අත් වැරැද්ද ( Completed ) / අත් වැරැද්ද 02 (Ongoing )

තිස්‌හතරවැනි කොටහා

" අප්පු උබැහේගේ කොල්ලු ඩිංගක් මයෙ බත් පතට දාහන්කෝ ඩිංගක්. හරි රසයි "

" හොදයි ලොකු බේබී මහත්තයෝ "

උදේ පාන්දරම වැඩට ගියපු මයෙ ලොකු මහත්තයා එනකම් මන් බතුත් කාලා ඉස්තෝප්පුවට වෙලා බලන් හිටියා. අප්පුවා නම් දා ගෙන ඉලපතෙන් මිදුල අතු ගානවා. එක පාරටම ආපු බඩේ රුදාවක් නිසා මන් ටිකක් ගියෙ වලව්වේ පිටිපස්සේ දිහාට්ට. ටිකක් ඔක්කාරේට වගෙ ඇවිල්ලා වමනේ ගියපු නිසා ළිදෙන් මූණ අත පයත් හෝදලා ආයේ ඉස්තෝප්පුවේ පැත්තට යද්දි අප්පු නෙවෙයි පේන්න හිටියේ. කුස්සියේ පැත්තට යද්දියි මන් දැක්කේ ලොකු මහත්තයා බත් කනවා. අපරාදේ මන් නැති ටිකට එයා ඒ ඩිංගට ඇවිල්ලා.

" ආ හාමු මහත්තයා ආවද මන් බලා ගෙන හිටියේ මහත්තයා එනකම් තමයි "

" දැන් ටිකකට කලින් ආවේ. බත් කාලාද ඉන්නෙ හාමිනේ "

" ඔව් මහත්තයෝ මන් කෑවා හැමෝම කෑම කද්දි. අඩුපාඩු තියෙනව නම් කියන්න මහත්තයෝ මන් බෙදන්න "

" ම් මේ හොදටෝම ඇති හාමිනේ. අප්පු උබත් දැන් කාලා හිටහන්. මාත් කාලා අහවරයි. "

එහෙම කියාපු ලොකු මහත්තයා බතුත් කාලා නැගිටලා ගිහිල්ලා පිගාන හෝද ගත්තට පස්සේ අප්පු එයාගේ බෙලෙක් පිගානෙට බත් බෙදා ගත්තා.

හැමදාම මේ වලව්වේ අප්පුවාමනේ උයන්නෙ අද වලව්වේ දවල්ට මන් ඉව්වා නම් හරි.

" අම්මේ මන් අද උයන්නද දවල්ට "

" ආ ඒක කොච්චර හොද දෙයක්ද ඈ කෙල්ලේ. අප්පුගෙනුත් උදව් ඇරගෙන උයහන්කෝ එහෙනම්. "

මන් අම්මගෙනුත් අහලා ගියෙ කුස්සියේ පැත්තට උයන්න.

" පුංචි මැණිකේ මොකෑ කුස්සියේ පැත්තට ආවේ. මොකක් හරි දෙයක් කරලා දෙන්න ඕනිද "

" මන් මේ උයන්න කියලා අප්පුවො. "

" පුංචි මැණිකේ මොකටද දැලි කුණු අල්ලන්නේ කුස්සියේ පැත්තට ඇවිල්ලා "