~ සමුද්‍ර සිහිනය ~

හතළිස් අටවන දිගහැරුම ~

මං තාමත් උන්නේ ඇස් නලලේ තියාගෙන....කොහොමද කියලා දන්නේ නෑ ඒත් එකපාරටම කොහේදෝ ඉදලා අපේ ගෙදර ඉස්තෝප්පුවෙන් මතු වුනු ඉශාර ඇවිත් උන්නේ තනියම නෙවෙයි මුළු පරම්පාරවක්ම එක්කගෙන වෙද්දි සෝපා එකෙන් නැගිට්ට මං දෙපාරක් තුන්පාරක් ඇස් දෙකත් පොඩි කරලා බැලුවේ මං මේ දකින්නේ ඇත්තක්ද කියන එකයි....දෙයියනේ මං මේ දකින්නේ හීනයක්ද නෙවෙයි නේද....? මේකා මොකද තකහනියක්ම මෙහෙ ඇවිත් කරන්නේ....අනික් එක....මේ පට්ටියක්ම එක්කගෙන ඇවිත්....නදීනුයි විසලුයි අපේ මනුස්සයා ගේ යාලුවෝ හතර දෙනාවයි සේරම කුදලගෙන මෙහෙ ඇවිත්....මෙවුන්ට මං නැතුව මෙච්චර සාංකාවයි කියලා දන්නවා නම් මං ගමේ එන එක නතර කරලා එහෙට වෙලාම ඉන්නවා නේ....මුලින් සමුද්‍ර දැන් යාලුවෝ....මිනිහා විතරක් නෙවෙයි මෙයාලත් මාව අතාරින පාටක් නෑ වගේ....ඇයි වදේ? ම්හ්ක් !

" ඒහ්...යකෝ උඹලා මොකද මෙහෙ කරන්නේ...?! "

එලියේ ඉඳන් දුවගෙන ආව අභී දත් තිස් දෙකම පෙන්නගෙන දොරෙන් ඇතුලට බෙල්ල දාන් උන්නු ඉශාරගේ කරට පැනලා අහද්දි අපේ තඩියා අභීව තල්ලු කරලා එකාගේ ඇඟේ ජරාවක් ගෑවුන ගානට ශර්ට් එක පිහදගෙ ගේ ඇතුලට ආවා....ඒ පිටි පස්සෙන් අර කුදලගෙන ආව පට්ටියත් ගේ ඇතුලට එද්දි සෝපා වල ඉදන් උන්නු අක්කලා දෙන්නා දඩිබිඩි ගාලා නැගිටලා එයාලාට ඉඩ දුන්නා....මං නම් තාමත් මුකුත් කියාගන්න බැරුව තුෂ්නිම්භූත වෙලා වගේ ගේ ඇතුලට ආව පට්ටිය දිහා බලාගෙන උන්නා....ඇයි වදේ? තව හතක්....දැන් නම් මහ ගෙදර ඉන්නත් ඉඩ නැති වෙයි වගේ....

" මෙහෙමද බං උඹලා අපිට සලකන්නේ ආ? සිහිනයා අපි ආවේ උඹව බලන්න...
කෝ බං ආගන්තුක සත්කාර...දැක්ක හැටියේ වෙල්කම් ඩ්‍රින්ක් එකක්වත් හම්බෙයි කියලා හිතන් ආවේ...කෝ ඉතින් උඹලාගේ කිසි කික් එකක් නෑනේ..."

" කික් එකක්? කික් එක බස්සනවා දැනගනින්...යකෝ එන්න කලින් කියලා එන්න එපැයි...අනික් එක මේ අවුරුද්ද දවසේ උඹලට ගෙවල් නැද්ද? වෙල්කම් ඩ්‍රින්ක්...පෙන්නනවා තොට ඩ්‍රින්ක් මං..."

" ආහා...උඹ මැද්දෙන් නොපැන හිටපන්...හරියට නිකං උඹේ ගෙදර වගේ නේ යකෝ...! "

" කට වහන් හිටපන් ඉශාර...උඹේ ඔය කැඩිච්ච කච කචේ එකදිගට පැය ගානක් අහන් ඇවිත් මට ඔලුව කැක්කුමයි..."