ذنب آل سردار "خانم الشاه"

الصفحة الثانية:

تبشرني بجيتك رفت
واكوم بلا نشد  يازين

اشيم اجدامي واتلكاك ولو ينراد
لملاگه اليحبك حيل
ومامش حيل !

لـ عبد الكريم القصاب

—------------------------

بــرلَنـت

العراق— اربيل

بعد ثلاث سنين رجعت بس هل مرة رجعت انتقم من كل شخص كان سبب بألمي كل شخص ما رحم بحالنا كل شخص ساهم بـ قتل عائلتي اني گتالتهم

جنت كاعد بالبلكونة جو بارد نهاية شهر ديسمبر رآس سنة قريب هل مرة راح احتفل بي هنا اخر احتفال لآخر سنة راح اعيش بيها هنا

دخلت لشقتي جنت كاعده بشقة جبيرة نوعاً ما بمكان حيل معروف اشتريتها سابقاً لان ما اريد ارجع لبيت أهلي قبل لا أخذ ثارهم

غيرت ملابسي لهاينك ابيض وبنطلون ابيض لبست كوت بيجي غامق حطيت مكياج ترابي وحمرة بلون الكوت شعري جنت مسويته كيرلي لبست كعب باللون الكوت اخذت اغراضي وطلعت من شقة..

نزلت للكراج سيارتي الحلوة شغلتها وطلعت
مشغلة الموقع لأن ما اندل هنا صارلي سنين ما وصلت لهنا وكفت يم بوتيكي المصممة رزان اليوم الافتتاح وهوسه ضليت أوجه العامل نرتب المكان قبل لا يوصلون ضيوف

فعلاً بعد العصر وصلو بيل جان مسؤول عن
الاعلان صور كلشي وفتتحت فرعي الاول
بالعراق جنت فرحانه حيل بهذا الانجاز
الي لولا مساعدة دنيار ميصير رفعت مبايلي
على اتصاله

-الف مبروك تستاهلي حبيبتي.
-شكراً دنيار بدونك اضيع.
-مافي بينا شكر رزان يلا ارجعي لضيوفك.
-تمام باي.

غلقت الاتصال وتوجهت للضيوف أسلم عليهم جانو ناس معروفين وهواي ناس حضرو بسبب حساباتي بمواقع التواصل ناس جانت تعرفني وهما شجعوني افتح فرع بالعراق

التفت لصوت انثوي وراي انداريت وشفت بنية حيل حلوة عيونها الخضر ميزتها ونمش مغطي وجهها لابسه حجاب وبصفها شاب طويل يباوعلي بطرف عينه ما عاجبه عيونه زرق سبحان الخالق اول مرة اشوف هيج ملامح قوية

-ست رزان الف مبروك الافتتاح.
نطقت البنية الي وياه بخجل ابتسمت على حياءها ورديت 
-تسلمين حبيبتي، شكراً لحضوركم نورتونا.

التفتت على شاب الي وياها دار عينه عني وطلع برة

-اني اسمي ايه متابعتج من وكت طويل وحجزت عندج من فترة نتظرتج لحتى تفتحين الفرع واجيج.

-تشرفنا ست ايه، اكيد من باجر تفضلي للمكتب تتناقش على طلبج ودزاين وتصميم والوقت.

-ان شاء الله باجر اجيج أصلاً اني جيت من بغداد علمود احضر الافتتاح واشوفج، عادي ناخذ صورة سوا؟.