"إنه لا يوجد بيني وبين نفسي أي فراغ يتسع لشخص آخر".
سِدن
2017/6/20
واقفة على نياط قلبي اشوف حلمي وكُل امنياتي بيد شخص ثاني، لحظةة حسيت نفسي تخطيتها للمدة الي جنة تاركين بيها، بس اليوم طلعت كل ضنوني غلط .
كل الي حاولت اطلع منة رجعت الة بكسران اكبر
لـ 9شهر و12 يوم بكل يوم جنت اموت الف موتة حتى اتخطى، اتخطى الاماكن، اسمها، الوعود و الرسائل وهي توصف حبها الي، وخوفها يمكن يجي يوم ووامل منها او اشو بنت غيرها واعوفها
وهي الي عافتني!
ضحكت بعد م تجمعن دموعي بعيوني، مسحتهم بأهمال ومشيت خطوتين واني اطلع برة البيت
بعد ما سمعت خبر اليوم زواجها من الي عافتني على مودة. !
ـ وين طالعة
وقفت بدون ما اباوع للي حجة
ـ بابة حروح لصديقتي
همست وكان كل م بية يرجف، جفلت للحظة للايد الي صارت على كتفي
ـ رگبي بالسيارة عندي شغل بالمحل، ع الاقل خاستفاد منج بشي
رغم كرهي بس فرصة حتى م افكر او حتى اكون وحدي حتى م انهار او حتى بلكت ارجع تعبانة وانام
جلست بهدوء.
ـ ما بطلتي من سوالفج المكسرة ويـ البنات!
رطبت شفتي م كان الي طاقة ولا ١٪ حتى اسمع كلام احد تجاهت كلامة وخليت سماعاتي وعليت صوت الاغاني
مرت دقايق، ابتسمت بألم من استوعبت جنت داخل لالبوم الي بي الاغاني الي هي هاديتهم الي.
حاولت اتجااهل وحاولت واشتغلت شغل حيدر كان الشغل شاغل كل تفكيري،
استمرت ساعات تجر ساعات لحد ما صارت الـ 6 المغرب، جلست واني اباوع لـ حيدر وهو يبدل يشغل السيارة الي كملنة تبديل المحرك مالتها.
وأجت على بالي اخذت نفس
ـ بابة راح لصديقتي ويمكن ابات عدها
وسوة نفسة م يسمع تركتة ودخلت للكراج وصعدت خطوات للغرفة الفوك غيرت ملابسي وطلعت امشي بدون وجهة استمر ساعات
حررفيًا احس التعب نايم ع متوني
الم خاصرتي كان يشدد بكل خطوة، كل خطوة كانت تحمل عطرها، سوالفنا، نومها بحضني لـ 4 سنوات
لمنو اشكي وجانت هي الوحيدة الي اسولف الها الي بية، لمنو أكول وحيفهم.
استوقفني نهر دجلة، استغربت نفسي ماشية كُل هذي المسافة
جلست شغلت جگارة.
صوت التلفون قطع حبل افكاري الي جانت هسه هي شنو دسوي
ـ ها بيبي
همست
ـ يمة شبي صوتج
ضحكت واحاول ما ابيت شي
ـ حبيبتي ما بي شي
ـ لعد ليش ما رجعتي ويـ ابوج خاف تعتركتوا!
ـ لا بيبي كتلة راح ابات يم صديقتي وهسه ردت اتصل عليج حتى انطيج خبر
ـ زين امي أنتبهي لنفسج
غلقت التلفون واستمرت جلستي لساعات بدون ما افكر اتحرك، وبسبب علاقاتي السيئة والباردة ويـ الاشخاص والي تركت اغلب مقربيني على مودها م جان عندي تفكير واسع لشخص اروح وابجي بحضنة.
