السلام عليكم ورحمة الله وبركاته
اعتذر جدًا جدًا للإنقطاع الطويل وللوقت والايام الطويله بشكل مبالغ بين مواعيد البارتات، انا واعيه جدًا ومستوعبه غيابي واختفائي وزعلانه مني اكثر من زعلكم علي، بس صدقوني هذا فعليًا شي فوق طاقتي
لكن لكن لكن
مهما طال الوقت واختفيت لايجي في بالكم إن هالشي يعني راح اترك الروايه، مستحيل اترك شي في منتصفه، على الاقل لو باتركه راح اعطيكم خبر اكيد مثل المره الاولى، ماهو اختفي بصمت!!
وايضًا انا يوم رجعت ونزلت الروايه كنت مجهزه نفسي ولا كان فيه خيار اني ارجع اقفل الروايه او اتركها ابدًا، لذلك خلوكم واثقين باذن الله الحي القيوم اني ماراح اترك الروايه وراح نختمها مع بعض ونكتب "تمت" ثم نغلقها، غير كذا لا.
ادري تنتظرون مني الاعذار وشرح اسباب الغياب، والله إني أُرهقت ولا احب ابرر وانا اشوف ان التبرير مامنه فايده، لكن لكم حق علي، والله العظيم إن غيابي ماكان الا لظروف وصعوبه للكتابه، كنت اذا لقيت وقت لنفسي اعيش فيه شوية رفاهيه افرح، القى وقت اتقهوى واعيش طقوس؟ افرررح، لان من كثر الضغط والله ما القى متنفس الا نص ساعه باليوم ساعه ساعتين، دراسه ونوم سيء وتعب نفسي وجسدي وحياة أعيشها، واذا جيت اكتب؟ ماقدرت وانا في عِز النفسيه السيئه، ما أتمناها لعدوي ولا لصديقي، لو بس تشوفون وش في نبض ورا الشاشات، بتقولون معذوره، ليه اصلا انتي تكتبين؟ اعتزلي
وصراحه قاعده اتخيلكم وانتم كارهيني ومو متحمليني وتهوجسون وتقولون ياليتك رقدتي ومارجعتي فتحتي الروايه يانبوضه وودكم تصفقوني، ادري ادري ادري، واعتذر مالي وجه والله
وفعليًا شكرا لإنتظاركم وصبركم وإلتماسكم العذر لي، شكرا شكرا شكرا، صدقوني مستحيه منكم ومقدّره لكم كل الانتظار، انا قبل اكون كاتبه تراني قارئه، وافهم وش معنى الانتظار والخيبه أشد الفهم
واللي ماله حيله ولاشدّه انصح يتركني ويترك الرحله معي، تراني اسوأ رحالّه بالعالم دايم اخلي فريق الكشافه كل عشر خطوات يمشونها يوقفون وينسدحون ويرتاحون عشر ساعات ثم نكمل نمشي عشر دقايق ثم نرتاح عشر ساعات، وسرا الليل وحنا ماسرينا ولاخلصنا رحلة الروايه، فاهربواااا
•
طيب تسألون متى البارت؟ مع الاسف البارت ممكن يتاخر شهر او شهرين او اكثر! لا اعلم لذلك اعذروني، ومع السلامه حبيباتي
•
•
•
•
•
•
هههههههههههههههه بالله كيف خفة دمي؟ بالله شرااايكمممم بس؟ اضحكوا لي بليز تراني ضحكت وانا اسوي المقلب
المهم تفضلوا البارت معليش كانت كوميدياء بسيطه
بس على فكره!! اللي انقهر يوم قرأ ان البارت بعد شهرين هذا اكيييد يحبني انا والروايه، واللي ما اهتم يطلع برا وش قلة الاهتمام والمحبه هذي؟ برا برا برا
وعشان يخف زعلكم برضو، يعني يمكن يمكن يخف، بأخلي سعود البارت الجاي يرجع، ان شاءالله انكم خفيفين مثلي وترضون بسرعه وتسامحوني *_^
ليه سوالفي اطول من البارت؟ مدري
