في قبضة الايسر

ورقتي الخـامسه

قشمرتني بـ ها حبيبي
و بعد ابوي
ومدري بأسماء
شكثر سميتني
راح أصدگ بالحِسب
نجمات ليل
وما أصدك
من گلت حبيتني .

ضحكت على سوالفها باسها بخدها والابنيه ساحت كامو يركصون واتذكرت خطوبتي اني وأحمد ومن كمنه نركص رفعت عيني اليفوك مانعه ابجي شافتني امي وهزت رأسها بحزن خلصنه ورجعنه كعدت اساعد امي وانطينه الكيك والعصير صارت دنيه المغرب واكفه أعزل بالمطبج وحسيت الدنيا افترت كمشت السنك حيل مانعه اوكع صار سواد بعيني وكعت فزيت على ضربات بوجهي ومي فتحت عيني ولكيت الكل فوك راسي صاحت أمي

سهاد: يمه بنتي افتحي عينج يمه

كعدت على حيلي لكيت نفسي بالهول على تخم والكل فوك راسي

ريفان:لتخافون ماكو شي شويه دخت وكعت

سهاد:اخ اخ اني امشي وراج بعد من الصبح ماخلت لكمه بحلكها اخ من اعنادج

نوريه:ميصير هيج يمه شنو تردين تموتين نفسج

حسام:كومي اكلي يمه سويلها شي تاكله

رفعت راسي ولكيت ايسر واكف كبالي يدخن جكاير ومضيك عيونه ويباوع هزيت راسي بمعنى شكو ابتسم رفعت عيوني ومالي خلك درت وجهي عنه

ريفان:اريد اصعد ارتاح

سهاد:اكلي واصعدي غير كلام بعد ماكو

ريفان:استغفرالله يعني هيه كوه اكل

لميس:أي كوه وغصب بعد

باوعلتها وابتسمت صحت

ريفان:الله عليج أخاف متقبلين

ضحكت وصاحت

لميس:وجع خليني اعيش دور عصبيه وكذا

الكل ضحك رحت يم بيبي حطيت راسي بحضنها باستني من راسي وكعدت تلعب بشعري

نوريه:شبيج يمه منو متعبج

زفرت بقهر وصحت

ريفان:اخ بيبي اخخ والله زين والحد هسه ضاله روح بيه

نوريه:اسم الله عليج حبوبه كون اليوجعج بيه ولا بيج

ريفان:اسم الله عليج بيبي

جابت امي الاكل اكلت وشلت الصنيه غسلتها الولد كاعدين بالصاله واحنه بالغرفه الجوه رجعت اتمددت على رجل بيبي وضلت تلعب بشعري ايدها بيها حنيه نعست وغفيت بحضنها

ورد:خطيه هاي ريفان نامت بحضنج بيبي

سهاد:يا نامت رفونه كومي نامي بغرفتج

صاحت عليها بيبي

نوريه:عوفيها يمه خليها اني اريدها يمي

سهاد:عمه مو أخاف رجلج تائذيج

نوريه:ماعليهن شي بنتج جنها ريشه خفيفه

مروه:واني بيبي هم خفيف