مَجن الشَبح

مَجن الشَبح|الثامن

يابة شلوني وانا حدثت بسرعة؟ مو استاهل دعم حلو بهذا البارت؟، إضافة ان هذا البارت كتبته وانا كلش تعبان 😞

مشاهدة ممتعة

ــــــــــــــــــــــــــــــــــــــــــــــــــــــــــــــــــــ

گعد من نوم بسبب حلم مزعج فرك عيونه بنعاس وعيونه اتجهت للساعة جانت ساعة اربعة الفجر گام من الجرباية يدور على تلفونه وشافه على الميز اول ما اخذه وفتحه جان اكو هواي مكالمات من آسر و رسائل فتح عيونه بصدمه وشاف تلفونه مغلق لذلك ما سمع اي صوت فتح الدردشة و كتب "اسف، تلفون جان صامت انا بيت صديقي" اول ما رسل رسالة اتفاجأ ان ثاني شافها بسرعة واتصل عليه

"تحجي صدگ زمزم؟ هيج توگع گلبي عليك ضليت افتر بكل مكان اعرفك تروحله بلكت الگاك وتصل عليك ماكو موتتني"
سمع زمزم صوت آسر الي جانت نبرته عالية وقلقة

"والله اسف ما انتبهت على تلفون صامت كضيتها ويا صاحبي و ما حسيت بالوقت"
حجه زمزم بندم لان ما گل للثاني وخلاه بقلق عليه

"هسه ميخالف بوية أهم شي أنتَ بخير و ما صايرلك شي فدوة الك ماكو داعي تتأسف عن اي شي تسويه"
حجه آسر بحنيه خلت زمزم يعض شفته بخجل من كلام ثاني، و اول ما آسر لاحظ صمت زمزم حجه

"دزلي عنوان بيت صاحبك و انا جايك عيوني"
تحمحم زمزم و گال

"الساعة اربعة الفجر وين تسوق وتجيني هيج وكت؟"
گال زمزم بقلق كون الوقت متأخر كلش

"انا من الليل لحد هسه ما داخل للبيت ادور عليك هسه دزلي العنوان خلي اشوفك بوية"
وافق زمزم وغلق الخط يرسل عنوان بيت مَجن الـ آسر و اول ما أرسل العنون غلق تلفونه وضل يفتر بالغرفة بسعادة بدون سبب،

اتجه للغرفة الثانية الي نايم بيها مَجن وضل يگعد بيه لحد ما فتح عيونه بنعاس "شكو خيرك مگعدني هسه؟ "

"راح يجي آسر ياخذني للبيت ردت أگلك خاف تگعد و ما تلگاني"
حجه زمزم بنبره خافته

"والله بيك دفره هسه مو گتلك عندي گعده من وكت جان كتبت دزيتلي رسالة شي بربك روح من يمي خلي انام" صاح مَجن بأنزعاج بوجه ثاني الي انحرج وطلع من الغرفة تارك ثاني ينام،

سمع صوت اشعار من تلفونه من آسر يگله انا وصلت گبال البيت فا نزل بسرعة فتح الباب وشافه منتجي على سيارة وعينه على تلفونه ومبين على وجهه ما نايم ولا داخل للبيت صدگ لانه بنفس ملابسه مال امس، طلع وصل يمه كلش لحد ما انتبه آسر و رفع عيونه على زمزم و اول ما شافة سحبه الحضنه بكل قوته وضل يشم بشعره و ايده تمسح على ظهر زمزم