في قبضة الايسر

ورقتي الاولى..

‏لَيتَ الَّذي خَلَقَ العُيونَ السودا
‏خَلَقَ القُلوبَ الخافِقاتِ حَديدا

‏لَولا نَواعِسُها وَلَولا سِحرُها
‏ما وَدَّ مالِكُ قَلبِهِ لَو صيدا

‏عَوِّذ فُؤادَكَ مِن نِبالِ لِحاظِها
‏أَو مُت كَما شءَ الغَرامُ شَهيدا

سنـة 2015/6/14

احـدى بيوت بـغداد الجميـله

كاعده وعيني على باب والفرحه مسايعتني وكل شوي أكرص نفسي اريد اعرف اني بعلم لو بحلم حسيت صوت وراي التفت على مصدر الصوت وجان صوت امي

ام ريفان:مامه ريفانه عيب راح تجي الناس لاتضلين تباوعين

ريفان:ها أي يوم صار

رجعت ألمكاني واني الفرحه مسايعتني كعدت وصاحت بنت خالتي لميس

لميس:عوفيها خاله عوفيها من حقها غير اليوم خطوبتها وتفرح

خزرته لان هيه تعرف كلشي حاجيتلها عن علاقتنه وهيه هواي تجفص خايفه لو تكول حجايه وبعدين اروح بيها

ضحكت امي وصاحت:يمه منجن اخخ

ريفان:عفيه بنات شهل أغاني لميس تعالي طلعي

لميس:لميس لديكم لاخوف عليكم تددل لولو علينه

ضحكت ودزيتلها بوسه بالهوء ورا شويه اجه صوت خالتي وهيه تكول

ام لميس:اجو أهل العريس

حسيت دكات كلبي مسموعه شعوري بوكتها ماكدر اوصفه خوف على قلق على فرح فجاء طبو أهل العريس وكالو كولات اهلنه القديمة وهنه يهوسن

‏زفينه الولد ونريد هلهوله ولو موجود عمه جا لعب جوله

جانن يهوسن والفرحه مسايعتهن فرحت على فرحتهن رجعت بيبته كالت

الف عل خير يبنيه يمزيونه وخذتيلج سبع من فدوه لعيونه

صاحت أخته

فريده:هنيالج على اخوي والله اخذتيلج رجال سبع وابن غيره

نوب رجعت أمه كالت وهيه تباوعلي وتضحك

مساء الخير يهل الدار جينه نريد جنتنه

خجلت نزلت راسي واني هسه لو يذبحوني مايلكون نقطة دم بجسمي خلصو كولات اجو اهله سلمو عليه ومشالله هواي عماته وخالاته وبناتهم سلمت عليهم رجعت كعدت واني منزله راسي وايدي ترجف إجتي يمي لميس ندستني بخاصرتي وكالت

لميس:شبيج لولو ليش ترجفين المفروض تفرحين

رفعت راسي ابتسمت وكلت

ريفان:هاي رجفة الفرحه هيه مو اكو دموع الفرح بس اني بمكان الدموع لزمتني الرجفه

ضحكت وكالت

لميس:قاموس لولو الجديد

ابتسمت ورا شويه صاحت أخته

فريده:يلا ريفان حبيبتي الشيخ يريد يعقدلكم