بين انياب الزاجر

البارت الثالث

ورحت راجعه للغرفه تلكاني عمي كال وراي سرعه
رحت بدون كلام

كال انتي ماجوزين من افعالج ما توبين ضرب ومافاد تعذيب ومافاد سب وغلط ومافاد رزايل ومافاد
شسوي وياج هسه حيرتيني

كتله مرتك لا تتقرب مني وما سويلهه شي
كال بت*****

مرتي تاج راسج افتهمتي
كتله تاج راسك مو راسي افتهمت لولا

كام صفكني براجدي مااهتميت ولا نزلت دمعه وحده

كال يا حسافه تربيتي بيج وتعبي وياج
كتله على كيفك لا تحمى زايد

كال انجبي حيوانه امشي حضري ملابسج وغراضج شويه ويجون ياخذوج لبيت رجلج
رحت لازمه راسي ابجي بنفس مخنوك مااريد يسمعون شهكاتي
يعني حتى عرس ماكو
عبالك مسويه بليه لو عمله سوده

اصلا حالي حالي الفصليه شفرق عنهه
ولو مجان همي العرس ولا يمه اصلا
يسون ميسون مامهتمه

رحت يم قفص الحمام طلعت شكرلمه وكعدت امسد بشعرهه
واحجي وياها وابجي

حسيته متألمه لحالي وعلى وضعي جانت هديه بابا اليه قبل لا يتوفى
جانت اخر ذكرى منه بعد ذاك اليوم الاسود
وبستهه مسحت ريشاتهه

وشلعت ريشه منهه
وطيرتهه بالسما

اباوعله تبتعد وراحت
ودعتههه ومشيت لميت اغراضي وملابسي
بجنطه صغيرة

ضليت كاعده واباوع لخواني نايمين مثل الملاك
ودموعي تصب صب

شلون اعوفهم مااكدر كلبي ما يطيني
الله لا يوفقك يا سالم الله ينتقم منك دنيا قبل الاخره
كمت لبست فستان ابيض بسيط كلش
وحذاء بيضه وجنطه. جابتهن خلود اليه
وكالت اذا سئلوج كولي اني ماردت عرس
هزيت براسي اخر همي اصلا
حتى يتهنون بمهري وياكلو

قطع تفكيري فتحت الباب دخلت خلود كالت يله اجو امشي
بست اخواني وامنتهم يم رب العالمين ومشيت وراهه

طلعنه برة شفت سيارة سوده عاليه وحديثه مضلله
نزل منهه رجال اخذ جنطتي صعدهه ورة

وفتحلي الباب اصعد
ضليت صتفنه وين رجلي وين المشيه
وين الناس عمي حالي حال الفصليه شغرق عنهه
ضليت مستغربه هاي شكو

زفرت بياس
التفتت لخلود وكتلهه اخوتي ثم اخوتي اندمج والله اذا صارلهم شي

رادت تهجم عليه وتسب بيه كبل عفتهه وصعدت للسيارة بسرعه
تحركنا بس اني ويا بسيارة مااعرف منو هو

ضلينه نمشي مسافه واني دموعي تصب وحاطه راسي عالجامه حيلي رايح كله
حسيت نفسي شي ماله قيمه بهالحياه عبالك سويتلي بلوة

حتى عرس ماكو ورجلي لسه مادحكت طوله ولا شفت شكله
خفت بي شي وعمي شمرني اله يخلص مني
خاف مخبل خاف مريض خاف.... وخاف