فجهة خرى، سفيان طلع لطوموبيلتو و حط راسو على لگيدون كيستذكر شنو وقع، كلشي وقع فرمشة عين و ماقادرش يستوعب بلي مرتو حبيبتو ممكن تكون ضاعت منو... اول وجهة فكر فيها هي دارهم، يمكن تبغي تجمع حوايجها باش تخوي الدار داكشي علاش ديمارا نيشان للدار... سكت طوموبيلتو و قبل ما يسورتها كان طلع بجرا لبيتهم، حلها مالقا حتا واحد، حل لماريو كيقلب على حوايجها لقاهم محطوطين و حتا حاجة مامبدلة.. رجع خرج من البيت و طلع للطابق التاني فين كانت مو و صفية فالكوزينة، غير شافوه استغربو حيث عمرو رجع للدار بكري
-ام اميمة: ولدي ياك لاباس مالك جيتي فهاد الوقت
-سفيان: واش زينب رجعات للدار ؟
-ام اميمة: لا ا ولدي، هي قالت بلي غتجي لعندك واش ماجاتش؟
-سفيان: لا جات و لقاتني فالاجتماع و مشات عند بالي رجعات لهنا، صافي غتكون مشات للكلينيك
-صفية: واش غتمشي لتما؟
-سفيان: ضروري، غنمشي نبارك لهم و نجيبها معايا
-صفية: اوا ا ولدي جابك الله نمشيو معاك نيت
-سفيان: دادا انا زربان الا كنتو مازال معطلات حتا نعاود نرجع لكم
-ام اميمة: لا لا نلبسو غير جلالبنا
-سفيان: واخا انا فالطوموبيل غنتسناكم
نزل قبل ما يسمع جوابهم و التيليفون فوذنيه كيعيط لها و مكاتجاوبوش فاللخر طفاتو و خلاتو معلق...
طلع للطوموبيل و رجع راسو للور على الكوسان مغمض عينيه، باغي غير امتا يوصل للكلينيك و يشوفها، باغي يهضر معاها و يصلح سوء التفاهم اللي وقع و الاكيد انو غيخلي حتا منى تهضر معاها و تشرح لها بلي هو ما دار والو و بلي كلشي جا منها، هادشي اللي كان كيفكر فيه قبل ما تطلع مو و صفية و يديماري باش يتحرك....
غير وصلو للكلينيك، دخل بقلب كيضرب بعنف و فايديه بوكيه د الورد كان اقتراح من مو انهم يشريوه، طلعو لشومبر اللي كان قال ليه يوسف نمرتها ملي بارك ليه فالتيليفون و وقف فالباب كيتحسس النبض واش الامور مزيانة، واش قالت لهم شي حاجة، واش بينات شي حاجة او كلشي طبيعي...
شافو يوسف و تقدم لعندو داخل هو و ياه و تأكد بلي مافخبارهم والو، طاحت عينو على منى اللي كانت مع ختها و اميمة، بلا مايحس غوبش و تحرك بخطواتو لعند هدى سلم عليها و بارك لها بلاما يهز الشوفة فمنى اللي كانت كتشوف فيه باغا غير تبتسم ليه و ماعطاهاش فرصة...
باغي يسول عليها و ماقدرش، خايف يحسسهم بشي حاجة و يعرفو بلي بيناتهم شي مشكل و لكن فخاطرو شكر مو اللي سولات عليها
أنت تقرأ
مهمة رسمية (مكتملة)
Romanceهي قصة زواج اجباري اتفقو عليه واليديهم اللي كل واحد فيهم عندو غرض من داك الزواج، الاول اللي باغي يخرج ولدو من القوقعة اللي عايش فيها بسبب الغذر اما الثاني فكان عندو سبب قوي اللي مخليه يفكر يحط بنتو امانة عند صاحبو و ماغيلقاش شي حيلة من غير انو يزوجه...
