العصر~
كان قاعد مع اياد بالحديقة الخلفية_ يساعده بإجراءات النقل من المستشفى الي يشتغل فيه لمستشفى ال مترك_رفع انظاره له: شهادتك ممتازة يولد ما شاءلله عليك
هز راسه عزام بابتسامة نزل انظاره اياد للملفات الي قدامه وعقد حواجبه:وين الملف حق المريض الي عطتك ياه امس؟
حك حواجبه يتذكر ووقف ينطق: بمكتبي شوي وجايك
هز راسه ومشى تاركه نظل انظاره للملفات الي قدامه
رفع راسه بذهول لصوت الانثوي الي وصله وشاف الماسة الي مركبه السماعة وبجامتها وقاعدة تتمايل على اغنية راشدالماجد كانت تغني مع الكلمات وهي مندمجة وماهي داريه عنه:
من يوم شفتك وقلبي مد يده لك يده
والعين ذابت في روعة حسنك وزينك
وقف بذهول من خوف انه عزام يجي ويفهم غلط مشى لها يسحبها ومامداها تستوعب لين سحبها خلف الجدار الي هناك رفعت انظارها له بذهول: انت!!
حط يده على فمها يسكتها وبهمس: اسكتي لو جاء عزام بيفهم غلط
ناظرته قاعد يناظرها ورفسته برجله: صد طيب
صد عنها بابتسامة ينطق: ادخلي برجع لعنده عشان مايشك، بعد عنها يرجع لمكانه والماسة الي دخلت بسرعة من الباب الخلفي، حط يده على جبهته يتذكر شكلها«اثاريك تحط ياولد وماحد سمى عليك»ضحك بخفوت على نفسه ورفع راسه من جاء عزام مع الملف.
__________________________________
كانت بغرفتها جالسه تفكر بحال هِتان الي ماحد داري عنها غيرها وطلعت جوالها تدق عليها: هتوني
هِتان وهي تلبس سترتها: لبيه
فيّ بجدية:جاية اخذتس اليوم لازم يعرفون عنتس
هِتان باعتراض: فيّ تك....
قاطعتها': مافي اعتراض الحين بجي اخذتس اتجهزي
سكرت منها بدون ماتسمع ردها وقامت تتجهز
عند هِتان عضت شفتها بربكة مترددة تروح او لا اخذت نفس تقوم وتتجهز
نزلت لاهلها بعد ماخلصت: يمه
كانوا جالسين بالصالة: لبيه
توجهت لهم تقبل راسها وراس جدتها: رايحة بجيب لكم هدية وغمزت باخر كلامها
رفعت حاجبها تنطق: الله يستر شعندتس بس
عليا: وش عندتس يافيّ
هزت راسها بالنفي: مو الحين اجيبها وتعرفون
طلعت من عندهم تتوجه لسيارتها تركبها ربطت حزامها تتحرك من قصر ال زايد الى بيت هِتان
نزلت بعد مالبست نقابها على صوت بوري السيارة توجهت تركب قدام وناظرتها فيّ تضحك: افا اخت فيّ ومتوترة؟
ناظرتها بطرف عين: ناظري قدامك ازين
ضحكت تصد للطريق وتتحرك لفت لها: تبين تشربين شي؟
هزت راسها بالنفي وقالت بطقطقة: خذي للي بالبيت عصفر يحتاجون
تعالت ضحكاتها من فهمتها وكملت تسوق
صفت سيارتها تنزل وهِتان الي نزلت معها مسكت ايدها تتوجه للداخل معها رفعوا اناظرهم الي كانوا متواجدين لهم من دخلوا والي كانوا(عليا وفتون ونادية والدانة ونياف ويزن)
عقد حواجبه يزن من المتواجدة وكان بيقوم لين نطقت فيّ: اجلس اجلس مابه من احد غريب
نطقت عليا: مين ذي يا فيّ؟
التفتت فيّ لها تهمس عند اذنها: نزلي نقابتس عشان ينجلطون شوي(تقصد انه لما تنزل بينصدمون لانه يزن ونياف موجودين)
ابتسمت من الفكرة تفك نقابها وفيّ معها
وصد يزن بذهول: اخو سلمان اخو
ونياف معه الي مفهي
فتون بذهول: شسالفه وبعدين كيف تفكين نقابتس قدام.... ماكملت كلامها من انتبهت للندب الي بخدها رمشت لثواني تستوعب الي تشوفه وذاكرتها ماتخونها ونطقت بتردد: هَي... هِتان؟؟
هِتان والدموع متجمعة بمحاجره هزت راسها بالايجاب، طاحت دموع فتون بشوق لبنتها الي ماحملتها وظنها انها ماتت تقدمت لها هِتان تحضنها وهي تبكي معها لفت فتون انظارها لعيالها: لا تصدون يا عيالي ذي اختكم
لفوا انظارهم الموجودين بصدمة ووقفت الدانة بصدمة: كيف اختي؟؟ يما شتقولين
هزت راسها فتون ودموعها ماوقفت: اختكم بالرضاعة هِتان بعدت عنها تتأمل وجهها والندب الي بخدها مستحيل تنساه من ايام كانت بالمتوسط افترقت عنها ووصلها خبر موتها او«اشاعة»لفت انظارها لعليا الي نطقت: هِتان بنت عبد الحميد؟
هزت راسها بالنفي تنطق: بنت الهنوف«امها» مانيب بنت عبد الحميد
جلست بالكنب مع فتون الي متمسكة بايدها ومكملة بكي تقدم نياف من شاف الوضع كئيب لهم وجلس جنبهم: يعني الحين ذي الحلوة اختي؟
ضحكت بين دموعها تنطق: اي يانياف
رفع حاجبه: وتعرفين اسمي بعد؟
هزت راسها تاشر ليزن الي لسا مصدوم: ويزن بعد وسلمان الي مسافر اعرفكم كلكم
بعد جلسه كلها دموع وتعرفوا عليها نطقت فتون: اهلتس يعرفون انتس حية؟
هزت راسها بالنفي: لا وماعندي اهل غير رائد
مسكت ايدها فيّ تقومها معها: امشي عند ابوي وجدي
مشت معها للمقلط الي كانوا جالسين فيه عبد الرحمن وراجح ومحمد وزياد وفيصل
دخلت عليهم مع هِتان الي مستحية وهي تسحبها: يبههه
لفوا انظارهم لها باستغراب من البنت الي معها
محمد: لبيه يبنتي وش بلاتس؟ واشر على هِتان بعيونه بمعنى مين ذي؟
ابتسمت فيّ: بنتك(لابسين نقابتهم)
طارت عيون الموجودون بصدمة من فهموه غلط
عبد الرحمن بحدة: وشو؟؟؟ متزوج انت الثاني وانا اخر من يدري!!
قبل يرد محمد ردت فيّ بضحكة:لا يجدي الله يهديك بنته من الرضاعة
زياد بفهاوة: كيف يعني؟ هو رضعها
صار صمت لفتره وسرعان ماتعالت ضحكهم على فهاوته والجد معهم هزت راسها تنطق: امي رضعتها ذي بنت عبد الحميد
توجهت معها لعبد الرحمن الي يتفحصها بعدم تصديق: وشو؟ مو قايلين انتس متي؟؟
هزت راسها بالنفي: قايلين هم
لفت انظارها لزياد: شخبارك يازياد؟
ناظرتها باستغراب: بخير؟
رفعت حاجبها تترقب ملامحه: شيل ايدك
ضيق عيونه يناظرها وسرعان مافز من تذكرها: راعية الدباب
هزت راسها بهدوء تصد عنه ونطق محمد: شسالفه؟؟
زياد وهو يناظرها: كنت بسوي حادث بسببها
لف انظاره فيصل له: كيف يعني شدخلها؟
زياد: تسوق دباب ومشت قدامي وهي مسرعة وعاد الله ستر
هِتان بابتسامة غبيه: كنت مستعجلة
لفت انظارها فيّ لهم: ممكن برا بلا مطرود؟ الاب يبي يشوف بنته
ابتسم زياد: عشانها مو عشان طردتك ذي
رفعت حاجبها تنطق: ذي الي عشانها عندها اسمها هِتان
ضحك يخرج هو وفيصل
نزلت طرحتها هِتان وفيّ
ناظر محمد الندبة الي بخدها وابتسم بحنان: اي والله هِتان شسالفتك يبنتي واشر لها تجي جنبه
حست بغصه من نادها بـ"بنتي " توجهت تجلس جنبه وقشعر جسمها من حاوط كتوفها بيده كم تمنت يكون ابوها مكانه ماعمرها ذاقته ماذاقت الا التعذيب النفسي والجسدي والاهانات بس الحين مين يذوقها ياه؟ ابوها بالرضاعة مايعرفها وتوه يعرفها وكلمها بحنان تمنته كثير حست بالانتماء الي تمنته رفعت انظارها له من شافها سهت وحركها
ناظرته تنطق بغصه وش صار لها وش وصلها لهنا وهذا الحالة واشاعة موتها
أنت تقرأ
احلى من العقد لباسه الماسه تلبس الماسة
Actionحاليا «احلى من العقد لباسه الماسه تلبس الماسة» حساب انستا وتيك: i7joo.r
