مشات حنين كتجري بحال الفراشة و بقات شوية و تبععاتها مريام ..خلاتها تتوجد الطابلو و الالوان و دخلات لبيتها تبدل عليها حوايج مريحة ترتاح من العيا د النهار...حتى جات عينيها على صاكها بقات تتشوف فيه شحاال و فتحاتو مخرجة منو الدفتر لي كانت تتقرى منو فالصباح غي شافت عبد الهادي خباتو بالزربة حتى ترجع و تكمل قرايتو .. جلسات على طرف الناموسية تتقرا فيه الحب و الغرام من زكية لشخص مامذكروش اسمو نهائيا ..و باين بلي هادشي قديم و ماشي عاد جديد ..الدفتر تبالا و تيبان فيه القدومية....و كل صفحة فيها تعبير عن الحب ...! عقدات مريام حجبانها و احساسها خلاها متأكدة انها تتدوي على عبد الهادي كي قالت ليها سلمى الصديقة المقربة لزكية لي فرشات زكية حدا مريام و جابت ليها دفتر اسرارها ..! خلاتو عندها و خرجات من بيتها قاصدة السيدة لي المكلفة ..
_ لالة مريام محتاجة شي حاجة..
مريام : كلمي ليا زكية عفاك ..
المكلفة : وخا الالة ...
طارت علمات زكية لي قلبها زهق مع رجليها غادية للمكتبة و الخلعة شادة فيها...دخلات حانية الراس لقات مريام جالسة فالفوتوي و الكتب من وراها مستفين فالخزانات من كل صنف...
زكية : لالة مريام طلبتيني...
مدات ليها مريام الدفتر و قالت بجدية : هذا ديالك ؟
صفار وجه زكية بالزربة و نقزات على الدفتر شداتو عندها : والله الالة مانيتي خايبة ..والله حتى داخلة سوق راسي و عمرني شفت فسي عبد الهادي شي شوفة ناقصة ..
مريام : شكون دوا ليك على عبد الهادي ؟!
زكية ( شافت راسها فرشات روحها عطاتها للبكا و الرغيب ) هالعار الالة والله حتى هادشي قديم...ماتحاسبنيش عليه الله يخلي ليك ماعز عليك...الله يخلي ليك سي عبد الهادي و يفرحك بولادك والله الا هادشي قديم ..انا تندوي مع واحد و خطوبتي بيه قربات تابعني مصارف ديال راسي و عائلتي الله يرحم ليك والديك ماتجريش عليا...
بعدات مريام يديها فاش شافت زكية تحنات تبوسهم...ناضت واقفة تترمش فيها كان عندها فيها شك و صدق شكها صح ...
_ نوضي ازكية وقفي واقفة البكا ماعندوش فاش يفيدك...
ناضت زكية تتسمح دموعها و تشهق حتى تيشطحو كتافها..
_ الله يخلي ليك ماعز عليك الالة...
مريام : ماشي اول مرة تنرد البال لشوفاتك لعبد الهادي ماشي طبيعية و تنميك ! ( شافت فيها بانزعاج ) ولكن الكلام لي تتقولي ورى ظهري و فوجهي تتنافقيني بزاف ازكية !! نتي الخوف منك مانقدرش نامن ليك ولا نعاود نتيق فيك ! انا وليت سحارة ؟؟ انا وليت بنت السوق كاع هادشي خرج منك ..تقدري تنكري هاد الهدرة فوجهي ؟
.زكية ( بنكران ) كذووب والله حتى كذووب الالةة...
مريام : و الكلام لي قلتيه لحنين حتى هو كذوب ؟ باغية تلعبي فراس وحدة صغيرة و تحرضيها ضدي !
أنت تقرأ
🍁قيد العراقي 🍁 (طور التنزيل )
Adventureقال لي من أنت ..؟ فقلت لا يغرنك جرئتي في الكتابة .. فتلك التي تمسك بقلمها .✍...لتدون لك كل هذا الحب ليست انا ...!! انا إمراة خجولة في الحب . ...تختبئ خلف ستار الكلمات ...تحمر خجلا من نظرة ...فما بالك من كتابة الغزل والمطالبة به ... تتلعثم أمام إع...
