>> Unicode <<
~~~~~~~~~~~~
ရန်ကုန်သို့ဝင်ချိန်မှာ မှောင်ရီပျိုးစအချိန်ဖြစ်သည်။ စောကတော့ သူ့အိမ်ကိုဖုန်းကြိုဆက်ထား၏။ စောရဲ့ဖခင်ဖြစ်သူမှာ သူကိုယ်တိုင်လာကြိုမယ်ဆို၍ ကားကြီးဝန်းမှာပဲစောင့်ဖို့ သူတို့ဆုံးဖြတ်ထားကြသည်။
" စော.. "
လက်ကိုအသာယာလှုပ်ကာနှိုးတော့ သူ့ပုခုံးပေါ်မှီထားတဲ့ခေါင်းလေးလည်း လှုပ်ရှားလာ၏။
" ဟင်.. အကို "
" ရန်ကုန်ဝင်လာပြီ "
" ခဏအိပ်ချင်သေးတယ် "
ဆိုကာ လက်တွေကသူ့ခါးကိုတိုးဖက်ပြီး ပုခုံးပေါ်ပြန်မှီလာ၍ ဈာန်ရယ်မိသွား၏။ ကိုယ့်မှာသာ အမျိုးမျိုးသောအတွေးတွေကြားစိတ်လှုပ်ရှားလာတာ။ သူကတော့ တစ်လမ်းလုံးစိတ်ချလက်ချအိပ်လာတာများ သူ့အိမ်သူ့ရာနှင့်အထင်မှားနေသလားတောင်ထင်ရသည်။
" ထတော့လေ၊ ရောက်ခါနီးရင် အန်ကယ့်ကိုဖုန်းဆက်မယ်လို့ပြောထားတယ်မလား၊ ဆက်လိုက်ဦး "
" အကိုဆက်လိုက်ပါလား၊ သားတို့ရောက်တော့မယ်ဖေကြီးလို့ ပြောလိုက် "
ပြောပြီး သူ့စကားကိုသူသဘောကျကာ ရယ်နေတဲ့ကောင်လေး။ အိပ်ရေးဝနေတဲ့ရုပ်လေးက ကြည်ကြည်လင်လင်။ ဈာန်လည်း အသည်းယားသွားပြီး စောရဲ့ဆံပင်လေးတွေလှမ်းဖွသည်။
" အကိုဒီညဘယ်မှာအိပ်မှာလဲ "
" ငယ်ငယ့်အိမ်မှာပဲပေါ့၊ မနက်ဖြန်မှ ကိုယ့်တိုက်ခန်းကိုပြန်မယ်၊ ပစ်ထားတာကြာပြီဆိုတော့ သန့်ရှင်းရေးလုပ်ရဦးမယ်လေ "
" မနက်ဖြန်ဆို ကျွန်တော်လည်းအားတာပဲ၊ လာခဲ့မယ် "
စောရဲ့လက်လေးတစ်ဖက်ကိုဆုပ်ကိုင်ထားလျက် ဈာန်ခေါင်းညိတ်သည်။ စီးနင်းလိုက်ပါလာတဲ့ကားက အဝေးပြေးဝန်းထဲဆိုက်ရောက်ချိန်မှာတော့ မိုးစုန်းစုန်းချုပ်လေပြီ။ လာကြိုမယ်ဆိုတဲ့ စောရဲ့ဖခင်ကို သိပ်ကြာကြာမစောင့်လိုက်ရ။ အဖြူရောင်ပရာဒိုလေးတစ်စီးက ကားဂိတ်၏အရှေ့တည့်တည့်မှာထိုးရပ်ချိန် စောကဝမ်းသာအားရပြေးထွက်သွားသည်။
YOU ARE READING
နှလုံးသားရဲ့စကားသံ ( Completed )
Romanceဒါလေးက " မောင့်မူပိုင် " ရဲ့ side story ပါ။ ဆိုပေမဲ့ Love triangle မကြိုက်သူတွေက ဒါပဲဖတ်မယ်ဆိုလည်း အဆင်ပြေပါတယ်ရှင့်။
