~ සමුද්‍ර සිහිනය ~

හතලිස් පස්වන දිගහැරුම ~

" සීන අයියේ..."

" ම්හ්හ්..."

" සීන අයියේ වතුර තිබහයි..."

" ම්හ්හ්...යන්නකෝ සඳූ..."

" අනේ එන්නකෝ තනියෙන් යන්න බයයි..."

" හුම් හුම්..."

මුනින් අතට පෙරලිලා උන්නු මං උඩුබැලි අතට පෙරලෙන ගමන් වැහුන ඇස් පියන් පොඩි කලේ සඳූ ගේ කියවිල්ල නරත වුනේම නැති හන්දායි....කෙඳිරි ගගාම වුනත් අමාරුවෙන් මං ඇස් ඇරලා බලනකොට සඳූ මං ඉස්සරහින් හිටගෙන උන්නා....දන්නේ නෑ දැන් වෙලාව කීයද කියලා නම්....

ඒත් අක්කලා එක්ක ෆිල්ම් බලලා නිදාගන්න එද්දි තුනත් පහු වෙලා තිබුණා කියලා නම් මට මතකයි....මයේ හිතේ තාම නින්දට වැටිලා මහ වෙලාවක් නෑ....උපරිම පැය බාගයක් යන්න ඇති....ඒත් ඉතින් සැනසීමේ ඇස් පියන් ඉන්න නම් මට හම්බුනේ නෑ....සඳූට වතුර තිබහක් ඇවිත් දැන් විනාඩි දහයක විතර ඉදන් මට වද දෙනවා....තනියෙන් යන්න කිව්වාමත් බයයිලු....අන්තිමට එකා වතුර ඉල්ල ඉල්ල පොඩි ළමයෙක් වගේ නහයෙන් අඬන්න ගන්නකොට බැරිම තැන මං ඇඳෙන් නැගිට්ටා....

මුලු ගෙදරම කට්ට කරුවලයි....ජනෙල් වලින් ගලන් එන හඳ එළිය හැර වෙන කිසි එලියක් තිබුණේ නෑ....සඳූ ගේ අතින් අල්ලගත්ත මං එයාවත් එක්කගෙන කාමරේ ලයිට් එක ඔන් කරන් එලියට ඇවිත් කොරිඩෝව දිගේ කුස්සියට ගියා....ඒත් ඉතුරු ටික සඳූට යන්න දීලා මං කුස්සියට යන්න තියෙන උළුවස්ස ලඟ නැවතුනේ මාව විසි වෙනවා වගේ හන්දා....මොකද මං කවදාවත් එච්චර වෙලාවක් නිදි මරලා නෑ....! අනික් එක ටැබ් ස්ක්‍රීන් එක දිහා එක දිගටම බලන් උන්නු හන්දා මගේ ඇස් දෙකත් දැවිල්ල අල්ලලා....
එකදිගටම ඈනුම් හය හතක් යනකොට මගේ ඇස් වලින් කඳුළුත් එලියට පැන්නා....අනේ දෙමියනේ ! ආයේ නම් මං නිදි මරන්නේ නෑ....පණත් නෑ වගේ....

උළුවස්සටම ඔලුව බර කරගත්ත මං දැවිල්ල ගත්ත ඇස් විනාඩියකට පියන් පාන්දර දැනෙන හීතල හන්දාම අත් දෙක බැඳන් උරහිස් අකුලුවගද්දි කුස්සියේ සින්ක් එක ලඟට ගිය සඳූ වතුරත් බීලා මූණත් යන්තම් හෝදගෙන මං ලඟට ආවා....

" සිහින අයියේ..."

" ඔයා යන්න සඳූ මං එන්නම්..."