فالعشية فالڤيلا، نزلات زينب من دروج بالجرا كتجرجر فجلايلها بعبايتها الكحلة الطويلة و زيفها الرمادي، شافت فمها اللي واقفة كتسناها فالباب و كتشير ليها على الساعة ماخلاتهاش تهضر و خرجات من لباب و هي كتسد فصاكها الصغير، طلعات للطوموبيل اللي كان فيها باها و الشيفور و حيث عارفة راسها عطلاتهم ماحاولاتش تشوف فيه او تهضر معاه حتا طلعات ماماها اللي نطقات بعصبية
-ام يونس: خرجتي بالزربة زعما طفرتيه!
-اب يونس: مالك ا بنتي على هاد التعطيلة كلها! الناس غيكونو كيتسناونا
مجاوباتهمش، تكات راسها على الزاج و عقلها مشا لعند بنت خالتها اللي عرفات بحالتها الصحية و متحسرة حيت ماقادراش تشوفها او حتا تعاونها....
حسات بالطوموبيل وقفات و عرفات بلي وصلو، نزلات هي و واليديها بالوقفة د الطوموبيل د يونس و الطوموبيل د يوسف اللي معاه مرتو...
كان فاستقبالهم اب اميمة بوجهو البشوش و بابتسامتو الهادئة، سلم عليهم بحفاوة خاصة مع يونس اللي كانو ملامحو جامدة تحت انظار أسرتو اللي ما كانو عارفين يحسبوه فرحان ولا مقلق و لكن عل اقل كانو عارفينو جاي بخاطرو و هادشي اللي خلاهم مرتاحين انو هاد الزيارة غدوز على خير....
فالصالون كان كلشي جالس باستثناء اميمة اللي كانت فبيتها مع اسماء اللي جات عندها مورا اتصالها بها، دخلات لعندها و قلبها على ايديها من بعد ما شافتهم من لبالكون، شافت فاميمة المتوترة و هي كتمشي و تجي فالبيت ببيجامتها الطويلة و وقفاتها بايديها قبل ما تنطق موجهة لها الكلام بابتسامة عريضة
-اسماء: اميمة ختي نتي ياك؟ غير رفضيه انا نديه، وا نااااري هذا غير يبززوني عليه انا قابلة، الزين ا ختي الزين و انا عيني زايغة كنموت فالزين
-اميمة بنرفزة: واش باغا تمرضيني نتي؟ كنقولك غندير شي حاجة فراسي و نتي كتطنزي
-اسماء بجدية: نتي والله حتا مريضة، كون غير كان شي واحد فحياتك نقولو هانية السيدة كتحب، نتي وااالو زرگة بغيت غير نفهم علاش رافضة
تنهدات أميمة من أعماقها و جلسات على طرف سريرها كتحك فصبعان ايديها
-اميمة: را هادشي اللي خالعني ا اسماء، عمري عرفت فحياتي شي واحد والا بغيت اما هو را كان خاطب بنت خالتو و كيحماق عليها
-اسماء: و نتي باش عرفتيه كيحماق عليها؟ قالها لك هو؟
-اميمة: قالتها الصحافة و المجلات، هاداك اللي كتشوفي را من اشهر رجال الاعمال اللي تابعاهم الصحافة فين ما مشا و هادشي انا ماعنديش معاه مكنحملوش و حتا شخصيتو كتبان غريبة غير من داكشي اللي كنقرا ديما رسمي و مكايضحكش غير مغوبش
أنت تقرأ
مهمة رسمية (مكتملة)
Romanceهي قصة زواج اجباري اتفقو عليه واليديهم اللي كل واحد فيهم عندو غرض من داك الزواج، الاول اللي باغي يخرج ولدو من القوقعة اللي عايش فيها بسبب الغذر اما الثاني فكان عندو سبب قوي اللي مخليه يفكر يحط بنتو امانة عند صاحبو و ماغيلقاش شي حيلة من غير انو يزوجه...
