مهمة رسمية (مكتملة)

مهمة رسمية 51

فصباح يوم جديد حل يونس عينيه بتعب و غير لاح عينو للمگانة و لقاها 9، قفز من بلاصتو بسرعة فاتجاه الحمام دوش و لبس حوايجو د الخدمة و نزل مسرع خطواتو لفين جالسين واليديه، الليلة الماضية رجع معطل من برا و لقا كلشي ناعس داكشي علاش كان كيزرب باش يهضر مع باه فموضوع ختو قبل ما يتحرك الخدمة..........

الدخلة اللي غيدخل للصالة غطيح عينو على اكرام و على زينب اللي جالسين مع واليديه كيفطرو، زينب اللي شهر و هي مكتخرجش من بيتها و ماباغيش يشوف كمارتها و اكرام اللي اش جاية دير فهاد الدار اصلا، غوبش و نطق موجه كلامو لواليديه

-يونس: صباح الخير

-الكل: صباح الخير

-ام يونس: ولدي اجي تفطر

-يونس عينو على باه: مافياش، الواليد اجي شوية عافاك بغيت نهضر معاك

-اب يونس: واخا..

-ام يونس: اجي خوذ غير قهيوتك د الصباح

-يونس خنزر: لواليدة مافياش، بالصحة

خرج و تبعو باه تحت انظار زينب اللي عينيها دمعو حيت كانت عارفة بلي هي من الاسباب اللي خلاوه مايجلسش في حين اكرام تنحتات ابتسامة صغيرة على ثغرها و السبب فيها هي عصبيتو اللي كانت كتبين بلي باقي عندها تاثير عليه...

فغرفة المكتب دخل يونس بعصبية و تبعو باه، غادي جاي مغزز على سنانو و ماحاملش المنظر اللي شاف قدامو

-يونس: شنو كادير هاديك تما علاش جات؟

-اب يونس هز ايديه و جلس فالكرسي د المكتب: ا ولدي انا عييت مع ماماك مكاتسمعش ليا اللي فراسها فراسها، لبارح جات دمعات عليها جوج دميعات ا حگا انا دفعت للطلاق و خفت يجي لعند ماما و نتوما الوحيدين اللي غتقدرو تحميوني منو

-يونس بغوات: واش هادي مريييييضة جايبة لنا الهم تال وسط الدار، واش حنا باغيينو يبعد منا و هي عاد مابغاتو يقرب منا!

و كيفما دخل رجع خرج مدرم لعندهم كينهج خلا مو و ختو يتخلعو

-يونس قصدها موقفها: نوضي ا ختي الله يرحم باك خرجي علينا من هاد الدار، حنا كنقولو للبلاء برا و نتي مدخلاه لينا تال قاع الدار

-اكرام ماعرفات باش تبلات، تصدمات و تحرجات قدامهم: يونس غير سمعني

-يونس قاطعها بانفعال: اش غنسمع لك ا ختي الا عندك شي مشاكل فكيهم بعيد على هاد الدار

-اكرام بدات تبكي: عافاك الا خرجت من هنا غيقتلني انا دفعت للطلاق و الا مشيت لدارنا غادي يجي لعندي و يقدر يدير فيا شي حاجة ديرني ختك