مهمة رسمية (مكتملة)

مهمة رسمية 03

فصباح اليوم الموالي، فلافاك، كانت اميمة جالسة فلبيڤيت و كل مرة تطل على ساعة يدها تشوف شحال د الوقت باقي ليها باش تسالي الحصص لي مازال تابعينها، داك الصباح بالذات حسات بالوقت ثقال و تقريبا واقف بكثرة ماباغا غير امتا ترجع لدار باش تعرف ردة فعل باها مورا الرفض د عريس الغفلة كيفما مسمياه...

قفزات من بلاصتها على صوت الصاك اللي تلاح فالكرسي لي حداها و طلعات عينيها فصاحبتها و هي مخنزرة

-اميمة: ا مالك ا ختي طيرتيها مني خلعة

-اسماء بزعاف: شوفي نتي لي لويكاند كامل و انا نعيط لك مكاتجاوبينيش

-اميمة بتنهيدة: وا غير خليها على الله داكشي لي وقع ليا هاد لويكاند والله حتا يخليك حالة فمك

-اسماء بلهفة: شنو وقع عاودي ليا

-اميمة بحزن: بابا باغي يزوجني

-اسماء تحلو عينيها بصدمة: شنو كتقولي كيفاش باغي يزوجك؟ و بشكون؟ كنعرفوه؟

-اميمة تنهدات: بغا يزوجني لولد صاحبو حقا ما حقا عطاه الكلمة و مايقدرش يتحاشم معاه

-اسماء: باينة رفضتي، انا عارفاك ا صحيبتي مكاديريش شي حاجة الا ماكنتيش مقتانعة بها خاصة لا تبززات عليك والله لا درتيها

-اميمة هربات عينيها من نظرات صاحبتها: رفضت و وافقت

-اسماء ببلاهة: مافهمتش! كيفاش؟

-اميمة حنحنات: انا غنشرح لك

-اسماء بلهفة: شرحي دغيا دغيا ماقادراش نتنفس

-اميمة ضرباتها بخفة: وا بااااااز (حطات اكواعها على الطبلة و سندات وجهها على كفها كتشوف فصاحبتها) فلول فاش هضر معايا بابا مابغيتش، تخيلي ا صاحبتي قاليا ماتعرفيني مانعرفك (بغات تجاوبها اسماء و لكن حبساتها) خليني نكمل تال لخر و قولي لي بغيتي (تقادات فجلستها مشبكة ايديها فوق الطبلة مزيرة عليهم و كتشوف فيهم) لبارح كنا معروضين عندهم للغذا و انا كنت ناوية غير نلقا الفرصة فين يسمعني داك عريس الغفلة ندير راسي كنهضر مع صاحبي زعما را شي واحد فحياتي

-قاطعاتها اسماء كتضحك: ههههه لعار شنو قاليك راسك

-اميمة خنزرات: وا قلنا ليك ماتقاطعينيش (ميلات راسها) شنو بغيتيني ندير را الدنيا كحالت فعيني وليت باغا ندير اي حاجة باش نتفك و لكن الحمد لله و انا غادة ندير هادشي سمعتو كيهضر مع خوه و قاليه بلي مكيفكرش فالزواج و غيسد الموضوع مع باه بالليل، يعني لبارح