يانجمٍ وهج في حلّة سهيل

« ٢٢ »

-
نجم : اسين عليك يا أبو سعود
ضحك بسخرية ينطق : من وين جبتها ذي ؟
أبتسم نجم ينطق : عجلان يقولها مأخذها من خواله الجنوبيين
غمض نمر عيونه ينطق : أطلع أنت والقطو حقك بريح شوي
نجم : ودك أفك القطو عليك ؟
زفر نمر وأبتسم نجم بخفه ، دخل جراح القفص حقه وقفل عليه ، وقف ينفض يدينه ويخرج من الخيمة ، رفع عيونه للسماء والمطر اللي يهطل ، مدّ ذراعه قدامه يملأها بالمطر وأبتسم ينطق :
غيثٍ هنّي ينعش القاع
ذكرني بعذبة الأطباع !
-
بلل شفايفه يتقدم ويمشي تحت المطر ، شبهها بالغيث لأنها تنعش ذاكرته بطيوفها وتحيي قلبه بخيالها ، صغّر نظراته وسحب سلاحه يعشّقه ويثبته على كتفه ، سمّى بالله وأطلق وصاوب أحد الدخلاء اللي جاي من أطراف الحدود ، ألتفت عُدي عليه بصدمة ونطق نجم بحدة : أنتم بتجلسون غافلين وإلا والحدود مليانه بالعدو !
تقدم عُدي له ينطق بحدة : المعذره يا طويل العمر المطر..
خبط نجم كتفه ينطق بحدة وعيونه على العساكر خلفه : ما أبغى أسمع أعذار هذاني تحت المطر وشفته وهو على بعد عشرة كيلو والمره الجاية بتكون عشرة أمتار فقط ، نتكلم عن وطن يا عسكر !
ضربوا تحية جميع وضرب نجم تحية لهم ينطق : أستريح
استراحوا جميع ونطق عُدي : أرتاح..
نجم : أنا بمسك الليلة أنت أرتاح
أبتسم عُدي ينطق : اللي ودك فيه
مشى نجم يطلع للحصن بأعلى الهضبة ، دخل فيه وسحب القناصة يلقمّها بالرصاص ويثبتها بمكانها ، فتح العدسة وقرب عينه منها يراقب المكان ..
« حلّة سهيل ، مجلس الحريم »
دخلت ريمان بالقدوع تنزلها على السفرة وتقدمت تجلس بجانب سهام ، زفرت الجوهرة تنطق : وين ذلفت شاهرة ؟
شهقت العنود بصدمة تنطق : أم رماح ما عندك علم ؟
الجوهرة : لا والله يا العنود وش العلم
عدّلت حياه جلستها وكملت العنود تنطق : راحت بيت أهلها
الجوهرة : بس ؟
العنود : ومعاد لها رجعة
شهقت حياه بصدمة تنطق : إيش ؟ ليه !؟
ألتفتت العنود عليها تنطق : والله ما أعرف يا أم دحيم
حياه : مستحيل عمي يخليها
ضحكت سهام بسخرية تنطق : إلا أصلًا الطرده جاتها من عمي
ضحكت ريمان تضربها وزفرت الجوهرة تنطق : من اللي قاله يا أم شجاع ؟
سهام : مسلط يقوله
الجوهرة : ومن وين سمع مسلط ؟
ألتفتت العنود على الجوهرة تنطق : من سهيل أكيد !
سهام : الله الله سمع من عمي
وقفت حياه تنطق بربكة : طيب نجلاء عندها خبر باللي حاصل ؟!
ريمان : لو هي تجلس معنا وتقابل أهلها بيكون عندها علم
زفرت حياه تنطق بسخرية : الله يا ريمان والفضاوه اللي عند نجلاء ؟ مشغولة ببنتها وزواجها
أبتسمت حور تنطق : أنا بعد مشغولة بزواج ولدي ومع ذلك جيت وجلست مع عماتي وسمعت سواليفهم وخذيت أخبارهم
زفرت ريمان تنطق بسخرية : أم دحيم ما عاد عرفت شلون تعذرها هذاني أجهز لزواج نجم وما سويت سواتها !
الجوهرة : خلاص أنتي وهي ، أم دحيم
ألتفتت حياه على الجوهرة تنطق : سمّي يا عمتي ؟
الجوهرة : روحي نادي نجلاء وتعالي أنتي وياها
هزّت حياه رأسها بالإيجاب وخرجت من المجلس ، ألتفتت الجوهرة على حور تنطق : أم مروان وش قصة الزواج ؟
حور : الموضوع ما حصل قدام عيوني يا عمتي جاني باسل وقال مشينا للشمال ورحت معه وقالي السالفة بالطريق
الجوهرة : يعني سهيل اللي موصيّه ؟
هزّت حور رأسها بالإيجاب تنطق : ايه وحمدلله كان مروان راضي ويبغى البنيّه وقبلت فيها لأني أعرفها
فزّت سهام تنطق بصدمة : هذا البلا إنك تعرفين غرور وتوافقين عليها تكون زوجه لولدك !!
حور : حرام وش أسوي بعد أرفض وأقوم الدنيا ؟ أساسًا باسل ما بيعطيني فرصة أقوله رأيي فيها لأنه خرج من مجلس عمي وهو خلاص مزوجهم
ريمان : الله يهديها ويصلح قلبها هالغرور
زفرت الجوهرة بغضّب تنطق : البنت مالها ذنب كل هالدوشة تبدأ وترجع لحضّن شاهرة بنت زابن !
سهام : عمتي لا تنسين نجلاء..
قاطعتها نجلاء اللي دخلت ونطقت : وشفيها نجلاء !؟
توسعت عيون سهام تنطق : شفيك مشتطه يا أم غرور نوينا نكشت وقلت لا تنسون تعلمون نجلاء
أبتسمت ريمان بسخرية تصدّ بوجهها عن نجلاء اللي تقدمت تجلس ونطقت بحدة : وأنتم ماشاءالله فاضين للمكشات وأمي ماهيب فيه ؟!
رفعت العنود حاجبها تنطق بسخرية : وش تبين نسوي يا نجلاء ؟ ندخل بحداد عشانها ما هي بموجودة !
وقفت نجلاء بصدمة تنطق : أعنبوكم أنتم أهل !؟!
ضربت الجوهرة بعصاتها تنطق بحدة : أقطعي وأخسي يا قليلة الأدب قومي اذلفي من وجهي الشرهه علي أنا يوم أخلي أم دحيم تناديك !
زفرت نجلاء تخرج من المجلس ووقفت حياه معها ، ألتفتت الجوهرة بحدة عليها تنطق بغضّب : أجلسي يا حياه لا تخليني أتحسف إني زوجتك ولدي عبدالكريم !
عضّت شفايفها بربكة تجلس وزفرت الجوهرة تستغفر ربها ..
« المستشفى »
دخل السبحة بجيبه ومشى لنفس الوجهة ، تقدم من شاف عزيز وجمال يتقهوون قدام باب العمليات ، رفع حاجبة بدهشة ينطق : ماشاءالله مروقين ؟
زفر جمال ينطق : يا أخوي تراك أشغلتنا
سحب شجاع الكوب من يده ونطق بحدة : والله لا أروشك بالقهوة ذي وبعدين محد أشغلنا إلا أنت شغلت بالي عليها وبدال ما تتقهوى مع الزلابه اللي جنبك عطني خبر عن نجد وطمن قلبي عليها !
زفر جمال بغضّب ينطق : يا أخوها المريضه نجد مهددة بالشلل السفلي وأجريت لها عملية وبتجلس يومين إلى أربع أيام عندي وتحت ملاحظتي وبعدها بقرر وش بيصير فيها
ارتخت يده وفلّت الكوب منها يهوي على الأرض ، تقدم عزيز يمسك شجاع وينطق بصدمة : سمّ بالله يا شجاع !
ألتفت بصدمة على جمال ينطق بسخرية : فيه أحد ينقل خبر مثل كذا بالطريقة هذي !؟
جمال : أعرف إني غلطان بس رفع ضغطي وأنا عمك
رفع عزيز حاجبة ينطق : من وأنا عمك واضح ما حسيت بالذنب !
ضحك جمال يهمس بإذنه : ما أقدر أمثل وأنا داري إنها خطة
رفسه عزيز وشهق جمال بصدمة ، سحب شجاع ذراعه من عزيز ومشى يغادر المكان ، أبتسم عزيز ينطق : كويس أظن مشت عليه وبيروح يكلم نجم الحين
جمال : وكل الفضل يعود لي لو ما قلت له بالطريقة المفاجئة ما مشت
ركضت وهج لهم تنطق : شجاع جاني وخذا البنات ومشى وش سويتوا له ؟؟
جمال : والله يا خالة عزيز ما سوينا شيء
رفعت حاجبها تنطق : الدكتورة وهج أسمي !
ضحك جمال بصدمة ينطق : ترانا في مستشفى مو بميدان عسكري الله يهديك يا وهج
ألتفتت على عزيز تنطق بحدة : دق خشمه عشاني
ألتفت جمال بضحكة ساخرة ينطق : ما يقد..
قاطعه عزيز من ضربه على خشمه وسرعان ما خار على الأرض من أختل توازنه ، ضحكت ترفع نفسها تقبّل خد عزيز وتنطق بفخر : تدري إني أحبك ؟
أبتسم عزيز ينطق : محد ما يقدر يحبني أساسًا
زفرت بعبوس تنطق : أوف يا عزيز !
سحبها عزيز يحتضّنها وينطق : يا عيون عزيز ؟
وقف جمال يرفس ظهر عزيز اللي طاح وطاحت وهج معه ، أبتسم يمسح خشمه وينطق بسخرية : عصفورين بحجر مشى يتخطاهم ونطق بعلّو صوته : تستاهلون وأنت يا الزلابه على قولة شجاع الله يفتح عليه ، أفزع لعمك المره الجايه ماهو لخالتك
توسعت عيونه بصدمة من لسعته وهج بسماعاتها الطبية ، فزّ من حسّ بحرارة اللسعة ونطق بحدة : الله يحرق عدوينك !
رفعت حاجبها تنطق بحدة : ما أحتاج فزعة أنا أجيك بنفسي وادقك دق تسمع ؟!
زفر بألم ونطق بحدة وهو يفرك مكان اللسعة : أنتي كيف أخت سمو ؟ كيف إبليس أخو لملاك !
وهج : الحقيقة إن كلامك يمثل وضعي بينك أنت ونيار
تقدمت تتخطاه ووقفت تنطق بسخرية : تصدق عاد أنت ونيار كلكم على بعضكم شياطين حسنتكم الوحيدة عزيز
مشت تخرج من الممر وألتفت جمال بصدمة على عزيز اللي طايح ويضحك ، تقدمه له يجلس القرفصاء وينطق بصدمة : أجل شياطين وأنت أضحك عشانها تسبني وتسب أبوك غير والله أن أعلمه
مدّ عزيز ذراعه ووقف جمال ينطق : خالتك تقومك
مشى يتجاهل ذراع عزيز اللي وقف ينفض ملابسه وينطق بضحكة : طيب ليه زعلت وتحسست ولا عشانها قالت الحقيقة ؟
زفر جمال بغبنه ينطق : حرام لو ما هي متملكه إن أتزوجها وأعلمها الشيطان بأم عينه !
ضحك عزيز بسخرية ينطق : وش بتسوي ؟
جمال : بعرس عليها من أول ليلة
ضحك بعلّو صوته يدفع عمه وينطق : عيب عليك هذي وهج ماهي حيّ الله !
ضحك جمال ومشوا يخرجون من المستشفى ..
« داخل الجمس »
زفرت أسيل من حسّت بالغثيان تنطق : شجاع وقف
ألتفت أخوها عليها ينطق : شفيك ؟
سرعان ما فزّت ترفع نفسها وتنطق : شجاع بستفرغ !
زفرت شمايل بقرف تنطق : أفتحي الشباك وتنفسي ما فيك شيء
فتحت أسيل الشباك وطلعت رأسها ، رفعت جزء من البرقع وزفر شجاع ينطق بحدة : دخلي رأسك عادنا فالمدينة !
وقف شجاع عند الإشارة وزفرت أسيل بتعب ، رفعت عيونها على السيارة اللي صفت جانبهم وتوسعت عيونها من عرفت الشخص اللي بداخلها ، ألتفت عمر على أخته اللي صرخت بصدمة تنطق : أسيل !!
رجع بنظراته للسيارة اللي تناظر أخته فيها ، وتلاقت عيونه بعيون أسيل اللي توردت ملامحها من لمحته على أرض الواقع ولأول مره ، زفرت توترها المفاجئ وأبتسمت تلوح لصاحبتها سيدرا ، طارت عيون شجاع يصرخ فيها وينطق : ألعن ثواك من تسلمين عليه !؟؟
شهقت أسيل بصدمة من نست وجود شجاع بجانبها ، هزّت رأسها بالنفي تنطق بتوتر : وجع ان شاءالله صديقتي بالجامعة شفيك أنت !
ضحكت جمان بصدمة تنطق : سيدرا بنت جاسر صح ؟
هزّت أسيل رأسها بالإيجاب ونطقت : شجاع بالله وقف أبغى اسألها عن الفاينل اللي اختبروه اليوم
زفر شجاع بسخرية ينطق : تستهبلين تراه شارع رئيسي ماهوب حوش سهيل
زفرت أسيل ترجع نظرها للشباك ومرّت سيارة عمر أخو سيدرا ، ألتقت عيونها بعيونه وشّدت على كفوفها ، أبتسم عمر لها وسرعان ما أحمرت خجلاً من إبتسامته العفوية ، أخذ المخرج وأبتعد عن طريقهم ، هزّت رأسها تتناسى شكله وإبتسامته للتو ، عضّت شفايفها ما تخفي الحُب من طرف واحد اللي تكنه لعمر ، وابتدأ حُبها له من جوال سيدرا وقت توريها صور العائلة بكل إجازة وعيد ، كانت تتجاهل جميع من في الصورة وتركز على عمر ، هي خجولة وما تقدر تفصح بمشاعرها خوفًا من إنها تخسر سيدرا اللي تكون الأمل الوحيد لأجل يعيش هالحُب المبني على صور ومقاطع ، لكن بعد الإبتسام فقدت كل حواسها وغاصت فالبعيد تبحر بحُبه وبجماله ورجولته ، شّدت على فخذها من تذكرت كيف لفّ بالدركسون يأخذ المخرج وشحّ بنظره عنها ، شهقت من نطق شجاع : وشفيك تتعصرين ؟
زفرت بتوتر تنطق : تعبانه شوي !
صدّ شجاع يكمل طريقه للحلّة ، هو فكر وأنتهى وقرر يتصل في نجم ويقوله كل اللي حاصل ، بالأخير نجم بكل مره يغادر لمهمة يحط نجد أمانه عند شجاع والآن شجاع بنفسه ما يضمن سلامتها ولأجل كذا قرر يعطي نجم خبر ..
« قصر مترك ، الصالة »
دخلت هنادي وتقدمت تجلس ، رفعت عيونها على وهج اللي جالسه قدامها وتطقطق على اللابتوب حقها ، ألتفتت على أمها من نطقت : شرايك نسهر مع سمو ؟
وهج : ما عندي مشكلة بس خليها تجي عندنا أنا وأنتي أكثر وعزيز موجود بعد
هنادي : وش الكسل ذا قومي معي
زفرت وهج تنطق : مو مسألة بس ما فيني حيل ألبس عبايتي
هنادي : بكل الأحوال بتلبسين
وهج : تقصدين نسهر في بيتها ؟
هزّت هنادي رأسها بالنفي تنطق بسخرية : لا يا شاطره نسهر برا
دخلت وهج على الإيميل تشيك على المرضى ورسايلهم ، ألتفتت على أمها اللي تقدمت لها تنطق : خلاص سكريه وقومي !
زفرت تقفل الإيميل وتوقف مع هنادي اللي توجهت تأخذ عبايتها من روزا وتلبسها ، تقدمت وهج تلبس عبايتها وتنطق : بس بشرط نمر على الكوفي اللي أحبه
هنادي : لو تبين نجلس فيه بعد
أبتسمت تحتضّن أمها وتنطق : ياليت منك يا أمي إثنين
أبتسمت هنادي تقبّل جبين بنتها وتنطق : والحمدلله إن فيه منك يا وهج بعايلتنا
تقدمت تخرج وتبعتها هنادي ، مشى عيسى بالسيارة يصفها قدام الباب ، أبتسمت وهج بصدمة تنطق : ماما ؟
تقدمت هنادي لعيسى وفكت الباب تنطق : Only Ladies
*فقط السيدات*
هزّ رأسه من فهم ونزل من السيارة ، ركبت هنادي وضحكت وهج تركب بجانبها وتنطق : عاشت بنت يوسف !
أبتسمت هنادي تنطق : عشتي يا بنتي !
حركت السيارة تخرج من أسوار القصر ، ألتفتت لوهج بنظرة خاطفة ورجعت نظراتها للطريق تنطق : دقي على أختك
وهج : أرسلت لها وقالت تمام
هزّت هنادي رأسها بالإيجاب تنطق : ان شاءالله ما تطول ودي نرجع قبل يجي أبوك
توسعت عيون وهج من تذكرت ونطقت بحدة : جد ماما وين أمي مزنه ؟؟
زفرت هنادي بضيق تنطق : كثرت زياراتها للمستشفى فالفترة الآخيرة وآخر زيارة كانت قبل يومين
وهج : ايوه ؟
هنادي : قالوا لنا بتجلس عندنا لسلامتها
وهج : وين طيب إيش المستشفى ؟
ألتفتت هنادي عليها تنطق : مستشفاك
زفرت وهج تنطق بصدمة : والله عيب عليكم ما تقولون لي عيب الحين بتشيل بخاطرها علي بتقول وين بنتي الدكتورة تشتغل معي تحت نفس السقف ولا تسلم علي !
هنادي : تعرفين عمتي ما تقول كذا
وهج : أنا بشرهه على نفسي تبينها ما تشرهه ؟
هنادي : قولي ما عطوني خبر وبس
مسحت وهج كفوفها تنطق بسخرية : الخطأ خطأي ما سألت عنها إلا توو
هنادي : كلنا ننشغل يا وهجي لا تحملين نفسك شيء فوق طاقتك !
أبتسمت من كلام أمها وألتفتت على بيت نيار ، ضربت هنادي هورن وفتحت سمو الباب تخرج ، خرج نيار خلفها ونزلت وهج لأجل تركب أختها اللي تكبرها قدام ، أبتسمت سمو تسلم على خد وهج وتنطق : شدعوة خليك ما أعرف أكون معزز !
ضحكت وهج وألتفتت على نيار اللي نطق : وهج شخبارك ؟
أبتسمت له تنطق : بخير نسلم عليك
نيار : ما شفتك يوم جيت للقصر
ضحكت بسخرية تنطق : بالله ؟
ميّل نيار رأسه بعدم فهم وضحكت تنطق : شلون يعني أطلع قدامك ؟
ضحك بسخرية ينطق : وخير يعني أختي الصغيرة ؟!
ثبتت كفوفها على صدرها تنطق : جعلك دايم فالوجود يا نيار
نيار : ودعتكم ربي أنتبهوا لأنفسكم
هزّت رأسها بالإيجاب وتقدمت تركب بالخلف ، لوحت سمو له وأبتسمت من أرسل لها قبلة بالجو ، صدّت من نطقت هنادي : بسم الله على نيار مليح !
أبتسمت سمو تنطق بحب : خُلق وأخلاق الله يخليه لي دايم
ضحكت وهج بصدمة تنطق : وع شوفوا كيف تمدح زوجها !
ضحكوا كلهم وصدّت وهج بعيونها تفتح جوالها ، دخلت الهاتف ورفعت حاجبها من لمحت الرقم الثابت الموجود من ضمن المكالمات الفائتة ، ضغطت عليه ورفعته لأذنها ، فتح الإتصال ونطقت وهج بإستغراب : هلا مين ؟
ضحكت نجد بفرحة تنطق : والله إني ذيبه حفظت رقمك !
ضحكت بصدمة تنطق : أهلاً بالشيخة راعية الخطط
أبتسمت نجد تنطق بسخرية : كيف بس ؟ ان شاءالله مشت
وهج : حرام عليك طيرتي قلب شجاع !
شّدت على سلك التلفون تنطق : آخ لا تحسسيني بالذنب كذا
رفعت وهج حاجبها بدهشة تنطق : أسمعي بينكم شيء ؟
عضّت نجد على السلك تنطق : بيننا خطوبة
شهقت وهج بصدمة تنطق : لا عاد تستهبلين !!
ضحكت نجد تنطق : كلام بس وأبوي موافق
وهج : حلو حلو مره !
نجد : بس زوجك رافض
ضحكت وهج تنطق : كيف عرف ولا دق عليك مره ثانية ؟
نجد : لا يا بنت السالفة قديمة أيام كان نجم موجود ولا ما عاد دق علي
زفرت وهج تنطق بهدوء نبرتها : ماله دخل بينكم مو هو خذا اللي يبي خلاص يترك شجاع يقرر مع مين يكمل حياته !
أبتسمت نجد تنطق : عاشت زوجة أخوي عاد إذا جاء كلميه مثل ما كلمتيني تكفين ما هو تصيرين خوافة
ضحكت وهج تنطق : أبشري أنتي كيفك كيف عمليتك ؟
نجد : بخير بس طفشت وما ذاكرت المادة اللي عندي بكره
شهقت وهج بصدمة تنطق : عندك فاينل !؟
نجد : ايه كان عندي اليوم ما قالوا لك شيء البنات ؟
هزّت وهج رأسها بالنفي تدّعي إن نجد تشوفها ونطقت بصدمة : لا ما كلمتهم أصلًا بس شجاع قالي كانوا سارحين للجامعة بدون ما يقولي السبب !
ضحكت نجد تنطق : بقولك شيء بس لا تنصدمين
وهج : قولي أشوف
نجد : أنا اللي سويت الحادث
ميّلت رأسها بعدم فهم ونطقت : كيف ؟
نجد : لفيّت الدركسون وأنقلبنا فالطعوس
شهقت وهج بصدمة تنطق : يا ويحك يا نجد !
ضحكت نجد تنطق : وما سويت عملية كل هذي خطة عشان سببين الأول يرجع نجم قبل تخرجي والثاني أبغى أخذ فل مارك بدون تعب
مسكت وهج رأسها تنطق : لا ما أقدر أجازف
نجد :  لا تفكرين تتكلمين ياختي لا تخليني أندم إني فكرت أقولك
زفرت وهج بتوتر تنطق بجدية : نجد يا حبيبتي المسألة أكبر منك ومني نفترض وصل الخبر لأخوك ومن الخوف عليك يمسك خط بسرعة جنونية وحصل فيه خير ما هو شر ان شاءالله وش بيصير فيك !
نطقت نجد بنبرة حزينة : الخبر ذا ما يحرك في نجم ساكن
مسحت جبينها تنطق بغضّب : طز في نجم وأهلك طيب ؟ أمك وأبوك جدك وجدتك !؟
زفرت نجد تنطق بحدة : وهج الخبر وصلهم خلاص أنا خطيت خطوة معاد فيها رجعة أنا ما تفاؤلت على نفسي هالفأل عشان تخرب الخطة كلها !
وهج : يعني الجزء الأهم من خطتك نجم يرجع ؟
هزّت نجد رأسها بالإيجاب تدّعي إن وهج تشوفها ونطقت : ايه
وهج : خلاص أنا أكلمه يرجع
ضحكت نجد بصدمة تنطق : لا كذا أحذفك معه من حياتي !
زفرت وهج تنطق بسخرية : نجد شدعوة تغارين عليه مني ؟
عبّست نجد بملامحها تنطق : ايه
وهج : طيب نجرب ؟
زفرت نجد تنطق : ما أبغى خايفه يجي عشانك مو عشاني
وهج : بكلمه عشانك وبقوله إنك أرسلتي لي دعوة تخرجك وبسأله وش ذوقك ووش تحبين عشان أجيب لك هدية ومنها أذكره !
شهقت نجد تنطق : والله حلوه !
ضحكت وهج تنطق : شفتي الدنيا سهالات ماله داعي كل هالشو وآخر شيء ما تضمنين رجعته ، عطيني رقمه وأنا أكلمه لمن أرجع
فزّت نجد واقفه ونطقت بحدة : طيب أبشري والله الحين أعطيك بس خلي جوالي يفتح ، أوف يويلي وش بسوي ما ذاكرت مادة بكره ولـ..
قاطعتها وهج وهي تضحك وقالت : بشويش خلي الكذبة تمشي على الجامعة وأرتاحي يومين أنتي كم عندك مادة ؟
جلست نجد تنطق بتوتر : أربعة ليه ؟
وهج : ورا بعض كلها ؟
هزّت نجد رأسها بالنفي تدّعي إن وهج تشوفها ونطقت : لا
وهج : حلو يعني أول مادتين بعدها أوف بعدها مادتين ؟
نجد : الله عليك
وهج : خلاص أرجعي يوم الأربعاء على أساس إنك صرتي أحسن
نجد : طيب بكلم شجاع أصبري
أبتسمت وهج تنطق : حافظه رقمه بعد ؟
نطقت نجد بدون وعي : اللي أحبهم ما أنسى أدق التفاصيل فيهم ومن ضمنها رقم الجوال
ضحكت وهج تنطق : بعتبر نفسي محظوظه ؟
ضحكت نجد تنطق بربكة : يا حبي لك يا وهج محظوظه فيك والله حمدلله إنك زوجة أخوي حرفيًا أنتي الحسنه الوحيدة في نجم الأشهب !
ضحكت بعلّو صوتها تنطق : يا طعمك قسم بالله طعيمة !
نجد : خليني ألحق على شجاع
وهج : تمام ودعتك الله وقولي لجمال يشيك عليك
نجد : طيب مع السلامة
قفلت وهج الخط وشهقت بصدمة من لاحظت وجودها فالسيارة لوحدها ، ضحكت بسخرية تنطق : الوقت معها ومع أخوها يطير ومن دون شعور الموضوع وراثة ولا إيش الحكايه !
فتحت الباب تنزل وتقفله ، ضبطت عبايتها وتقدمت للكوفي تدخله ، تقدمت للطاولة اللي يجلسون حولها هنادي وسمو ، جلست وألتفتت هنادي تنطق : مين كان يكلمك ؟
أبتسمت وهج بسخرية تنطق : المعتوهه نجد
سمو : مين نجد ؟
هنادي : أخت نجم
رفعت حجاجها بفهم تنطق : اها كيفها ؟ سمعتك تقولين عملية
ضحكت وهج تنطق : غبية هالبنت بتجيب لي الجلطة !
ضحكت سمو تنطق بفضول : وش مسويه ؟
وهج : سالفة طويلة بس بخير ماعليك
هزّت سمو تلتفت على هنادي اللي نطقت : طلبنا لك مشروبك
أبتسمت وهج تحتضّنهم بذراعيها وتنطق : أحبكم
حاوطوها يبتسمون معها وأبعدت من تقدم النادل بطلباتهم ، سحبت مشروبها وأبتسمت تترشفه وتتلذذ ، نزلت نظراتها على جوالها ورسالة نجد برقم نجم ، أبتسم داخلها بفرح وأخيرًا لقت الوسيلة اللي تقدر منها تتواصل معه بأي مكان وبكل وقت ، عضّت شفايفها تقلبّ جوالها وتكمل حديثها المطول مع أمها وأختها ..
« حلّة سهيل ، المزرعة »
تقدم يسند ظهره على النخلة ويرفع ناظره تجاه السماء والنجوم ، زفر ضيق صدره وقلقه عليها ، هو أأكد على البنات ما يتكلمون عن نجد رغم أسئلتهم اللي ما تنتهي عنها ، ومثل ما تأكد إنهم ما بيتكلمون هو بدوره أخفى عنهم حديثه مع جمال عن حالة نجد سابقًا ، نزل عيونه من رنّ جواله يطلعه من جيبه ويفتح الإتصال ينطق : هلا مرحبا ؟
زفرت نجد براحة تنطق : شجاع !
توسعت عيونه فرحة وهدأت أعصابه وجميع حواسه من وصله صوتها الشجي ، أبتسم بوسع ثغره ينطق : عروق قلبه
أبتسمت بخجل تنطق : أوف يا الشايب مو وقتك !
ضحك ينطق بسخرية : أنا في وجه شيبانك لا تحرميني صوتك ولقياك يا نجد الأحباب ، كيف قلبك أنتي طيبه بشريني عنك ؟
أبتسمت نجد تنطق : بخير جعلك بخير وبقولك السالفة من بدايتها بس أول شيء أبيك تسويه تركب الجمس وترجع لي
فزّ يبعد عن النخلة وينطق بحدة : وش صاير !
نجد : ما بقول إذا ركبت الموتر علمني
رفع شجاع طرف ثوبه يعضّ عليه ويركض لجهة الجمس ، ضحكت بخفه من وصلها صوت أنفاسه وتخبط الجوال ، وصل للباب يفتح الجمس ويركب ، قفل وألتفت على أحمد اللي طلع من المجلس يأشر له ، زفر يترك ثوبه وينطق : ما هو وقتك يا حميد
ضحكت نجد تنطق : شجاع
فتح السبيكر ورمى الجوال على حُضنه ينطق : لبيه يا نجد العذية لبيه ؟
ركض أحمد وزفر شجاع يفتح الشباك وينطق : لا تجي يا أخوي
ألتفت على الجوال ينطق بحدة صوته وهو يهمس : نجدي لا يطلع لك حسّ ثواني بس !
قلبّ الجوال ورفع عيونه على أحمد اللي نطق : أول شيء أنا عمك ماني أخوك وبعدين بجي معك والله لا أجي !
زفر شجاع ينطق بحدة : حميد ترا بنزل عليك وأكسر وجهك فارقني هناك !!
تقدم أحمد يركب بجانبه وينطق بسخرية: والله ما أصوم ثلاث ليالي عشان سواد عيونك صاحي أنت وحرك يالله ونشوف من بيكسر وجه الثاني !
زفر يرفع الجوال ويقفل السبيكر ، ثبته على إذنه ينطق : أرحب غليص ؟
شهقت بصدمة وطاحت على السرير تضحك ، بلل شفايفه ينطق بهمس : خشني صوتك لا تذبحيني حيّ !
ضحكت بسخرية تنطق : بختصر عليك يا الشايب
ألتفت على أحمد اللي نطق : أسمه غليص ؟
هزّ شجاع رأسه بالإيجاب وكمل أحمد يقول : حسبي الله على أمه وأبوه وش الأسم ذا !
شجاع : حرام إنه يسواك في عيني ويسوى الجماعة والعرب كلهم والكفار بعد
توسعت عيون أحمد بصدمة ينطق : سلامات صدق منهو عليه وش قومني ما أعرفه ؟
شجاع : غليص رماح تعرفه ؟
ميّل أحمد رأسه ينطق : الشخصية البدوية ولد رماح أخو شيخ القبيلة أبو صايل ؟
ضحكت نجد وضحك شجاع ينطق : الله الله
ضربه أحمد من فهم ونطق بصدمة : والله إنها بنت
شجاع : أحلف ؟ ما دريت والله
شهق أحمد من فهم المقصد كامل ينطق : نجد بنت رماح !!
ضحكت نجد تنطق : وصلت خير عمو أحمد
أبتسم من سمعها ينطق : وين مسريته تالي الليل ياللي فيك ما يخطيك !
شجاع : أحد شكى لك ؟ خلها تسريني راضي عنها وأجيها على وجهي وش مزعلك ؟
توسعت عيونها تبعد الجوال عنها وتصرخ بالوسادة من فرط خجلها ، أبتسم شجاع ينطق : إذا طاريها يسريني لأبعد محل وأنا في مكاني ما تبيني أتعنى لها وهي طالبتني ؟
أبتسم أحمد يرمي عقاله وينطق : يويل رماح لو ما يزوجك ! أقلع إبليسك تمنيت إني بنت عشان تحبني مثل ما تحب نجد
ضحك شجاع بسخرية ينطق : والله اللي ما حبيتك مثلها
زفرت تهفّ على وجهها من أحترت ونطقت بحدة : يا الشايب بتسمع الحكاية ولا وش !
شجاع : أسمعك لباك أسمعك
أبتسمت تنطق بكل السالفة وتضم لها خطة وهج تحت صدمة شجاع وأحمد اللي بجانبه ، أنتهت من كلامها تنطق بربكة : شفيك سكتت ؟
ألتفت شجاع على أحمد المصروع بجانبه ورجع نظراته على الخط ينطق بصدمة : معاد معي من العقل شيء سعّد من جاك الحين وضربك على رأسك عشان تفكرين مره ثانية !
ضحك أحمد بصدمة ينطق : وهو اللي بيصير صدق الله لا يخليني إن خليتك !
ضحكت بصدمة تنطق : شدعوة حتى وهج ما انصدمت كذا
صرخ شجاع بحدة ينطق : أنتي ما فكرتي وش كان ممكن يصير !!
زفرت نجد تنطق بزعل : شجاع لا تصارخ علي !
ألتفت بصدمة على عمه ينطق : حميد أذبحني أنا طالبك
...
انتهى البارت ادعموني بنجمة وكومنت عشان اتحفز اكملكم 🤎