تحت ضغط بدون فايدة
هزّت رأسها بالإيجاب ومشت ترجع لكن أستوقفها شجاع من تقدم لها ينطق بضيق : نجد الأحباب لا تروح
أبتسمت بضيق تنطق : بعيد الشر عنها لا تقول كذا ان شاءالله إنها بخير لا تشيل هم
شجاع : أقدر أجي معكم
ألتفت على أسيل تنطق : وأختك ؟
شجاع : أخت منيف عندها
هزّت رأسها بقلة حيلة تنطق : تعال
عدّل شماغه يمشي وراها يتوجهون للبوابة اللي واقف عزيز عندها ، زفر شجاع من شاف عزيز وصدّ عنه ، تقدم عزيز اللي ما شل بصدره أي ضغينه على شجاع ينطق : خطاكم الشر ولا بأس عليكم
رفع شجاع رأسه لعزيز ينطق بحدة : الله يسلمك
زفر بغضّب يصدّ عنه ويهمس بداخله : ويبعدك !
تقدم عزيز ينطق بهمس : وش فيه منفس ؟
توسعت عيونها بصدمة تهمس له : أسكت لا يسمعك وبعدين أهله صاير عليهم حادث تبيه يضحك ؟
أبعد بصدمة عنها ينطق : أعوذ بالله حتى أنتي منفسه ولا عشانك أرتبطتي فيهم ؟
ضحكت بسخرية تنطق : دخلنا ؟
هزّ رأسه بالنفي ينطق : بدخل أنا أكلم جمال وأجيكم
هزّت رأسها له ومشى عزيز يدخل ويقفل الباب الزجاجي خلفه ، شّد على قبضته ينطق بحدة : وش بلاه دخل لحاله !؟
وهج : يتأكد من وضع نجد..
قاطعها من ضرب الباب الزجاجي ينطق بحدة : أفتحي الباب يا زوجة أخوي لا أقلب المستشفى على رأسه !
توسعت عيونها بصدمة تنطق بجدية : ما يصير يا أخو مسعود أنت في مستشفى مليان بالمرضى كبار سن كانوا ولا صغار التصرفات هذي تسويها في الحلّة مو عندي هنا !
فتّل شاربه بغضّب يوقف قدام الباب ، زفرت بصدمة تنطق بهمس : وش هالورطة ليه منفعل كذا بالرغم من إنه تارك أخته خلفه ، معقول نجم موصيه على أخته ؟
عضّت شفايفها بقلق من غاصت بالتفكير وقطع حبل أفكارها خروج عزيز وجمال بجانبه ، تقدم لهم ينطق بحدة : وش سويت ان شاءالله طلعت بشيء ؟
أبتسم عزيز بصدمة من انفعال شجاع ونطق : بالفعل نقلوها للعمليات
توسعت عيونه بصدمة ينطق : سألتك بالله فيها شيء ؟!
رفع عزيز أكتافه ينطق بهدوء نبرته : أنا جراح ما أقدر أجزم إنها بخير أو العكس بعيد الشر لكن يبي لها إنتظار
ألتفت شجاع بحدة على جمال ينطق : والتيس اللي جنبك !!
أنفجر عزيز يضحك بصدمة من أطلق شجاع هالمسمى على عمه ، توسعت عيونه بصدمة يآشر على نفسه وينطق : أنا ؟
شجاع : أنت والحمار اللي يضحك !
غطت ثغرها تكبح ضحكتها وتنطق : أخو مسعود
ألتفت عليها ينطق : أصبري يا بنت أمير
رجع نظراته على جمال ينطق : تحاكى وأنت ساكت
جمال : مثل ما قال عزيز
مسح وجهه وشنبه ومشى يغادر المكان متوجه لغرفة أسيل وتوأم عبدالكريم ، ألتفتت على عزيز تنطق : وش صاير ؟
دخل يدينه بجيوب اللابكوت ينطق : زي ما سمعتي ..
« قبل دقايق معدودة »
دخل الغرفة اللي تتواجد نجد فيها والدكاتره متجمعين حولها ، زفر الدكتور مساعد ينطق : يا أختي ما فيك شيء !
رفعت عيونها على عزيز تنطق بصدمة : ولد أخت وهج !!
توسعت عيونه بصدمة من عرفها ينطق : اها غليص صح ؟
ضحكت بصدمة تهزّ رأسها بالإيجاب من تذكرت شجاع ومشت توقف على رجولها وتنطق بهدوء نبرتها : أشد ظهري فيك ؟
ميّل رأسه ينحني لها وينطق : وش بخاطرك ؟
أبتسمت نجد تنطق : خاطري في أخوي وما بيرجع إلا إذا قلتم إني مهددة بالشلل
توسعت عيونه بصدمة ينطق : أعوذ بالله بتتفاولين على نفسك عشان يرجع ؟ طيب يخلص مهمته ويعود
هزّت رأسها بالنفي تنطق : أنت ما سمعت كلام أعمامي فجر اليوم كانوا يقولون إنه تورط مع السيّاف وأهله
رفع رأسه على الدكاتره وطاقم التمريض ينطق بحدة : اقلطوا ؟
زفر مساعد يخرج وتقدموا جميعهم للباب يخرجون ، قفل الباب خلفهم ونطق : أستريحي وقولي لي كل شيء
تقدمت للسرير تجلس ومشى عزيز يجلس بجانبها ، زفرت بخجل تنطق : ماهو بزين نختلي
ضحك بسخرية ينطق : ما بعد طمعت فيك يا أخت نجم
توسعت عيونها بفشلة تصدّ عنه ، حكّ شاربه ينطق : أسلمي
نجد : بنكذب عليهم فترة مؤقته إني مقدر أمشي
عزيز : بعدها ؟
نجد : إذا رجع نجم خلاص أمشي
ضحك ينطق بحدة : منجدك أنتي ؟
زفرت نجد بغضّب تنطق : ما صدقت يصير الحادث عشان أجيب عذر ويجي نجم يا تكون لي عون يا أقلب وجهك
بلل شفايفه ينطق بسخرية : معك والله بس كيف صار الحادث
نزلت عيونها تسكن بمكانها ، طارت عيونه بصدمة ينطق بحدة : مستحيل أنتي سبب الحادث ؟!؟
رفعت عيونها له تنطق بجدية : بس ما عليك أنقلبنا في طعس يعني مستحيل أحد يموت
وقف بصدمة ينطق : ولو مات أحد ؟؟
رفعت أكتافها بقلة حيلة تنطق : يومه
مسك رأسه يضحك مصدوم منها ، أبتسمت تنطق : لا تفضحني يا الدكتور
سكنت لثواني بتوتر وقرأت أسمه بالبطاقة تنطق : عزيز !
رفع حاجبة بدهشة ينطق : لا بالله ؟ شايف عيونك ترا
رفعت عيونها له بقهر تنطق : قهر كنت بصيدك بس ما مشت
ضحك بسخرية ينطق : قال تصيدني قال
مشى يخرج وتقدمت خلفه علطول تنطق : ما بتبلغ عني صح ؟
عزيز : أدخلي وبكلم اللي سماك غليص
نجد : شجاع
ألتفت عليها وأبتسمت تنطق : أسمه شجاع
هزّ عزيز رأسه لها ينطق بضحكة ساخرة : مافيه مشكلة شجاع شجاع !
هزّت رأسها بالنفي تنطق بصدمة : ما قصدي شيء بس أعلمك
عزيز : وأنا ما قلت شيء
نجد : أهم شيء يقتنع شجاع بالفكرة لأنه هو اللي بيوصل الخبر لنجم لا تنسى قول مهددة بالشلل وبالفترة الجاية لازم ما تمشي
هزّ رأسه بقلة حيلة يمشي للخارج وأستوقفه صوتها وهي تقول : عزيز خلها بيني وبينك ..
« المعسكر ، الحدود الشمالية »
رفع البريهه ينزعها من رأسه ويثبتها على كتفه ، زفر بغضّب ينطق : يبي لها حلاق والله
ألتفت عُدي بصدمة ينطق : شعرك !
ألتفت عليه ونطق بإستنكار : الله الله ، علامك انصدمت ؟
عدّل عُدي جلسته ينطق : تبي نصيحتي طال عمرك ؟
هزّ نجم رأسه بالإيجاب وأبتسم عُدي ينطق : الشعر الطويل زين عليك
رفع حاجبة بدهشة وفزّ عُدي بصدمة ينطق : لا لا ما عرفت أقولها والله خانني التعبير !!
ضحك بسخرية ينطق : افا عليك فاهمك يا الجارح أقعد
رجع بمكانه ينطق بحرج : أعذرني يا سيدي
وقف نجم يمدّ ذراعه لعُدي اللي تمسك فيه يوقف معه ، خبط نجم كتفه ينطق : أنا عارفك زين يا الجارح ولأجل معرفتي مشيتها لكن غيري بيوديك في ستين داهية
انحنى برأسه بفشلة ينطق : المعذره منك
دفع نجم جبينه وأرتفع رأسه ينطق بحدة : رأسك لا ينحني إلا لربك
أبتسم يضرب تحيته لنجم اللي صدّ ينطق : أستريح
مشى للخيام ورفع باب خيمته يدخل ، تقدم لنمر الجالس على الكنبة ينطق : عندي لك مفاجأة
جلس نجم بجانبه ينطق : خير ان شاءالله ؟
فزّ جراح على نجم وأبتسم ينطق : حيّ ولدي
بدأ جراح يلعق وجه نجم اللي أبعده عنه ينطق : بس بس يا جراح مليتني يا أبوك !
ضحك نمر ينطق : حظه ذا العوبر دامك ما تضحك إلا لحضوره
ألتفت على نمر ينطق : لأني ملزوم فيه
فزّ نمر ينطق بحدة : تكفى أسكت حفظت السالفة من كثر ما تعيدها ، هجمت عليك أمه وذبحتها وبعد ما ماتت أكتشفت إن عندها رضيع خذيته من مكانها وسميته جراح عشانه جرحك في خصرك خلاص !
رفع حاجبة بدهشة ينطق : علامك طشمت يا العقيد ؟
نمر : سد حلقك
آشر نجم على نمر وميّل نمر رأسه بعدم فهم وسرعان ما فزّ من هجم جراح عليه وخدش ذراعه ، بلل شفايفه ينطق بسخرية : أعتذر مني أشوف
هش نمر جراح اللي ظل متصلب وعيونه عليه ، ألتفت على نجم ينطق : أبعده الله لا يبارك فيه ولا فيك
صفر نجم لجراح اللي رجع له ، زفر نمر ينطق بصدمة : هذا وأنا مدخله بيتي ومأكله ومشربه أمحق طلع حتى الحيوانات غداره مثلها مثل البشر ، أجل وين الخلاص الحين ؟
ميّل نجم رأسه بسخرية ينطق : وشفيك قلبتها فضفضة ترا خدش !
زفر نمر ينطق بحدة : ببرك فوقك أنكتم يدي تنزف وأنت تنكت !!
نجم : اسين عليك يا أبو سعود
ضحك بسخرية ينطق : من وين جبتها ذي ؟
أبتسم نجم ينطق : عجلان يقولها مأخذها من خواله الجنوبيين
...
انتهى البارت ادعموني بنجمة وكومنت عشان اتحفز اكملكم 🤎