عند الابل، وصل عاصف وابوه عبد الرحمن ورحبو فيه الموجودين وقامو اخوانه يسلمون عليهم ويرحبون بدون نفس ، راشد انتبه لاسلوبهم ولا اعجبه الوضع وقرر بينه وبين نفسه ان بعد ما يروحون الضيوف بيجمعهم حوله ويحلون الامور بينهم
تقدم عبد الله بالدله وقعد يصب لهم القهوة ويقدم التمر
راشد بتسائل: وينه غيث ليه ما جاء معكم؟
نطق عاصف وهو يرتشف من فنجال القهوه: بيجي الحين راح يغير ثوبه ويوصل الوالده لبيتك
راشد: زين اجل
وصل ماجد ووقف يلتقط انفاسه من قو الجري وشاف عبد الله انتبه له واشر له بيده عشان يتقدم وقاله: متى وصلو؟
عبد الله: توهم جايين والاوضاع هاديه للحين روح سلم عليهم قبل يفصل عليك جدي
ماجد: انا مدري جدي على وش يفضلهم الواحد اخلاقه بخشمه
ضحك عبد الله بشماته ودفه : اقول عجل مانبي جدي يعصب
تقدم ماجد ورد السلام عليهم وقام عاصف بهيبته وطوله الي ماخذهم من ابوه وسلم عليه ورجع يسلم على عمه عبد الرحمن بعد ما قام له
ورجع ماجد ووقف مع عبد الله يقهوون الضيوف
عاصف لف على جده ونطق : اقول جدي
راشد: هلا ابوي
عاصف بتسائل: من الي بيطبخ الذبايح اشوف العيال كلهم هنا؟
راشد: والله يا بعدي ماعندي احد غير هالعماميل قلت لهم يركبونه بعد المغرب
عاصف عقد حواجبه ونطق بحده: افا يا جدي تقول للعمال واحفادك موجودين مايصير!
راشد: منهم احفادي؟ عبد الله وماجد قالو انهم مايعرفون للذبايح وانت واخوك مدري وينكم من العصر محد فيكم جاني وقالي وش تبي ووش ناقصك يا جدي
عاصف ناظر بغضب في عبد الله وماجد الي قمطو العافيه من نظراته الي مليانه نقد !
تنهد قبل يقول: لو داري ان ماعندك احد كان جيتك انا وغيث مانقصر لكن قلت دام عيال العم موجودين مابتحتاج لنا وشكلي اسأت الظن طلع ما منهم فايده ترجى
عبد الله عصب من كلام عاصف وكان بيتكلم لو ما سكته ماجد جنبه
ماجد: تبي جدي يعصب علينا انت!
عبد الله نطق بغضب طفيف: انت ماتشوف وش يقول علينا وقاعد يقط كلام !!
ماجد: معليه خلي هالليله تمر على خير مانا ناقصين مشاكل
قام عاصف واستأذن من الموجودين بيروح يشوف وش صار على الذبايح ويكمل الطبخ بس وقف يوم شاف غيث وصلهم ، رد السلام غيث وتقدم باس راس عمانه وجده وسلم على الباقين
راشد انبسط يوم شاف غيث جاء او بالاخص يوم تجمعو كل عياله واحفاده اخيراً في مجلس واحد..
راشد: ارحب يا الغيث
غيث: البقى يا جدي البقى
قبل يجلس ناداه عاصف عشان يروح معه
وقاله عبد الرحمن: روح عاون اخوك بالعشاء وعجلوه على الضيوف الناس هنا تنام بدري
غيث: ابشر بي يابوي
راح غيث ورا عاصف الي كان باين عليه انه معصب
غيث بتسائل: افا عصوف وش فيك معصب؟
عاصف بحده: الحين لهم ساعه عيال عمك واقفين على راسنا وماسكين هالدله ومخلين العماميل تطبخ العشاء وكان ماعندنا رجال هنا يطبخونه وش الي حادهم ويوم سالت جدك قال ما يعرفون
ضحك غيث على سبب عصبيته وقاله بمحاوله تهدئته: تعوذ من ابليس ياخوك بعدين هم سوو الواجب قعدو يقهوون ضيوفهم
ضحك عاصف بسخريه ولف على غيث: لو واحد فيهم قهوى الضيوف والثاني طبخ الذبايح وش بيخسرون ماهوب احسن!
غيث حاول يمسك ضحكته ما وده يضحك اكثر ويفصل عليه معهم
غيث: اي والله صادق مالهم داعي صراحه
تخصر عاصف وهو يخز غيث، يعرف انه يسلك له الحين!
عاصف: امش قدامي لا احطك فوقهم الحين
غيث بتهديد طفيف: احترم اني اخوك الكبير لا ترفع صوتك علي!
تقدم عاصف وشده من كتفه ودفه قدامه وقال: قال كبير قال اخلص امش قدامي
