ذنب آل سردار "خانم الشاه"

الصفحة العاشرة:

تِخاربنه ويَ أهلنا و ماخُربنا وياك
ماحَسبالنه بهلـ رُخُص تِنطينا ؟

بــ عتاب جوانا لـ سردار

—--------------

بــرلَنـت

تقربت وسمعت رده من السبيكر وكال-منو يكول هذا ابني بعد لا تتصلين بيه روحي شوفي منو ابو لا تذبين بلاج عليه..

سد الاتصال منها وهي انهارت بجي واني ما اعرف اواسيها لو ابجي وياها، جنت اشوف
بعينها كسرة دگلي بيها خاني الي جنت اتباه
بي خاني الي عاركت دنيا عليه..

تقربت منها بخطوات مترددة وهي طاحت
بحضني تبجي وتنحب ما كان بيدي سوى أن اطبطب عليها وإهدائها بكلمات اعرف انها لا تجدي معها

-لا تأذين نفسج عليه، هو الخسرج انتِ ما خسرتي، انتِ ثقيتي بي وحبيتي هو مو كد ثقة و مو رجال باوعيلي

رفعت راسها الي عيونها حمر من حرگة دموع تنهدت وحجيت وياها بصوت هادي-نكدر نحل المشكلة سوا.

-شلون رزان شلوون فهميني ابوية يريد يزوجني لـ آزاد!.

-كولي لأزاد خلي يساعدج.

-انتِ خبله حتى يقتلني.

-ما يكتلج شرحي له الموضوع كله واني متأكدة راح يوكف وياج انتو اصدقاء من طفولة.

-مادري رزان تعتقدين راح يساعدني؟.

-آزاد انسان مؤمن ومثقف وواعي متأكدة راح يساعدج وياخذ حقج من عيون الگلب هذا.

-لا تغلطين عليه.
دمغتها على راسها وكمت-بعد كل سوا بيج دافعين عنه راح تخبليني!.

مرت فترة وجوانا تتصل بـ سردار وهو ما يرد عليها، بليله اجتني واني نايمه كعدتني وكالت الي-رزان باجر راح اروح لبيتهم.

-شنو بيت مَن؟.

-بيت سردار واكول الأمة واشرح الها كل شي اكيد هي ما راح تتخلى عن حفيدها.

-لا تنزلين نفسج الهم نجبي وسكتي.

-رزان ما عندي غير حل سمعت بابا يحجي ويا ماما محددين موعد خطوبتنا اني وازاد.

-ليش ما حاجيتي ازاد؟.

-شتريدين اكله خطيبتك متزوجة وحامل.

-جوانا و الرب خايفة عليج.

-تعاي وياي.

-مستحيل.

-لا تدخلين بس ضلي وياي.

هزيت راسي بتردد موافقة، صبح طلعنا بتكسي لبيتهم كان بمنطقة جداً راقية، دفعت الكروة ونزلنا جان كدام الباب حراس اني وكفت بمكان بعيد و جوانا ضلت بالباب تحجي ويا الحراس