نهار جديد، فالشركة كان جالس يونس مع يوسف خدامين على بروجي جديد، من بعد ساعات متواصلة د الخدمة، حط يونس ايديه مور راسو كيتجبد و وقف يرتاح من الجلسة اللي عنزاتو
-يونس: تشرب معايا قهيوة؟
-يوسف مازال عينو على خدمتو: اوك
طلب ليهم يونس قهوة كحلة و رجع جلس قدام خوه
-يونس: ماعييتيش؟
-يوسف: مابغيتش نعاود نفس الغلط بغيت نتأكد من كلشي
-يونس: مازال الحال على هاد المرحلة را حنا مازالين فالبدية
-يوسف: والله الا وليت كنخاف، اللي عضو الحنش يخاف من الحبل
-يونس: دابا هادي دارت لنا العقل كاملين
-يوسف: الموت ديالو هو تاني احسن خبر سمعتو فحياتي من بعد خبر د غنولي اب
-يونس حك لحيتو: نتا مرتاح لموتو؟ جاتك عادية؟
-يوسف: و علاش مانرتاحش؟ جاتني مت عادية و دارها لراسو هنا البشرية من ميكروب بحالو
-يونس: انا جاتني فشكل لموت ديالو و على غفلة هاكاك، واخا نقولو انتحر انا مامرتاحش
تدق لباب و دخلو لهم قهيوتهم، خذا منها يوسف و رجع حط كاسو كيشوف فخوه
-يوسف: والله ا خويا حتا باغي تحمق راسك واش غيبقى تابعك فحياتو و حتا فموتو؟ صافي نساه و عيش حياتك
-يونس: وا ماشي لخاطري ماقادرش نرتاح
-يوسف: دابا ماعليناش، نتا عارف بلي هدى عندها اختها توأم
-يونس: فخباري، علاش هاد السؤال؟
-يوسف: لبارح هضرات معايا هدى دوات معاها مها على ود ختها، طلباتنا نعطيوها سطاج عندنا هنا
-يونس باستغراب: كنتي قلتي ليا بلي ساكنين فطنجة، طنجة كلها مالقات لا سطاج لا خدمة؟
-يوسف: وا ماعرفت انا، دابا اش بان لك
-يونس: ماعنديش مشكل نضبرو لها، اشمن ديبلوم عندها؟
-يوسف: كنظن تسيير المقاولات
-يونس: ماعندها مادير عندنا هنا، غنشوف لها مع سفيان هو غيكون محتاج لها
-يوسف: اودي غير اللي كان غير مانتسماش خسرت الخاطر للنسيبة
-يونس: هههه قول هاكا، عينك فالرضى
أنت تقرأ
مهمة رسمية (مكتملة)
Romanceهي قصة زواج اجباري اتفقو عليه واليديهم اللي كل واحد فيهم عندو غرض من داك الزواج، الاول اللي باغي يخرج ولدو من القوقعة اللي عايش فيها بسبب الغذر اما الثاني فكان عندو سبب قوي اللي مخليه يفكر يحط بنتو امانة عند صاحبو و ماغيلقاش شي حيلة من غير انو يزوجه...
