فالشركة المنافسة، مع دخل عماد للمكتب ديالو دخل عليه مراد بوجه مكيتفسرش، شاف فيه عماد و هو صاعر و عرف راسو غيزيد يصعر غير من وجهو
-عماد: طلقني طلق قول اش عندك
-مراد: البوليس لقاو عمر
-عماد حس براسو تخوا عليه سطل د لما طايب، جلس فالكرسي ديالو و شد راسو، حس بلي گاع الحيوط كيريبو عليه: شنو شدوه؟
-مراد: لا لقاوه منتاحر فالدار اللي كريتي ليه
-عماد هز فيه عينو مصدوم و وقف مامستوعبش شنو سمع: شنو كتقول
-مراد: هادشي اللي كاين ا سي عماد، ليوم فالصباح لقاوه جاهم بلاغ بلي شي واحد شافو داخل للعمارة و قرقبو عليه و لكن لقاو مول الامانة دا امانتو
-عماد عينيه دمعو: علاش علاش يقتل راسو مايستاهلش هاد الموتة
بالرغم من كلشي، محسن و عمر كانو قراب ليه بزاف و ضحاو على ودو ببزاف د الحوايج، واخا يقصى عليهم و يعاملهم خايب الا انو عمرو فكر ليهم فالشر او بغا ليهم الضرر، كيشوفهم خوتو و صحابو و كان مستاعد يدير على ودهم اللي كان و عمر توقع ليهم شي حاجة خايبة، محسن كلف ليه احسن محامي اللي يقدر يخرجو من القضية اللي هو فيها كيف الشعرة من العجينة واخا يعرف يحط عليه فلوسو كاملين حيث عارف بلي هو السبب فداكشي اللي هو فيه و مكانش ضارب حساب بلي ممكن يعيقو بيه و يمشي فيها...
اما عمر واخا ما صدقش فداكشي اللي وصاه عليه الا انو مكانش ناوي يتخلى عليه و ضرو خاطرو فاش عرف بشنو دار فراسو....
و قبل ما يستوعب الصدمة اللولة، جاه اتصال من نمرة ماعرفهاش و جاوب بفضول يعرف شكون
-عماد: وي هو انا
-سي عماد بغيناك تجي للوبيطال **** ختك مع الاسف دارت حادث مروع و فقدات حياتها و بغيناك تتعرف عليها
عماد سمع التصفار فوذنيه، ماتيقش شنو سمع، رجليه فشلو عليه و طاح جالس على الكرسي كيحاول يسترجع شنو سمع
-عماد: واخا تعاود شنو قلتي
عاود ليه الضابط بالحرف شنو قال و قطع مخليه يستوعب شنو سمع، تلاح التيليفون من ايديه بصدمة و وقف بصعوبة قال لمراد السمية د لوبيطال و خرج سابقو كاشارة فهم منها هاد الاخير بلي بغاه يوصلو....
وصل من بعد مدة قصيرة فالواقع و طويلة كالدهر بالنسبة ليه، غير صورتها بين عينيه اللي الدموع جامدين فيهم رافضين ينزلو، هو اللي كان ناوي يسالي خدمتو و يمشي لعندها، فالوقت اللي كان ناوي يسبقها عرف بموضوع الشحنة و صدق مأجلها مرة اخرى و مسبق حاجة اخرى عليها...
أنت تقرأ
مهمة رسمية (مكتملة)
Romanceهي قصة زواج اجباري اتفقو عليه واليديهم اللي كل واحد فيهم عندو غرض من داك الزواج، الاول اللي باغي يخرج ولدو من القوقعة اللي عايش فيها بسبب الغذر اما الثاني فكان عندو سبب قوي اللي مخليه يفكر يحط بنتو امانة عند صاحبو و ماغيلقاش شي حيلة من غير انو يزوجه...
